ഉപഭോക്തൃ ആത്മവിശ്വാസം തകര്‍ന്നു, സമ്പദ്‌വ്യവസ്ഥ 1.5% ഇടിഞ്ഞേക്കാം: ആര്‍ബിഐ സര്‍വേ

കൊവിഡ് 19 മഹാമരിക്കിടയില്‍ ഉപഭോക്തൃ ആത്മവിശ്വാസം തകര്‍ന്നെന്നും, ഇത് 2020-21 കാലയളവില്‍ സമ്പദ്‌വ്യവസ്ഥ 1.5 ശതമാനം ചുരുക്കാന്‍ ഇടയാക്കുമെന്നും റിസര്‍വ് ബാങ്ക് പുറത്തുവിട്ട സര്‍വേ കണക്കുകള്‍ വ്യക്തമാക്കുന്നു. 'നിലവിലെ സാഹചര്യ സൂചിക (സിഎസ്‌ഐ) ചരിത്രപരമായ താഴ്ന്ന നിലയിലെത്തിയതോടെ ഒരു വര്‍ഷം മുമ്പുള്ള ഫ്യൂച്ചര്‍ എക്‌സ്പക്‌റ്റേഷന്‍സ് സൂചികയും (എഫ്ഇഐ) കുത്തനെയുള്ള ഇടിവ് രേഖപ്പെടുത്തി, അശുഭാപ്തി മേഖലയിലേക്ക് പ്രവേശിച്ചു,' റിസര്‍വ് ബാങ്ക് പുറത്തുവിട്ട ഉപഭോക്തൃ ആത്മവിശ്വാസ സര്‍വേ കണക്കുകള്‍ പറയുന്നു.

മറ്റൊരു സര്‍വേ പ്രകാരം, നടപ്പ് സാമ്പത്തിക വര്‍ഷത്തില്‍ ജിഡിപി 1.5 ശതമാനം ചുരുങ്ങാന്‍ സാധ്യതയുണ്ടെന്ന് അറിയിക്കുന്നു. എന്നിരുന്നാലും അടുത്ത സാമ്പത്തിക വര്‍ഷം കൂടുതല്‍ മെച്ചപ്പെടുമെന്ന് പ്രതീക്ഷയുണ്ട്. ' 2020-21 കാലയളവില്‍ യഥാര്‍ത്ഥ മൊത്ത ആഭ്യന്തര ഉത്പാദനം (ജിഡിപി) 1.5 ശതമാനം ഇടിയാന്‍ സാധ്യതയുണ്ട്. എന്നാല്‍, അടുത്ത വര്‍ഷമിത് 7.2 ശതമാനം വളര്‍ച്ച കൈവരിച്ച് മേഖലയിലേക്ക് തിരിച്ചുവരും,' സര്‍വേ ഓഫ് പ്രൊഫഷണല്‍ പ്രവചകര്‍ പറയുന്നു.

യഥാര്‍ത്ഥ സ്വകാര്യ അന്തിമ ഉപഭോഗച്ചെലവ് (പിഎഫ്‌സിഇ) 2020-21 കാലയളവില്‍ 0.5 ശതമാനം കുറയുമെന്നാണ് പ്രതീക്ഷിക്കുന്നതെങ്കിലും അടുത്ത സാമ്പത്തിക വര്‍ഷത്തില്‍ ഇത് 6.9 ശതമാനം രേഖപ്പെടുത്തുമെന്ന് സര്‍വേ റിപ്പോര്‍ട്ടുകള്‍ പറയുന്നു. യഥാര്‍ത്ഥ മൊത്ത സ്ഥിര മൂലധന രൂപീകരണം (ജിഎഫ്‌സിഎഫ്) 2020-21 -ല്‍ 6.4 ശതമാനം നെഗറ്റീവ് വളര്‍ച്ച രേഖപ്പെടുത്താന്‍ സാധ്യതയുണ്ടെങ്കിലും 2021-22 -ല്‍ 5.6 ശതമാനം വളര്‍ച്ച നേടുമെന്നാണ് പ്രതീക്ഷ.

യഥാര്‍ത്ഥ മൊത്ത മൂല്യവര്‍ദ്ധനവ് (ജിവിഎ) ഈ സാമ്പത്തിക വര്‍ഷത്തില്‍ 1.7 ശതമാനം കുറയുമെന്നും പ്രതീക്ഷിക്കുന്നു. എന്നാല്‍, 2021-22 -ല്‍ 6.8 ശതമാനം വളര്‍ച്ച രേഖപ്പെടുത്തുമെന്നും വ്യാവസായിക, സേവന മേഖലയിലെ വര്‍ധനവാണ് ഇതിന്റെ പിന്തുണയെന്ന് 24 പാനലിസ്റ്റുകളുടെ പ്രതികരണത്തെ അടിസ്ഥാനമാക്കിയുള്ള എസ്പിഎഫ് സര്‍വേ പറയുന്നുണ്ട്. പൊതു സാമ്പത്തിക സ്ഥിതി, തൊഴില്‍ സാഹചര്യം, ഗാര്‍ഗിക വരുമാനം എന്നിവയെക്കുറിച്ചുള്ള ഉപഭോക്തൃ ധാരണ സങ്കോചമേഖലയിലേക്ക് ആഴത്തില്‍ പതിച്ചു.

അതേസമയം, പൊതു സാമ്പത്തിക സ്ഥിതി, വരും വര്‍ഷത്തെ തൊഴില്‍ സാഹചര്യങ്ങള്‍ എന്നിവയെക്കുറിച്ചുള്ള പ്രതീക്ഷകളും അശുഭാപ്തിവിശ്വാസത്തിലായിരുന്നുവെന്ന് സിസിഎസ് അഭിപ്രായപ്പെട്ടു. കൊവിഡ് 19 മഹാമാരി കണക്കിലെടുത്ത്, 2020 മെയ് 5-17 തീയതികളില്‍ അഹമ്മദാബാദ്, ബെംഗളൂരു, ചെന്നൈ, ദില്ലി, ഹൈദരാബാദ്, കൊല്‍ക്കത്ത, ലഖ്‌നൗ, മുംബൈ, പാട്‌ന എന്നിവയുള്‍പ്പടെ രാജ്യത്തെ 13 പ്രധാന നഗരങ്ങളില്‍ ടെലിഫോണ്‍ അഭിമുഖങ്ങളിലൂടെയാണ് സര്‍വേ നടത്തിയത്.