ട്രാൻസ്പോർട്ട് കോർപ്പറേഷൻ ഉൾപ്പെടെ 5 ഓഹരി വാങ്ങാം, 34 ശതമാനം വരെ ലാഭം ഉറപ്പ്, കൂടെക്കൂട്ടുന്നോ..?

ഇന്ത്യൻ ഓഹരി വിപണി കഴിഞ്ഞ 7 വ്യാപാര ദിവസങ്ങളായി പച്ചയിലാണ് അവസാനിക്കുന്നത്. സുസ്ഥിരമായ വിദേശ നിക്ഷേപം, പ്രോത്സാഹജനകമായ സാമ്പത്തിക ഡാറ്റ, യുഎസും ഇന്ത്യയും തമ്മിലുള്ള സാധ്യമായ ഉഭയകക്ഷി വ്യാപാര കരാറിനെക്കുറിച്ചുള്ള ആവേശം എന്നിവയെല്ലാം വിപണിയുടെ മുന്നേറ്റത്തിന് കരുത്ത് പകരുന്നുണ്ട്. വരും ദിവസങ്ങളിലും സൂചികകളുടെ മുന്നേറ്റം തുടർന്നാൽ അത് നിക്ഷേപകർക്ക് നൽകുന്ന ആവേശം വലുതായിരിക്കും.

ദീർഘകാലത്തേക്ക് വാങ്ങാൻ പറ്റിയ 5 ഓഹരികൾ

ദീർഘകാലാടിസ്ഥാനത്തിൽ 34 ശതമാനം വരെ നേട്ടമുണ്ടാക്കുന്ന അഞ്ച് ഓഹരികളാണ് ബ്രോക്കറേജ് മിറേ അസറ്റ് ഷെയർഖാൻ തിരഞ്ഞെടുത്തത്. ഹിന്ദുസ്ഥാൻ കൺസ്ട്രക്ഷൻ കമ്പനി ലിമിറ്റഡ് (എച്ച്സിസി), പിഎൻബി ഹൗസിംഗ്, ട്രാൻസ്പോർട്ട് കോർപ്പറേഷൻ, ജെകെ ലക്ഷ്മി സിമന്‍റ്, പഞ്ചാബ് നാഷണൽ ബാങ്ക് (പിഎൻബി) എന്നിവ ഇതിൽ ഉൾപ്പെടുന്നു. വിശകലന വിദഗ്ധർ നൽകിയ ടാർഗെറ്റ് വിലയും മറ്റ് വിശദാംശങ്ങളും നമുക്ക് പരിശോധിക്കാം.

1. ഹിന്ദുസ്ഥാൻ കൺസ്ട്രക്ഷൻ കമ്പനി ലിമിറ്റഡ്

വൻകിട നിർമ്മാണപ്രവർത്തനങ്ങൾ ഏറ്റെടുത്തു നടത്തുന്ന, മുംബൈ ആസ്ഥാനമായ ഒരു സ്വകാര്യ ലിമിറ്റഡ് കമ്പനിയാണ് ഹിന്ദുസ്ഥാൻ കൺസ്ട്രക്ഷൻ കമ്പനി. ഇന്ത്യയുടെ ജലവൈദ്യുത, ​​സിവിൽ ആണവോർജ്ജ ശേഷികളിൽ കമ്പനിക്ക് കാര്യമായ പങ്കുണ്ട്. എൻഎസ്ഇയിൽ 1.88 ശതമാനം നഷ്ടത്തോടെ 27.59 രൂപ എന്ന നിരക്കിലാണ് ബുധനാഴ്ച എച്ച്സിസി ഓഹരി വ്യാപാരം അവസാനിപ്പിച്ചത്. അഞ്ച് ദിവസത്തിനിടെ 3.33 ശതമാനം നേട്ടമുണ്ടാക്കാൻ ഓഹരിക്ക് സാധിച്ചു.

ടാർഗെറ്റ് വില

33 രൂപ ടാർഗെറ്റ് വിലയോടെ എച്ച്സിസി ഓഹരി വാങ്ങാമെന്നാണ് ഷെയർഖാൻ ശുപാർശ ചെയ്യുന്നത്. അതായത് നിലവിലെ ഓഹരി വിലയുമായി താരതമ്യം ചെയ്യുമ്പോൾ ഏകദേശം 18 ശതമാനത്തോളം നേട്ടം.

2. പിഎൻബി ഹൗസിംഗ്

പഞ്ചാബ് നാഷണൽ ബാങ്കിന്‍റെ ഉപസ്ഥാപനമാണ് പിഎൻബി ഹൗസിംഗ്. കമ്പനി റീട്ടെയിൽ ഉപഭോക്താക്കൾക്ക് ഭവന, ഭവനേതര വായ്പകൾ വാഗ്ദാനം ചെയ്യുന്നു. എൻഎസ്ഇയിൽ 1000 രൂപയാണ് നിലവിൽ പിഎൻബി ഹൗസിംഗ് ഓഹരിയുടെ വില. കഴിഞ്ഞ അഞ്ച് ദിവസത്തിനിടെ 2 ശതമാനം വളർച്ച കൈവരിക്കാൻ ഓഹരിക്ക് സാധിച്ചു. 14.55 ശതമാനം മുന്നേറ്റമാണ് ഒരു മാസത്തിനിടെ ഓഹരി നേടിയത്.

ടാർഗെറ്റ് വില

പിഎൻബി ഹൗസിംഗ് ഫിനാൻസ് ലിമിറ്റഡിന്‍റെ ഓഹരികൾ 1,057 രൂപ ടാർഗെറ്റ് വില നിശ്ചയിച്ച് വാങ്ങാനാണ് ബ്രോക്കറേജ് ശുപാർശ ചെയ്യുന്നത്. അതായത് നിലവിലെ ഓഹരി വിലയുമായി താരതമ്യപ്പെടുത്തുമ്പോൾ ഏകദേശം 5 ശതമാനം നേട്ടം.

3. ട്രാൻസ്പോർട്ട് കോർപ്പറേഷൻ

ലോജിസ്റ്റിക്സ് മേഖലയിൽ ബിസിനസ് ചെയ്യുന്ന സ്മാൾക്യാപ് കമ്പനി. ഇന്ത്യയിലെ മുൻനിര ലോജിസ്റ്റിക്സ്-സപ്ലൈ ചെയിൻ പ്രൊവൈഡർ. മൾട്ടി മോഡൽ ട്രാൻസ്പോർട്ടേഷൻ അടിസ്ഥാനത്തിലുള്ള എൻഡ്-ടു-എൻഡ് സേവനങ്ങൾ നൽകുന്നു. എൻഎസ്ഇയിൽ 1,094.20 രൂപ എന്നതാണ് നിലവിൽ ട്രാൻസ്പോർട്ട് കോർപ്പറേഷൻ ഓഹരിയുടെ വില. കഴിഞ്ഞ ഒരു മാസത്തെ കണക്കെടുത്താൽ ഓഹരിക്ക് നേരിയ നഷ്ടം സംഭവിച്ചിട്ടുണ്ടെന്ന് മനസിലാക്കാം.

ടാർഗെറ്റ് വില

ബ്രോക്കറേജ് ട്രാൻസ്പോർട്ട് കോർപ്പറേഷൻ ഓഫ് ഇന്ത്യയുടെ ഓഹരികൾ 1,400 രൂപ ടാർഗെറ്റ് വിലയോടെ വാങ്ങാനാണ് ശുപാർശ ചെയ്യുന്നത്. ഇതിനർത്ഥം ഓഹരിക്ക് അതിന്‍റെ അവസാന ക്ലോസിംഗ് വിലയിൽ നിന്ന് 27 ശതമാനം വരെ ഉയർച്ചയുണ്ടാകുമെന്നാണ്.

4. ജെ കെ ലക്ഷ്മി സിമന്‍റ്

സിമന്റ് നിർമ്മാണത്തിൽ ഏർപ്പെട്ടിരിക്കുന്ന ഇന്ത്യ ആസ്ഥാനമായുള്ള ഒരു കമ്പനിയാണ് ജെ കെ ലക്ഷ്മി സിമന്റ് ലിമിറ്റഡ്. സിമന്‍റ് ഉൽപ്പന്നങ്ങൾക്ക് പുറമേ, ആർ എം സി, ജിപ്‌സം പ്ലാസ്റ്റർ, വാൾ പുട്ടി, ഓട്ടോക്ലേവ്ഡ് എയറേറ്റഡ് ബ്ലോക്കുകൾ, നിർമ്മാണ രാസവസ്തുക്കൾ, പശകൾ തുടങ്ങിയ നിരവധി മൂല്യവർദ്ധിത ഉൽപ്പന്നങ്ങളും സേവനങ്ങളും കമ്പനി നൽകുന്നു. എൻഎസ്ഇയിൽ 802.80 രൂപ എന്നതാണ് നിലവിൽ സിമന്‍റ് ഓഹരിയുടെ വില.

ടാർഗെറ്റ് വില

ജെ കെ ലക്ഷ്മി സിമന്‍റ് ഓഹരിക്ക് 1,100 രൂപയാണ് ബ്രോക്കറേജ് നൽകിയിരിക്കുന്ന ടാർഗെറ്റ് വില. നിലവിലെ ഓഹരി വിലയുമായി താരതമ്യപ്പെടുത്തുമ്പോൾ ഏകദേശം 34 ശതമാനത്തോളം ലാഭം.

5. പഞ്ചാബ് നാഷണൽ ബാങ്ക്

രാജ്യത്തെ പ്രമുഖ ബാങ്കുകളിലൊന്ന്. എൻഎസ്ഇയിൽ 102.94 രൂപ എന്നതാണ് നിലവിൽ ബാങ്ക് ഓഹരിയുടെ വില. കഴിഞ്ഞ അഞ്ച് ദിവസത്തിനിടെ 4.99 ശതമാനം നേട്ടമുണ്ടാക്കാൻ ഓഹരിക്ക് സാധിച്ചു. 7.31 ശതമാനമാണ് ഒരു മാസത്തെ വളർച്ച.

ടാർഗെറ്റ് വില

മിറേ അസറ്റ് ഷെയർഖാൻ പഞ്ചാബ് നാഷണൽ ബാങ്കിന്‍റെ ഓഹരിക്ക് നൽകിയിരിക്കുന്ന ടാർഗെറ്റ് വില 125 ആണ്. ഇതിനർത്ഥം ഓഹരിക്ക് അതിന്‍റെ അവസാന ക്ലോസിംഗ് വിലയിൽ നിന്ന് 20 ശതമാനം വരെ ഉയർച്ചയുണ്ടാകുമെന്നാണ്.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.