കടുത്ത ചാഞ്ചാട്ടം; നിഫ്റ്റി 17,250-ല്‍; ഐടിയില്‍ നേട്ടം; റിയാല്‍റ്റി, എഫ്എംസിജിയില്‍ തിരിച്ചടി

തുടര്‍ച്ചയായ രണ്ടാം ദിവസവും ആഭ്യന്തര വിപണിയില്‍ ഇടിവ്. ആഗോള ഘടകങ്ങള്‍ പ്രതികൂലമായതിനെ തുടര്‍ന്ന് വന്‍ നഷ്ടത്തോടെയാണ് പ്രധാന സൂചികകള്‍ ഈയാഴ്ചയിലെ വ്യാപാരം പുനരാരംഭിച്ചതെങ്കിലും നഷ്ടം ഏറെക്കുറെ നികത്തിയായിരുന്നു ക്ലോസിങ്.

ഇന്നു മുതല്‍ പ്രസിദ്ധീകരിച്ചു തുടങ്ങുന്ന വന്‍കിട കോര്‍പറേറ്റ് കമ്പനികളുടെ രണ്ടാം പാദഫലം മികച്ചതാകുമെന്ന പ്രതീക്ഷയാണ് വിപണി നഷ്ടം കുറയ്ക്കാന്‍ സഹായിച്ചത്. കടുത്ത ചാഞ്ചാട്ടത്തിനൊടുവില്‍ നിഫ്റ്റി 73 പോയിന്റ് താഴ്ന്ന് 17,241-ലും സെന്‍സെക്‌സ് 200 പോയിന്റ് നഷ്ടത്തോടെ 57,991-ലും ക്ലോസ് ചെയ്തു.

മാര്‍ക്കറ്റ് റിപ്പോര്‍ട്ട്

ഇന്ന് എന്‍എസ്ഇയില്‍ ക്രയവിക്രയം ചെയ്യപ്പെട്ട ആകെ 2,226 ഓഹരികളില്‍ 576 എണ്ണം മാത്രമാണ് നേട്ടത്തോടെ വ്യാപാരം അവസാനിപ്പിച്ചത്. ബാക്കിയുള്ളവയില്‍ 1,258 ഓഹരികളും നഷ്ടം നേരിട്ടു. ഇതോടെ വ്യാപാരത്തില്‍ നേട്ടവും നഷ്ടവും രേഖപ്പെടുത്തിയ ഓഹരികള്‍ തമ്മിലുള്ള അനുപാതമായ എഡി റേഷ്യോ 0.50 നിരക്കില്‍ രേഖപ്പെടുത്തി. കഴിഞ്ഞ ദിവസം എഡി റേഷ്യോ 1.26 ആയിരുന്നു.

എന്‍എസ്ഇയിലെ സ്‌മോള്‍ കാപ്-100, മിഡ് കാപ്-100 സൂചികകളും നഷ്ടം രേഖപ്പെടുത്തിയാണ് തിങ്കളാഴ്ചത്തെ വ്യാപാരം പൂര്‍ത്തിയാക്കിയത്. ഇന്ന് 74 ഓഹരികള്‍ അപ്പര്‍ സര്‍ക്യൂട്ടിലും 87 ഓഹരികള്‍ ലോവര്‍ സര്‍ക്യൂട്ട് നിലവാരത്തിലുമാണ് വ്യാപാരം അവസാനിപ്പിച്ചത്. ഇതിനിടെ ആഭ്യന്തര വിപണിയില്‍ ചാഞ്ചാട്ടത്തിന്റെ തോത് വെളിവാക്കുന്ന വിക്സ് (VIX) സൂചിക 4 ശതമാനം ഉയര്‍ന്ന് 19.57-ലേക്കെത്തി. വിക്‌സ് സൂചിക, 20 നിലവാരം മറികടക്കുന്നത് വിപിണിക്ക് ശുഭകരമല്ല.

എന്‍എസ്ഇയുടെ 15 ഓഹരി വിഭാഗം സൂചികകളില്‍ നിഫ്റ്റി ഐടി ഒഴികെ ബാക്കിയെല്ലാ സൂചികകളും നഷ്ടം നേരിട്ടു. വന്‍കിട കമ്പനിയായ ടിസിഎസിന്റെ രണ്ടാം പാദഫലം ഇന്നു വൈകീട്ട് പുറത്തുവരാനിരിക്കുന്നതിന്റെ പ്രതീക്ഷയിലാണ് ഐടി സൂചിക 1 ശതമാനം നേട്ടം കുറിച്ചത്. അതേസമയം നിഫ്റ്റി എഫ്എംസിജി, റിയാല്‍റ്റി, മീഡിയ, കണ്‍സ്യൂമര്‍ ഡ്യൂറബിള്‍സ് സൂചികകള്‍ 1 ശതമാനത്തിലധികം നഷ്ടം രേഖപ്പെടുത്തിയാണ് തിങ്കളാഴ്ചത്തെ വ്യാപാരം അവസാനിപ്പിച്ചത്.

അതേസമയം നിഫ്റ്റി-50 സൂചികയുടെ ഭാഗമായ ഓഹരികളില്‍ 20 എണ്ണം നേട്ടത്തോടെയും 30 ഓഹരികള്‍ നഷ്ടത്തോടെയും ഇന്നത്തെ വ്യാപാരം പൂര്‍ത്തിയാക്കി. 3 ശതമാനത്തോളം മുന്നേറിയ ആക്‌സിസ് ബാങ്ക് ആണ് നിഫ്റ്റി ഓഹരികളില്‍ ഏറ്റവും നേട്ടമുണ്ടാക്കിയത്. ടിസിഎസ്, എച്ച്ഡിഎഫ്‌സി ലൈഫ്, വിപ്രോ, ഐഷര്‍ മോട്ടോര്‍സ് ഓഹരികളും 1 ശതമാനത്തിലധികം നേട്ടത്തോടെ ക്ലോസ് ചെയ്തു. 4 ശതമാനത്തോളം ഇടിഞ്ഞ ടാറ്റ മോട്ടോര്‍സ് ആണ് നിഫ്റ്റി ഓഹരികളില്‍ കൂടുതല്‍ നഷ്ടം നേരിട്ടത്. ടാറ്റ കണ്‍സ്യൂമര്‍, ഹീറോ മോട്ടോ ഓഹരികള്‍ 2 ശതമാത്തിലധികം നഷ്ടം കുറിച്ചു.