ക്രെഡിറ്റ് സ്വീസ് പ്രതിസന്ധി; കടപുഴകി ആഗോള വിപണികള്‍, സ്വര്‍ണവില കുതിച്ചുയരുന്നു

ആദ്യം അമേരിക്കയിലെ സിലിക്കണ്‍ വാലി ബാങ്ക്. തുടര്‍ന്ന് സിഗ്നേച്ചര്‍ ബാങ്ക്. ഇപ്പോഴിതാ, യൂറോപ്പിലെ ഇന്‍വെസ്റ്റ്‌മെന്റ് ബാങ്കായ ക്രെഡിറ്റ് സ്വീസും തകര്‍ച്ചയുടെ വക്കില്‍ കിടന്ന് കയ്യിട്ടടിക്കുകയാണ്. സിലിക്കണ്‍ വാലി ബാങ്കിന്റെ തകര്‍ച്ചയെ തുടര്‍ന്നുള്ള പരിഭ്രാന്തി ഒരുവിധം കെട്ടടങ്ങിയെന്ന് കരുതിയിരിക്കുമ്പോഴാണ് ക്രെഡിറ്റ് സ്വീസിന്റെ ഓഹരി വില 24.24 ശതമാനം ഇടിയുന്നത്.

ബുധനാഴ്ച്ച സൂറിച്ച് ആസ്ഥാനമായ ക്രെഡിറ്റ് സ്വീസിന് കൂടുതല്‍ ധനസഹായം നല്‍കില്ലെന്ന് സൗദി നാഷണല്‍ ബാങ്ക് അറിയിച്ച സാഹചര്യം നിക്ഷേപകരുടെ ആധി കൂട്ടി. ക്രെഡിറ്റ് സ്വീസിലെ ഏറ്റവും വലിയ നിക്ഷേപകരാണ് സൗദി നാഷണല്‍ ബാങ്ക്. ഇതേസമയം, ക്രെഡിറ്റ് സ്വീസിന് ആവശ്യമെങ്കില്‍ പിന്തുണ നല്‍കാമെന്ന് സ്വിസ് നാഷണല്‍ ബാങ്ക് പ്രഖ്യാപിച്ചിട്ടുണ്ട്. ക്രെഡിറ്റ് സ്വീസ് പ്രതിസന്ധി അമേരിക്കന്‍ ബാങ്കുകളെ ബാധിക്കുമോയെന്ന് യുഎസ് ട്രഷറി ഡിപ്പാര്‍ട്ട്‌മെന്റ് സൂക്ഷ്മമായി നിരീക്ഷിച്ചുവരികയാണ്.

സംഭവം അറിയേണ്ട താമസം യൂറോപ്പിലെ മാര്‍ക്കറ്റുകള്‍ ചീട്ടുകൊട്ടാരം കണക്കെ വീണു. ബാങ്കിങ് ഓഹരികള്‍ 7 ശതമാനം തകര്‍ന്നതോടെ സ്‌റ്റോക്‌സ് 600 സൂചിക 2.92 ശതമാനം ഇടറി. ബിഎന്‍പി പാരിബാസ് (-10.11%), സോഷ്യറ്റ് ജനറല്‍ (-12.18%), ഡച്ച് ബാങ്ക് (-5.17%) തുടങ്ങിയ പ്രമുഖര്‍ക്ക് വന്‍വില്‍പ്പനയെ ചെറുത്തുനില്‍ക്കാനായില്ല. രൂക്ഷമായ 'രക്തച്ചൊരിച്ചില്‍' മുന്‍നിര്‍ത്തി പല ബാങ്ക് ഓഹരികളുടെയും വ്യാപാരം താത്കാലികമായി നിര്‍ത്തിവെയ്‌ക്കേണ്ട സാഹചര്യം കൂടി യൂറോപ്യന്‍ വിപണികളില്‍ ഉടലെടുത്തു.

എന്തായാലും ബാങ്കിങ് രംഗത്തെ വന്‍മരങ്ങള്‍ കടപുഴകുമ്പോള്‍ സുരക്ഷിത നിക്ഷേപമായ സ്വര്‍ണത്തിലേക്ക് ആളുകള്‍ നോട്ടം തിരിക്കുകയാണ്. ബുധനാഴ്ച്ചത്തെ ബഹളത്തിനിടെ സ്വര്‍ണവില ആറാഴ്ച്ചയിലെ ഏറ്റവും ഉയര്‍ന്ന നിലയിലേക്ക് എത്തി (1,900 ഡോളര്‍). ഇന്ത്യയില്‍ കഴിഞ്ഞ 24 മണിക്കൂറിനിടെ 24/22 കാരറ്റ് സ്വര്‍ണത്തിന് 300 രൂപ വരെ വര്‍ധിച്ചിട്ടുണ്ട്. വ്യാഴാഴ്ച്ച 10 ഗ്രാം 24 കാരറ്റ് സ്വര്‍ണത്തിന് 57,900 രൂപയാണ് വില. 10 ഗ്രാം 22 കാരറ്റ് സ്വര്‍ണത്തിന് വില 53,040 രൂപയും.