ഫെഡറൽ ബാങ്കിൽ യുഎസ് ഭീമൻ; ബാങ്കിൻ്റെ 10% ഓഹരികൾ 6,196.5 കോടിക്ക് ബ്ലാക്ക്‌സ്റ്റോൺ സ്വന്തമാക്കും

കേരളം ആസ്ഥാനമായി പ്രവർത്തിക്കുന്ന ഒരു സ്വകാര്യ ബാങ്കാണ് ഫെഡറൽ ബാങ്ക്. ഇന്ത്യയിലുടനീളം ഒട്ടനവധി ബ്രാഞ്ചുള്ള ഫെഡറൽ ബാങ്കിൻ്റെ ഏകദേശം 10% ഓഹരികൾ യുഎസ് ആസ്ഥാനമായുള്ള പ്രമുഖ സ്വകാര്യ ഇക്വിറ്റി സ്ഥാപനമായ ബ്ലാക്ക്‌സ്റ്റോൺ ഏറ്റെടുക്കുന്നു. 6,196.5 കോടി രൂപയ്ക്കാണ് ഓഹരി വാങ്ങുന്നത്. ഫെഡറൽ ബാങ്കിന്റെ ബോർഡ് ഈ നിർദ്ദേശം അംഗീകരിച്ചു കഴിഞ്ഞു.

ബോർഡ് അം​ഗീകാരത്തിനു പുറമേ ഓഹരി ഉടമകളുടെ അനുമതി, ആർബിഐ, കോമ്പറ്റീഷൻ കമ്മീഷൻ ഓഫ് ഇന്ത്യ (CCI) എന്നിവയുടെ റെഗുലേറ്ററി അംഗീകാരങ്ങൾ കൂടി ലഭിക്കേണ്ടതുണ്ട്. ഇത് വലിയ ലാഭകരമായ ഇടപാട് തന്നെയാണ്. ഇന്ത്യൻ ബാങ്കിംഗ് മേഖലയിൽ വിദേശ നിക്ഷേപത്തിന്റെ കുതിപ്പ് വേ​ഗത്തിലാവുന്നു എന്നത് ശ്രദ്ധേയമായ വളർച്ചയാണ്.

"ഇതൊരു മികച്ച നീക്കമാണ്. കാരണം, ആർബിഐയുടെ രണ്ട് തരത്തിലുള്ള ലക്ഷ്യങ്ങളാണ് ഇത് നിറവേറ്റുന്നത്: ദീർഘകാലത്തെ വിദേശ മൂലധനം നേടുക, ഒപ്പം ബാങ്കിംഗ് സംവിധാനത്തെ കൂടുതൽ ശക്തിപ്പെടുത്തുക എന്നിവയാണ് ഈ ലക്ഷ്യങ്ങൾ. വലിയ സാങ്കേതികവിദ്യയിലും കംപ്ലയിൻസുകളിലും നിക്ഷേപം നടത്താൻ ശേഷിയുള്ളവരാണ് ഇവർ," മാക്വാരിയിലെ സുരേഷ് ഗണപതി അഭിപ്രായപ്പെട്ടു.

ഈ വർഷം നടന്ന മറ്റ് പ്രധാന ബാങ്കിംഗ് ഇടപാടുകൾ

ആർബിഎൽ ബാങ്ക്: യുഎഇയിലെ എമിറേറ്റ്‌സ് എൻബിഡിയിൽ നിന്ന് 60% ഓഹരികൾക്കായി 26,853 കോടി രൂപയുടെ നിക്ഷേപം നടന്നു

ഐഡിഎഫ്‌സി ഫസ്റ്റ് ബാങ്ക്: വാർബർഗ് പിൻകസിൽ നിന്ന് 7,500 കോടി രൂപയും അബുദാബി ഇൻവെസ്റ്റ്‌മെന്റ് അതോറിറ്റിയിൽ നിന്ന് 2,624 കോടി രൂപയും സമാഹരിച്ചു.

യെസ് ബാങ്ക്: ജപ്പാനിലെ സുമിറ്റോമോ മിറ്റ്‌സുയി ബാങ്കിംഗ് കോർപ്പറേഷൻ ഏകദേശം 15,000 കോടി രൂപയ്ക്ക് 24.2% വരെ ഓഹരികൾ ഏറ്റെടുത്തു.

ഫെഡറൽ ബാങ്ക്-ബ്ലാക്ക്‌സ്റ്റോൺ ഇടപാടുകളെ കുറിച്ച് കൂടുതൽ അറിയാം

ഫെഡറൽ ബാങ്കിലെ നിക്ഷേപം, ബ്ലാക്ക്‌സ്റ്റോൺ നിയന്ത്രിത സ്ഥാപനമായ 'ഏഷ്യ II ടോപ്‌കോ XIII' വഴിയാണ് നടപ്പിലാക്കുക. സ്വകാര്യ പ്ലെയ്‌സ്‌മെന്റ് വഴി നിക്ഷേപകന് 27.3 കോടി വാറന്റുകൾ വരെ നൽകാനാണ് ബാങ്ക് പദ്ധതിയിടുന്നത്. ഓരോ വാറന്റും 227 രൂപ (225 പ്രീമിയം) ഇഷ്യൂ വിലയിൽ 2 രൂപ മുഖവിലയുള്ള ഒരു ഇക്വിറ്റി ഷെയറായി മാറും. നിക്ഷേപകൻ 25% മുൻകൂറായി നൽകുകയും ബാക്കി തുക കൺവേർഷനിൽ നൽകുകയും ചെയ്യും.

വാറന്റുകൾ 18 മാസത്തിനുള്ളിൽ നടപ്പിലാക്കണം. കൺവേർട്ട് ചെയ്യാത്ത വാറന്റുകൾ റീഫണ്ട് ഇല്ലാതെ നഷ്ടമാവും. മാത്രമല്ല കൺവേർട്ട് ചെയ്ത ഓഹരി ഉടമസ്ഥത 5% കടന്നാൽ, നിക്ഷേപകന് ഒരു നോൺ-എക്സിക്യൂട്ടീവ് ഡയറക്ടറെ നാമനിർദ്ദേശം ചെയ്യാൻ കഴിയും.

റീട്ടെയിൽ, എസ്എംഇ, ഡിജിറ്റൽ ബിസിനസുകൾ എന്നിവയിലെ വളർച്ചയെ പിന്തുണയ്ക്കുന്നതിനും മൂലധന ബഫറുകൾ ശക്തിപ്പെടുത്തുന്നതിനും ഈ ഫണ്ട് സമാഹരണം സഹായിക്കുമെന്ന് ഫെഡറൽ ബാങ്ക് സിഇഒ കെവിഎസ് മണിയൻ വ്യക്തമാക്കുന്നു. നവംബർ 19-ന് വീഡിയോ കോൺഫറൻസ് വഴി നടക്കുന്ന പൊതുയോഗത്തിൽ ഓഹരി ഉടമകളുടെ അംഗീകാരം തേടും.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.