പിഎം ഗാഡി ശക്തിയിലൂടെ 60 ലക്ഷം തൊഴിലവസരങ്ങളാണ് മോദി സര്‍ക്കാര്‍ ലക്ഷ്യം, പ്രഖ്യാപിച്ച് ധനമന്ത്രി

ദില്ലി: തൊഴില്‍ മേഖലയ്ക്കായി വമ്പന്‍ പ്രഖ്യാപനങ്ങളുമായി ധനമന്ത്രി നിര്‍മല സീതാരാമന്‍. മോദി സര്‍ക്കാരിന്റെ അടുത്ത ലക്ഷ്യം 60 ലക്ഷം തൊഴിലവസരങ്ങള്‍ സൃഷ്ടിക്കുകയാണെന്ന് ധനമന്ത്രി പ്രഖ്യാപിച്ചു. പിഎം ഗാഡി ശക്തി സമ്പദ് ഘടനയെ മുന്നോട്ട് നയിക്കുമെന്നും, അതിലൂടെ കൂടുതല്‍ തൊഴിലും മറ്റ് അവസരങ്ങളും യുവജനതയ്ക്ക് ലഭിക്കുമെന്ന് നിര്‍മല പറഞ്ഞു. രാജ്യത്തെ യുവജനതയാണ് സര്‍ക്കാര്‍ പ്രത്യേകം ശ്രദ്ധിക്കുന്നത്. യുവജനതയെ കൂടാതെ, സ്ത്രീകള്‍, ദരിദ്രര്‍ എന്നിവരുടെ ഉന്നമനത്തിന് സര്‍ക്കാര്‍ പ്രത്യേകമായി ഫോക്കസ് നല്‍കുമെന്നും ധനമന്ത്രി പ്രഖ്യാപിച്ചു. ഇന്ത്യന്‍ സമ്പദ് രംഗം 9.2 ശമതാനം വളര്‍ച്ചയാണ് ഈ വര്‍ഷം പ്രതീക്ഷിക്കുന്നതെന്നും ധനമന്ത്രി പറഞ്ഞു.

കഴിഞ്ഞ സാമ്പത്തിക വര്‍ഷത്തില്‍ രാജ്യം ഒരുപാട് വളര്‍ച്ച നേടി. അടുത്ത 25 വര്‍ഷമാണ് സര്‍ക്കാരിന്റെ മുന്നിലുള്ളത്. അത് മുന്നില്‍ കണ്ടുള്ള വികസന പദ്ധതികളുടെ ബ്ലൂപ്രിന്റാണ് ഇപ്പോള്‍ തയ്യാറാക്കിയിരിക്കുന്ന ബജറ്റെന്ന് ധനമന്ത്രി അവകാശപ്പെട്ടു. 14 മേഖലകളിലെ പദ്ധതികളിലൂടെ 60 ലക്ഷം തൊഴിലവസരങ്ങള്‍ സൃഷ്ടിക്കാനാണ് ശ്രമം. ഇത് രാജ്യത്ത് മുപ്പത് ലക്ഷം കോടിയുടെ അധിക ഉല്‍പ്പാദനത്തിന് വഴിയൊരുക്കും. നാല് സ്ഥലങ്ങളില്‍ ലോജിസ്റ്റിക് പാര്‍ക്കുകള്‍ നിര്‍മിക്കുമെന്നും നിര്‍മല പറഞ്ഞു. കൊവിഡ് പ്രതിസന്ധി പറഞ്ഞായിരുന്നു ധനമന്ത്രി ബജറ്റ് ആരംഭിച്ചത്.