യൂണിയൻ ബജറ്റ് 23-ന്, ഓഹരി നിക്ഷേപകർ ശ്രദ്ധിക്കേണ്ട മേഖലകൾ ഏതൊക്കെ, വിശദമായി അറിയാം

ഓഹരി വിപണി കൂടുതൽ ഉയരങ്ങളിലേക്ക് കുതിക്കുകയാണ്. വെള്ളിയാഴ്ചത്തെ സെഷനിൽ സെൻസെക്സ് 996.17 പോയിൻ്റ് അഥവാ 1.24 ശതമാനം ഉയർന്ന് എക്കാലത്തെയും ഉയരമായ 80,893.51 ലെത്തി. നിഫ്റ്റി 50-യുടെ കാര്യവും വ്യത്യസ്തമല്ല. സൂചിക 276.25 പോയിൻ്റ് അഥവാ 1.13 ശതമാനം ഉയർന്ന് 24,592.20 എന്ന പുതിയ ഉയരത്തിലെത്തി. കുതിപ്പ് വരും ദിവസങ്ങളിലും തുടരുമോ എന്നാണ് നിക്ഷേപകർ ഉറ്റ് നോക്കുന്നത്.

ബജറ്റ് അവതരണം 23-ന്

ജൂലൈ 23-നാണ് കേന്ദ്രമന്ത്രി നിർമ്മലാ സീതാരാമൻ യൂണിയൻ ബജറ്റ് അവതരിപ്പിക്കുന്നത്. അതായത് വെറും ആറ് സെഷനുകൾ മാത്രം അകലെയാണ് ബജറ്റ് ദിവസം. വലിയ പ്രഖ്യാപനങ്ങൾ ബജറ്റിലുണ്ടാകുമെന്നാണ് പൊതുവിൽ വിലയിരുത്തുന്നത്. ബജറ്റ് ദിവസം അടുത്തെത്തിയ സാഹചര്യത്തിൽ ഇൻട്രാഡേ നിക്ഷേപകർ വരുന്ന ആഴ്ചയിൽ കൂടുതൽ ജാഗ്രത പുലർത്തണം.

ഏതൊക്കെ മേഖലകളിൽ ശ്രദ്ധിക്കണം

കേന്ദ്ര ധനമന്ത്രി നിർമ്മല സീതാരാമൻ വളർച്ചാ കേന്ദ്രീകൃത ബജറ്റ് അവതരിപ്പിക്കുമെന്നാണ് മാർക്കറ്റ് വിദഗ്ധരുടെ അഭിപ്രായം. അതിനാൽ, ഇൻഫ്രാസ്ട്രക്ചർ, ബാങ്കിംഗ്, ഓട്ടോ, കൺസ്യൂമർ ഡ്യൂറബിൾ സെഗ്‌മെൻ്റുകൾ എന്നിവയിൽ വലിയ കുതിപ്പുണ്ടാകാനുള്ള സാധ്യതയുണ്ട്. അതോടൊപ്പം 2025 സാമ്പത്തിക വർഷത്തിലെ കമ്പനികളുടെ ആദ്യ പാദഫലവും അടുത്ത ആഴ്ച പുറത്ത് വരുമെന്ന കാര്യവും പ്രത്യേകം ശ്രദ്ധിക്കണം. അതുകൊണ്ടു തന്നെ മുകളിൽ സൂചിപ്പിച്ച സെഗ്‌മെൻ്റുകൾക്ക് പ്രത്യേക ഊന്നൽ നൽകി സ്റ്റോക്ക്-നിർദ്ദിഷ്ട സമീപനം നിലനിർത്തണമെന്നാണ് വിദഗ്ധരുടെ ശുപാർശ.

സൂചികകളുടെ ചാഞ്ചാട്ടം തുടരും

ബജറ്റ് അവതരണ ദിവസം വരെ ഓഹരി വിപണിയുടെ ചാഞ്ചാട്ടം വർധിക്കാനുള്ള സാധ്യതയുണ്ടെന്നാണ് പേസ് 360-ന്‍റെ സഹസ്ഥാപകനും ചീഫ് ഗ്ലോബൽ സ്ട്രാറ്റജിസ്റ്റുമായ അമിത് ഗോയൽ വിലയിരുത്തുന്നത്. ബജറ്റിന് മുമ്പ് ഓഹരികളിലെ കാര്യമായ ചാഞ്ചാട്ടം അവസരങ്ങൾ സൃഷ്ടിക്കുകയും അപകടസാധ്യതകൾ വർദ്ധിപ്പിക്കുകയും ചെയ്യും. ഈ പ്രീ-ബജറ്റ് കാലയളവിൽ, ബജറ്റിന് ശേഷമുള്ള വർദ്ധനവ് പ്രതീക്ഷിച്ച്, ബജറ്റിൽ നിന്ന് പ്രയോജനം ലഭിക്കുന്ന മേഖലകളിലെ ഓഹരികൾ വാങ്ങുന്നത് നല്ലതാണെന്നും അമിത് ഗോയൽ പറഞ്ഞു.

വർധിച്ച ചാഞ്ചാട്ടം ഹ്രസ്വകാല ഓപ്‌ഷൻ വ്യാപാരികൾക്ക് അവസരങ്ങൾ പ്രദാനം ചെയ്യും. അവർ രണ്ട് ദിശകളിലെയും വിലയിലെ ചാഞ്ചാട്ടം മുതലാക്കാൻ സ്‌ട്രാഡിൽസ് അല്ലെങ്കിൽ സ്‌ട്രാങ്കിൾസ് പോലുള്ള തന്ത്രങ്ങൾ ഉപയോഗിക്കാനും അദ്ദേഹം നിർദ്ദേശിച്ചു.

ബാങ്കിംഗ്, ഓട്ടോ മേഖലകളിൽ കുതിപ്പിന് സാധ്യത

24 സാമ്പത്തിക വർഷത്തിൽ ഇന്ത്യൻ സമ്പദ്‌വ്യവസ്ഥ മികച്ച പ്രകടനം കാഴ്ചവച്ചതിനാൽ മോദി 3.0 സർക്കാർ അവസാനത്തോടെ 10 ട്രില്യൺ ഡോളർ ലക്ഷ്യം കൈവരിക്കാൻ പ്രതിജ്ഞാബദ്ധമാണ്. അടുത്ത അഞ്ച് വർഷത്തേക്ക്, ധനക്കമ്മി നിയന്ത്രണത്തിലാക്കുന്നതിൽ കേന്ദ്രമന്ത്രി ബജറ്റിലൂടെ ശ്രമിക്കുമെന്നാണ് പ്രോഫിറ്റ്‌മാർട്ട് സെക്യൂരിറ്റീസ് റിസർച്ച് ഹെഡ് അവിമാഷ് അഭിപ്രായപ്പെട്ടത്. അങ്ങനെയെങ്കിൽ, ഗവൺമെൻ്റിൻ്റെ വരുമാനം കുതിച്ചുയരുമെന്ന് പ്രതീക്ഷിക്കുന്നു, ഇത് ബാങ്കിംഗ്, ഓട്ടോ സെഗ്‌മെൻ്റ് ഓഹരികൾക്ക് ഗുണമാകും. വർദ്ധിച്ചുവരുന്ന വരുമാനത്തിൻ്റെ പശ്ചാത്തലത്തിൽ, ഒരാളുടെ ചെലവ് വർദ്ധിക്കുമെന്ന് പ്രതീക്ഷിക്കുന്നു. ഇത് ഉപഭോക്തൃ ഡ്യൂറബിൾ കമ്പനികൾക്ക് ഗുണം ചെയ്യുമെന്ന് പ്രതീക്ഷിക്കുന്നുന്നതായും അദ്ദേഹം പറഞ്ഞു.

തൊഴിൽ അവസരങ്ങൾ സൃഷ്ടിക്കാനുള്ള പ്രഖ്യാപനങ്ങളും ബജറ്റിലുണ്ടായേക്കാം. അങ്ങനെയെങ്കിൽ ഇൻഫ്രാസ്ട്രക്ചർ വിഭാഗം നേട്ടത്തിലേക്കുയരും. അതുകൊണ്ടു തന്നെ ബജറ്റിന് മുൻപ് മുകളിൽ സൂചിപ്പിച്ച വിഭാഗങ്ങളിൽ നിന്നുള്ള ഓഹരികളിൽ ശ്രദ്ധ പുലർത്തണമെന്നും അവിമാഷ് കൂട്ടിച്ചേർത്തു.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.