കൊവിഡ് കാലത്തെ ക്രിസ്തുമസ് വിപണിയില്‍ താരമായി 'കൊറോണ നക്ഷത്രം'; വന്‍ ഡിമാന്‍ഡെന്ന് വ്യാപാരികള്‍

കൊച്ചി: ഈ കൊവിഡ് കാലത്തെ ക്രിസ്തുമസ് വിപണിയില്‍ താരമായി കൊറോണ നക്ഷത്രങ്ങള്‍. കൊറോണ വൈറസിന്റെ മാതൃകയിലുള്ള എല്‍ഇഡി നക്ഷത്രങ്ങളാണ് ഇപ്പോള്‍ താരമായിരിക്കുന്നത്. വില അല്‍പ്പം കൂടുതലാണെങ്കിലും ആവശ്യക്കാര്‍ ഏറെയാണെന്നാണ് കച്ചവടക്കാര്‍ പറയുന്നത്. 840 രൂപയാണ് ഈ നക്ഷത്രത്തിന്റെ വില. കൊറോണ നക്ഷത്രത്തെ കൂടാതെ എല്‍ഇഡി നക്ഷത്രങ്ങള്‍ക്കും ആവശ്യക്കാര്‍ ഏറെയാണെന്നാണ് കച്ചവടക്കാര്‍ പറയുന്നത്.

200 രൂപ മുതല്‍ 300 വരെയുള്ള നക്ഷത്രങ്ങള്‍ക്കാണ് ഏറ്റവും കൂടുതല്‍ ഡിമാന്‍ഡ്. പണ്ട് കാലത്ത് കടലാസ് നക്ഷത്രങ്ങള്‍ക്കുള്ളില്‍ ബള്‍ബ് ഫിറ്റ് ചെയ്യുന്നതായിരുന്നു വിപണി കീഴടക്കിയത്. എന്നാല്‍ ഇപ്പോള്‍ ടെക്‌നോളജി മാറിയതോടെ വ്യത്യസ്ത മോഡലുകള്‍ വിപണികള്‍ കീഴടക്കി. 10 മുതല്‍ 280 രൂപ വരെയാണ് കടലാസ് നക്ഷത്രങ്ങളുടെ വില. ചൈനീസ് നിര്‍മ്മിത നക്ഷത്രങ്ങളും മാര്‍ക്കറ്റില്‍ ഇടം പിടിച്ചെങ്കിലും വെളിച്ചം കൂടുതലുള്ളവയ്ക്കാണ് ആവശ്യക്കാര്‍ ഏറെ.

നക്ഷത്രങ്ങളെ കൂടാതെ ക്രിസ്തുമസ് ട്രീ, സാന്താക്ലോസിന്റെ മുഖംമൂടി, ക്രിസ്തുമസ് ട്രീക്ക് ആവശ്യമായ അലങ്കാര വസ്തുക്കള്‍, പുല്‍ക്കൂട്, പുല്‍ക്കൂട് സെറ്റ്, വേഷങ്ങള്‍, എല്‍ഇഡി ലൈറ്റിന്റെ ക്രിസ്മസ് തൊപ്പി എന്നിവയും വിപണി കീഴടക്കുന്നുണ്ട്. ചൈനീസ് ഉല്‍പന്നങ്ങളാണ് ഇവയില്‍ ഏറ്റവും കൂടുതലുള്ളത്.