8239 കോടിയുടെ ബാങ്ക് തട്ടിപ്പ്; പരാതിയുമായി എസ്ബിഐയും കാനറ ബാങ്കും, കേസെടുത്ത് സിബിഐ

ചെന്നൈ: ഹൈദരാബദിലും ചെന്നൈയിലും പ്രവര്‍ത്തിക്കുന്ന രണ്ട് സ്ഥാപനങ്ങള്‍ക്കെതിരെ ബാങ്ക് തട്ടിപ്പിന് കേസെടുത്ത് സിബിഐ. ഹൈദരാബാദിലെ ട്രാന്‍സ്റ്റോറി ഇന്ത്യ ലിമിറ്റഡ് എന്ന കമ്പനിക്കെതിരെ 7,929 രൂപയുടെ തട്ടിപ്പും ചെന്നൈ ആസ്ഥാനമാക്കി പ്രവര്‍ത്തിക്കുന്ന ആഗ്‌നറ്റ് എഡ്യൂക്കേഷന്‍ ലിമിറ്റഡിനെതിരെ 313.79 കോടിയുടെ തട്ടിപ്പിനുമാണ് ഇപ്പോള്‍ കേസ് രജിസ്റ്റര്‍ ചെയ്തിരിക്കുന്നത്. എസ്ബിഐ, കാനറ ബാങ്ക് എന്നീ ബാങ്കുകള്‍ നല്‍കിയ പരാതികളുടെ പശ്ചാത്തലത്തിലാണ് കേസ്.

ബാങ്കിന്റെ പരാതിയെ തുടര്‍ന്ന് കഴിഞ്ഞ ദിവസങ്ങളില്‍ ചെന്നൈയിലും, ഹൈദരാബാദിലും സിബിഐ വ്യാപകമായ റെയിഡ് നടത്തിയിരുന്നു. ഇതില്‍ നിരവധി രേഖകള്‍ കണ്ടെടുത്തിട്ടുണ്ട്. രണ്ട് കമ്പനികളുടെയും അക്കൗണ്ടുകള്‍ എന്‍പിഎകളായി പ്രഖ്യാപിച്ചിട്ടുണ്ട്. വജ്ര വ്യാപാരി നീരവ് മോദി നടത്തിയ തട്ടിപ്പിനേക്കാള്‍ വലിയ തട്ടിപ്പാണ് ട്രാന്‍സ്റ്റോറി ഇന്ത്യ ലിമിറ്റഡ് നടത്തിയതെന്നാണ് ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്യുന്നത്.

ഹൈവേകളുടെയും പാലങ്ങളുടെയും മെട്രോ നിര്‍മ്മാണ പ്രവര്‍ത്തനങ്ങള്‍ക്കും നേതൃത്വം നല്‍കുന്ന കമ്പനിയാണ് ട്രാന്‍ സ്റ്റോറി. കൂടാതെ ഇവര്‍ക്ക് ഓയില്‍ ഗ്യാസ് രംഗത്ത് പ്രവര്‍ത്തിക്കുന്ന സ്ഥാപനവും ഉണ്ട്. കാനറ ബാങ്ക് നേതൃത്വം നല്‍കുന്ന ബാങ്ക് കണ്‍സോര്‍ഷ്യത്തില്‍ നിന്നും ഈ കമ്പനിക്ക് വായ്പ സൗകര്യം ലഭിച്ചിരുന്നു. ഇതുവഴിയാണ് തട്ടിപ്പ് എന്നാണ് സിബിഐക്ക് നല്‍കിയ പരാതിയില്‍ പറുന്നത്.