മികച്ച ലാഭവുമായി മിഡ്ക്യാപ് കമ്പനി, ഓഹരി വില പറക്കുമെന്ന് ബ്രോക്കറേജ്, കണ്ണും പൂട്ടി വാങ്ങുന്നോ..?

പുതിയ ഉയരങ്ങൾ താണ്ടി മുന്നോട്ട് കുതിക്കുകയാണ് ഇന്ത്യൻ ഓഹരി വിപണി. തിങ്കളാഴ്ചയും അതിന് മാറ്റമൊന്നും ഉണ്ടായില്ല. സെൻസെക്‌സ് 269.28 പോയിൻ്റ് ഉയർന്ന് 75,679.67 എന്ന എക്കാലത്തെയും ഉയർന്ന നിലയിലെത്തി. നിഫ്റ്റി 86.1 പോയിൻ്റ് ഉയർന്ന് 23,043.20 എന്ന പുതിയ റെക്കോർഡും താണ്ടി. ഇന്ന് നേട്ടമുണ്ടാക്കി പ്രധാനപ്പെട്ട ഓഹരികളിലൊന്ന് വാണിജ്യ വാഹന (സിവി) നിർമ്മാതാക്കളായ അശോക് ലെയ്‌ലാൻഡ് ഓഹരിയാണ്.

വരുമാനത്തിൽ കുതിപ്പ്

മികച്ച ക്യു4 ഫലങ്ങളാണ് അശോക് ലെയ്‌ലാൻഡ് ഓഹരിയുടെ മുന്നേറ്റത്തിന് കാരണം. ആദ്യ സെഷനിൽ തന്നെ ഏകദേശം 3 ശതമാനത്തോളം നേട്ടമുണ്ടാക്കാൻ ഓഹരിക്ക് സാധിച്ചു. 2024 സാമ്പത്തിക വർഷത്തിൻ്റെ നാലാം പാദത്തിൽ 933.69 കോടി രൂപയുടെ അറ്റാദായമാണ് കമ്പനി രേഖപ്പെടുത്തിയത്. മുൻവർഷത്തെ 800 കോടി രൂപയിൽ നിന്ന് 16.73 ശതമാനത്തിന്‍റെ നേട്ടം. കമ്പനി 24 സാമ്പത്തിക വർഷത്തിലെ പ്രവർത്തനങ്ങളിൽ നിന്ന് 13,577.58 കോടി രൂപയുടെ ഏകീകൃത വരുമാനം റിപ്പോർട്ട് ചെയ്തു.

എല്ലാ ബിസിനസ് വെർട്ടിക്കലുകളിൽ നിന്നുമുള്ള സംഭാവനകളോടെയുള്ള ഓൾറൗണ്ട് പ്രകടനമാണ് ഫലങ്ങൾക്ക് പിന്തുണ നൽകിയതെന്ന് അശോക് ലെയ്‌ലാൻഡ് പറഞ്ഞു. ബസ് വിഭാഗത്തിൽ 5.8% പോയിൻ്റ് മാർക്കറ്റ് ഷെയർ നേട്ടത്തോടെ കമ്പനി വിപണിയിൽ ലീഡറായി ഉയർന്നു.

ഓഹരി വിപണിയിലെ പ്രകടനം

എൻഎസ്ഇയിൽ 221.15 രൂപ എന്നതാണ് നിലവിൽ അശോക് ലെയ്‌ലാൻഡ് ഓഹരിയുടെ വില. കഴിഞ്ഞ അഞ്ച് ദിവസത്തിനിടെ 4.46 ശതമാനം നേട്ടമുണ്ടാക്കാൻ ഓഹരിക്ക് സാധിച്ചിട്ടുണ്ട്. 19.31 ശതമാനം വളർച്ച കഴിഞ്ഞ ഒരു മാസത്തിനിടെ നേടാനും ഓഹരിക്ക് സാധിച്ചു. 2024-ൽ ഇതുവരെ 18.93 ശതമാനം നേട്ടമാണ് ഓഹരി നേടിയത്. ഒരു വർഷത്തിനിടെ 50 ശതമാനത്തിലധികം മുന്നേറ്റമുണ്ടാക്കാനും ഓഹരിക്ക് സാധിച്ചിട്ടുണ്ട്.

ബ്രോക്കറേജ് വിലയിരുത്തൽ

1. മോത്തിലാൽ ഓസ്വാൾ

കുറഞ്ഞ കിഴിവുകൾ, മികച്ച മിശ്രിതം, ചെലവ് നിയന്ത്രണ നടപടികൾ എന്നിവയാൽ മികച്ച ലാഭമുണ്ടാക്കാൻ കമ്പനിക്ക് സാധിക്കുമെന്നാണ് ബ്രോക്കറേജ് സ്ഥാപനമായ മോത്തിലാൽ ഓസ്വാൾ പറയുന്നത്. അതുകൊണ്ടു തന്നെ 245 രൂപ ടാർഗെറ്റ് വിലയോടെ അശോക് ലെയ്‌ലാൻഡ് ഓഹരി വാങ്ങാമെന്നാണ് ബ്രോക്കറേജ് ശുപാർശ.

2. ആൻ്റിക് സ്റ്റോക്ക് ബ്രോക്കിംഗ്

ചരക്ക് ലഭ്യത ശക്തമായി തുടരുന്നു, ശക്തമായ കാപെക്‌സ് സൈക്കിളിൻ്റെ പിൻബലം തുടങ്ങിയവയോടെ അശോക് ലെയ്‌ലാൻഡിന്‍റെ ഡിമാൻഡ് വർധിക്കുമെന്നാണ് ബ്രോക്കറേജ് സ്ഥാപനമായ ആൻ്റിക് സ്റ്റോക്ക് ബ്രോക്കിംഗ് പറയുന്നത്. ലാഭത്തിൽ സുസ്ഥിരമായ ശ്രദ്ധ കേന്ദ്രീകരിച്ചുള്ള വോളിയം വളർച്ച, വരുമാന വളർച്ചയ്ക്ക് ഗുണകരമാകുമെന്നും ആൻ്റിക് സ്റ്റോക്ക് ബ്രോക്കിംഗ് പറഞ്ഞു.

248 രൂപയുടെ ടാർഗെറ്റ് വിലയോടെ ഓഹരിയുടെ ബൈ കോൾ റേറ്റിംഗ് ബ്രോക്കറേജ് സ്ഥാപനം നിലനിർത്തുകയും ചെയ്തിട്ടുണ്ട്.

3. എംകെ ഗ്ലോബൽ ഫിനാൻഷ്യൽ സർവീസസ്

എംകെ ഗ്ലോബൽ ഫിനാൻഷ്യൽ സർവീസസ് അശോക് ലെയ്‌ലാൻഡ് ഓഹരികൾ 'സെല്ലിൽ' നിന്ന് 'വാങ്ങുക' എന്നതിലേക്ക് അപ്‌ഗ്രേഡുചെയ്‌തു, കൂടാതെ 2026-2026 മുതൽ അപ്‌സൈക്കിൾ സാധ്യതകൾ കണക്കിലെടുത്ത് ലക്ഷ്യ വില ഷെയറൊന്നിന് 250 രൂപയായി ഉയർത്തി.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.