കൊവിഡ് രണ്ടാം തരംഗം സമ്പദ്ഘടനയുടെ തിരിച്ചുവരവിനെ അട്ടിമറിക്കുമെന്ന് റിസര്‍വ്വ് ബാങ്ക് ഗവര്‍ണര്‍

മുംബൈ: കൊവിഡ് രണ്ടാം തരംഗം ഉണ്ടാവുകയാണെങ്കില്‍ അത് രാജ്യത്തിന്റെ സാമ്പത്തിക തിരിച്ചുവരവിനെ പ്രതികൂലമായി ബാധിക്കുമെന്ന് റിസര്‍വ് ബാങ്ക് ഗവര്‍ണര്‍ ശക്തികാന്ത ദാസ്. കൊവിഡ് പ്രതിസന്ധികളെ മറികടക്കാന്‍ വര്‍ഷങ്ങള്‍ വേണ്ടിവന്നേക്കും എന്നാണ് റിസര്‍വ് ബാങ്ക് ഡെപ്യൂട്ടി ഗവര്‍ണര്‍ എംഡി പത്ര അഭിപ്രായപ്പെട്ടത്.

കൊവിഡ് വ്യാപനം ഇന്ത്യന്‍ സമ്പദ് ഘടനയെ അതിരൂക്ഷമായി ബാധിച്ചിട്ടുണ്ട്. ഈ സാമ്പത്തിക വര്‍ഷത്തിന്റെ ആദ്യ പാദത്തില്‍ ഇന്ത്യയുടെ ജിഡിപ് 23.9 ശതമാനം ചുരുങ്ങി. ലോക്ക് ഡൗണ്‍ നിയന്ത്രണങ്ങളായിരുന്നു ഇത്രയും വലിയ ഇടിവിന് കാരണമായത്. എന്നാല്‍ അതിന് ശേഷവും രാജ്യം സാമ്പത്തിക വളര്‍ച്ചയുടെ കാര്യത്തില്‍ വലിയ പുരോഗതി നേടിയിട്ടില്ല.

സാമ്പത്തിക മാന്ദ്യത്തെ മറികടക്കാന്‍ കേന്ദ്ര സര്‍ക്കാര്‍ കൊണ്ടുവന്ന പാക്കേജുകള്‍ ഒന്നും വേണ്ട വിധത്തില്‍ ഗുണം ചെയ്തിട്ടില്ല എന്നാണ് റിപ്പോര്‍ട്ടുകള്‍. എന്തായാലും രാജ്യത്ത് കൊവിഡ് വ്യാപനത്തിന്റെ തോത് കുറയുന്നുണ്ട് എന്നത് ആശ്വാസകരമാണ്.

ആഗോളതലത്തില്‍ വലിയ സാമ്പത്തിക മാന്ദ്യത്തിനാണ് കൊവിഡ് വഴിവച്ചത്. യാത്രാ നിയന്ത്രണങ്ങള്‍ വന്നതോടെ ക്രൂഡ് ഓയില്‍ വിലയും കുത്തനെ ഇടിഞ്ഞു. അമേരിക്കയില്‍ കൊവിഡ് അതിരൂക്ഷമായി പടര്‍ന്നുപിടിച്ചതും വലിയ പ്രതിസന്ധിയ്ക്ക് വഴിവച്ചു. ചൈന മാത്രമാണ് ഈ പ്രതിസന്ധിയില്‍ പിടിച്ചുനിന്നു എന്ന് പറയാവുന്നത്.

കയറ്റുമതി വര്‍ദ്ധന സമ്പദ് ഘടനയുടെ വളര്‍ച്ചയ്ക്ക് ഗുണകരമാകും എന്നാണ് എംഡി പത്ര പറയുന്നത്. എന്നാല്‍ ആഗോള തലത്തില്‍ ഈ വര്‍ഷം 9.2 ശതമാനം വ്യാപാര ഇടിവുണ്ടാകും എന്നാണ് ലോക വ്യാപാര സംഘടന തന്നെ കണക്കാക്കുന്നത്.