അടുത്ത മൂന്ന് വര്‍ഷത്തിനുള്ളില്‍ 400 വന്ദേഭാരത് ട്രെയിനുകള്‍, നിര്‍ണായക പ്രഖ്യാപനവുമായി ധനമന്ത്രി

ദില്ലി: കേന്ദ്ര ബജറ്റില്‍ നിര്‍ണായക പ്രഖ്യാപനവുമായി ധനമന്ത്രി നിര്‍മല സീതാരാമന്‍. 400 ന്യൂജനറേഷന്‍ വന്ദേഭാരത് ട്രെയിനുകള്‍ അടുത്ത മൂന്ന് വര്‍ഷം കൊണ്ട് പുറത്തിറക്കുമെന്ന് ധനമന്ത്രി വ്യക്തമാക്കി. ഇത് ഏറ്റവും കരുത്തുള്ള ആധുനിക സൗകര്യങ്ങളുള്ള ട്രെയിന്‍ ആയിരിക്കുമെന്നും നിര്‍മല പറഞ്ഞു. ഇതിന് പുറമേ നൂറ് പിഎം ഗാഡി ശക്തി കാര്‍ഗോ ടെര്‍മിനലുകളും അടുത്ത മൂന്ന് വര്‍ഷത്തിനുള്ളില്‍ വികസിപ്പിച്ചെടുക്കും. മെട്രോ സിസ്റ്റം നടപ്പാക്കുന്നതിന് ഏറ്റവും മികച്ച വഴികള്‍ തന്നെ ഉപയോഗിക്കും. കര്‍ഷകര്‍ക്കും ചെറുകിട-ഇടത്തരം സംരംഭകര്‍ക്കായി റെയില്‍വേ പുതിയ ഉല്‍പ്പന്നങ്ങള്‍ വികസിപ്പിച്ചെടുക്കുമെന്നും ധനമന്ത്രി പറഞ്ഞു.

ഒരു സ്റ്റേഷന്‍ ഒരു ഉല്‍പ്പന്നം എന്ന രീതി നടപ്പാക്കാനാണ് സര്‍ക്കാര്‍ തീരുമാനം. ഇത് പ്രാദേശിക വ്യവസായങ്ങളെ സഹായിക്കുന്നതിനും വിതരണ ശൃംഖലയെ ശക്തിപ്പെടുത്തുന്നതിനുമാണെന്ന് നിര്‍മല പറയുന്നു. അതേസമയം തുടര്‍ച്ചയായ രണ്ടാം വര്‍ഷവും മെയ്ഡ് ഇന്‍ ഇന്ത്യ ടാബ്ലെറ്റുമായിട്ടാണ് ധനമന്ത്രി ബജറ്റ് അവതരിപ്പിക്കാന്‍ എത്തിയത്. പരമ്പരാഗതമായി ഉപയോഗിക്കുന്ന ചുവന്ന പെട്ടിയുമായി വരുന്ന സമ്പ്രദായമാണ് ധനമന്ത്രി നേരത്തെ അവസാനിപ്പിച്ചിരുന്നത്. കേന്ദ്ര മന്ത്രിസഭ ബജറ്റിന് അംഗീകാരം നല്‍കുകയും ചെയ്തു. പ്രധാനമന്ത്രിയും, ധനമന്ത്രിയും ആഭ്യന്തര മന്ത്രിയും പ്രതിരോധ മന്ത്രിയും ഒരുമിച്ചുള്ള യോഗത്തിന് ശേഷമാണ് മന്ത്രിസഭാ അംഗീകാരം ലഭിച്ചത്.