വിപണിയിൽ കത്തിക്കയറി കൊച്ചിൻ ഷിപ്പ്‌യാർഡ് ഓഹരി, മുന്നേറ്റം തുടർന്നാൽ കീശ നിറയും, ഇപ്പോൾ വാങ്ങണോ..?

രാജ്യത്തിന്‍റെ അഭിമാനമാണ് കൊച്ചിൻ ഷിപ്പ്‌യാർഡ് ലിമിറ്റഡ്. ഒപ്പം മലയാളികളുടെ സ്വകാര്യ അഹങ്കാരവും. ഓഹരി വിപണിയിലും മികച്ച മുന്നേറ്റമാണ് കൊച്ചിൻ ഷിപ്പ്‌യാർഡ് ലിമിറ്റഡ് നടത്തുന്നത്. ജൂലൈ 9 ബുധനാഴ്ച ആദ്യ സെഷനിൽ തന്നെ മികച്ച നേട്ടമുണ്ടാക്കാൻ ഓഹരിക്ക് സാധിച്ചു. നിലവിൽ (10.30 AM) 2054 രൂപ നിരക്കിലാണ് ഓഹരി വ്യാപാരം പുരോഗമിക്കുന്നത്. കഴിഞ്ഞ ദിവസത്തെ ക്ലോസിംഗ് വിലയുമായി താരതമ്യം ചെയ്യുമ്പോൾ 1.5 ശതമാനം വർദ്ധന. ട്രേഡിങ്ങ് സെഷനിൽ ഓഹരിയിൽ പൊതുവെ പോസിറ്റീവ് പ്രവണതയാണ് കണ്ടത്.

മുന്നേറ്റത്തിന്‍റെ പ്രധാന കാരണങ്ങൾ

1. ശക്തമായ ത്രൈമാസ ഫലങ്ങൾ

കൊച്ചിൻ ഷിപ്പ്‌യാർഡ് 2025 മാർച്ചിൽ അവസാനിച്ച പാദത്തിൽ (25 സാമ്പത്തിക വർഷത്തിന്‍റെ നാലാം പാദത്തിൽ) ശക്തമായ സാമ്പത്തിക ഫലങ്ങൾ റിപ്പോർട്ട് ചെയ്തു. അറ്റാദായം വർഷം തോറും 10.94 ശതമാനം വർദ്ധിച്ച് 287.19 കോടിയിലെത്തി.മുൻ പാദത്തെ അപേക്ഷിച്ച് അറ്റാദായത്തിൽ 62.26 ശതമാനത്തിന്‍റെ വർദ്ധനവാണ് ഉണ്ടായത്.

2. ഓർഡർ ബുക്ക്

2025 മധ്യത്തോടെ കമ്പനിക്ക് ഏകദേശം 22,500 കോടിയുടെ ശക്തമായ ഓർഡർ ബുക്ക് ഉണ്ട്. ഇത് വരും വർഷങ്ങളിൽ കൊച്ചിൻ ഷിപ്പ്‌യാർഡിന് നല്ല വരുമാനം നൽകുമെന്ന കാര്യത്തെ അടിവരയിടുന്നു.

3. തന്ത്രപരമായ പങ്കാളിത്തങ്ങൾ

എച്ച്ഡി കൊറിയ ഷിപ്പ് ബിൽഡിംഗ് & ഓഫ്‌ഷോർ എഞ്ചിനീയറിംഗ് (കെ‌എസ്‌ഒഇ)യുമായുള്ള സമീപകാല ധാരണാപത്രം (എം‌ഒ‌യു) കപ്പൽ നിർമ്മാണത്തിലും സമുദ്ര വികസനത്തിലും സഹകരണം വർദ്ധിപ്പിക്കുന്നതിന് ലക്ഷ്യമിടുന്നു. ഇത് പുതിയ അവസരങ്ങളിലേക്കും സാങ്കേതിക വൈദഗ്ധ്യത്തിലേക്കും നയിക്കും.

4. പുതിയ പദ്ധതികൾ

രണ്ടാമത്തെ തദ്ദേശീയ വിമാനവാഹിനിക്കപ്പൽ (IAC-II) വികസിപ്പിക്കുന്നതിനുള്ള ഇന്ത്യൻ നാവികസേനയുടെ പദ്ധതികൾക്ക് വേഗം കൂടുന്നുണ്ട്. അതുകൊണ്ടു തന്നെ ഇന്ത്യയിലെ ആദ്യത്തെ തദ്ദേശീയ വിമാനവാഹിനിക്കപ്പൽ (INS വിക്രാന്ത്) നിർമ്മിച്ച കൊച്ചിൻ ഷിപ്പ്‌യാർഡിന് തന്നെ രണ്ടാമത്തെ വിമാനവാഹിനിക്കപ്പൽ നിർമ്മിക്കാനുള്ള ടെൻഡർ ലഭിച്ചേക്കും. അങ്ങനെ വന്നാൽ അത് ഓഹരി വിപണിയിലും കുതിപ്പിന് കാരണമാകും.

ശ്രദ്ധിക്കേണ്ട കാര്യങ്ങൾ

1. ഉയർന്ന മൂല്യനിർണ്ണയം

ഓഹരി നിലവിൽ 64.90 എന്ന ഉയർന്ന വില-വരുമാന (P/E) അനുപാതത്തിലാണ് വ്യാപാരം നടത്തുന്നത്. ഇത് ചില നിക്ഷേപകർക്ക് ആശങ്കയുണ്ടാക്കാം.

2. ബ്രോക്കറേജ് വിലയിരുത്തൽ

മൂല്യനിർണ്ണയ ആശങ്കകൾ കാരണം ചിലർ ജാഗ്രത പ്രകടിപ്പിക്കുന്നു. ഉദാഹരണത്തിന്, കഴിഞ്ഞ രണ്ട് വർഷത്തിനിടയിൽ പ്രധാന പ്രതിരോധ ഓർഡറുകളുടെ അഭാവം മൂലം കപ്പൽ നിർമ്മാണ വരുമാനത്തിൽ മിതത്വം ഉണ്ടാകുമെന്നാണ് ബ്രോക്കറേജ് സ്ഥാപനമായ കൊട്ടക് ഇൻസ്റ്റിറ്റ്യൂഷണൽ ഇക്വിറ്റീസ് ചൂണ്ടിക്കാട്ടുന്നത്.

ഓഹരി വിപണിയിലെ പ്രകടനം

എൻഎസ്ഇയിൽ 2050 രൂപയ്ക്ക് മുകളിലാണ് കൊച്ചിൻ ഷിപ്പ്‌യാർഡ് ഓഹരിയുടെ വ്യാപാരം പുരോഗമിക്കുന്നത്. കഴിഞ്ഞ അഞ്ച് ദിവസത്തിനിടെ 2.2 ശതമാനം നേട്ടമുണ്ടാക്കാൻ ഓഹരിക്ക് സാധിച്ചു. ആറ് മാസത്തിനിടെ 39 ശതമാനം വളർച്ചയാണ് പൊതുമേഖലാ ഓഹരി നേടിയത്. 2025-ൽ ഇതുവരെ 31 ശതമാനം മുന്നേറ്റമുണ്ടാക്കാനും കപ്പൽ ഓഹരിക്കായി. 2,936.25 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില.

കൊച്ചിൻ ഷിപ്പ്‌യാർഡ് ലിമിറ്റഡ്

ഇന്ത്യയിലെ മുൻനിര കപ്പൽ നിർമാണ കമ്പനിയാണിത്. 1972ൽ സ്ഥാപിതമായ ഈ മിഡ്ക്യാപ് കമ്പനി, പ്രധാനമായും കപ്പൽ നിർമാണം, റിപ്പയർ, മറൈൻ എൻജിനീയറിങ് പരിശീലനം തുടങ്ങിയവ ചെയ്യുന്നു. കമ്പനിയുടെ പ്രധാന വരുമാനം നാവിക കരാറുകളില്‍നിന്നാണ്. നാവിക സേനക്കുള്ള കപ്പലുകളുടെ നിര്‍മാണം, കോര്‍സ്റ്റ് ഗാര്‍ഡിന്റെ പദ്ധതികള്‍, വാണിജ്യ കപ്പലുകളുടെ നിര്‍മാണം, കപ്പലുകളുടെ അറ്റകുറ്റപണികള്‍ എന്നിവയാണ് പ്രധാനമായും ചെയ്യുന്നത്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.