ചെറിയ തെറ്റിന് എസ്ബിഐ നൽകിയത് 1.7 ലക്ഷം രൂപ, കേസ് ജയിച്ചത് ഡൽഹി സ്വദേശിനി, സംഭവം അറിയാം

രാജ്യത്തെ ഏറ്റവും വലിയ ബാങ്കാണ് സ്റ്റേറ്റ് ബാങ്ക് ഓഫ് ഇന്ത്യ. ആ ബാങ്കിനെതിരായ നിയമ യുദ്ധത്തിൽ വിജയം നേടിയിരിക്കുകയാണ് യുവതി. 15 വർഷം നീണ്ടുനിന്ന നിയമയുദ്ധത്തിലൂടെയാണ് 1.7 ലക്ഷം രൂപ നഷ്ടപരിഹായമായി ഡൽഹി സ്വദേശിനിയായ ശർമ്മ നേടിയത്. ബാങ്ക് അക്കൗണ്ടിൽ ആവശ്യത്തിന് പണമുണ്ടായിട്ടും ബാങ്ക് തെറ്റായി ഇസിഎസ് (ഇലക്ട്രോണിക് ക്ലിയറിങ് സർവീസ്) ബൗൺസ് ചാർജുകൾ ഈടാക്കിയതായി കണ്ടെത്തിയതിനെ തുടർന്നാണ് ഡൽഹി സംസ്ഥാന ഉപഭോക്തൃ തർക്ക പരിഹാര കമ്മീഷൻ, എസ്‌ബി‌ഐക്ക് പിഴയിട്ടത്.

എന്താണ് സംഭവിച്ചത്...?

ശർമ്മ എച്ച്ഡിഎഫ്‌സി ബാങ്കിൽ നിന്ന് കാർ ലോൺ എടുത്ത് എസ്‌ബി‌ഐയിലെ സേവിംഗ്‌സ് അക്കൗണ്ടിൽ നിന്ന് പ്രതിമാസ ഇഎംഐ കുറയ്ക്കാൻ തീരുമാനിക്കുകയും അതിനുള്ള കാര്യങ്ങൾ ശരിയാക്കുകയും ചെയ്തു. എന്നാൽ അവരുടെ 11 ഇഎംഐ പേയ്‌മെന്റുകൾ ബൗൺസ് ആയി. ഓരോന്നിനും എസ്‌ബി‌ഐ അവരിൽ നിന്ന് 400 രൂപ ഈടാക്കി. എന്നാൽ തന്‍റെ ബാങ്ക് അക്കൗണ്ടിൽ എല്ലായ്പ്പോഴും മതിയായ ബാലൻസ് ശർമ്മ നിലനിർത്തിയിരുന്നു. വിവരം ബാങ്ക് അധികൃതരെ അറിയിക്കുകയും തെളിവായി ബാങ്ക് സ്റ്റേറ്റ്‌മെന്‍റ് പ്രിന്റ് എടുത്ത് ബാങ്കിൽ സമർപ്പിക്കുകയും ചെയ്തു. എന്നാൽ ബൗൺസ് ചെയ്ത ചാർജുകൾ തിരികെ നൽകാൻ എസ്‌ബി‌ഐ വിസമ്മതിച്ചു.

നിയമ നടപടിയിലേക്ക്

എസ്ബിഐ അധികൃതർ അനുകൂലമായ നടപടി സ്വീകരിക്കാതിരുന്നതോടെ ശർമ്മ 2010-ൽ ജില്ലാ ഉപഭോക്തൃ കമ്മീഷനിൽ പരാതി നൽകി. പക്ഷേ അവരുടെ അവകാശവാദം തള്ളി. തുടർന്ന് അവർ ദേശീയ ഉപഭോക്തൃ തർക്ക പരിഹാര കമ്മീഷനിൽ (എൻ‌സി‌ഡി‌ആർ‌സി)അപ്പീൽ നൽകി. കേസ് ഡൽഹി സംസ്ഥാന ഉപഭോക്തൃ കമ്മീഷനിലേക്ക് മാറ്റി. ഇലക്ട്രോണിക് ക്ലിയറിങ് സർവീസ് മാൻഡേറ്റിൽ നൽകിയിരിക്കുന്ന വിവരങ്ങൾ തെറ്റാണെന്നും ഇത് സ്ത്രീയുടെ ചെക്കുകൾ ബൗൺസ് ആകുന്നതിലേക്ക് നയിച്ചുവെന്നും എസ്ബിഐ വാദിച്ചു.

എന്നാൽ എസ്ബിഐയുടെ വാദം അടിസ്ഥാനരഹിതമാണെന്ന് ഡൽഹി സംസ്ഥാന ഉപഭോക്തൃ തർക്ക പരിഹാര കമ്മീഷൻ വിലയിരുത്തി. എച്ച്‌ഡി‌എഫ്‌സി ബാങ്ക് തെറ്റായ മാൻഡേറ്റ് നമ്പർ നൽകിയതിനാൽ ശർമ്മയുടെ അക്കൗണ്ട് കണ്ടെത്താനായില്ല എന്ന എസ്‌ബി‌ഐയുടെ വാദത്തിൽ യാതൊരു അടിസ്ഥാനവുമില്ല എന്ന് ഡൽഹി സംസ്ഥാന ഉപഭോക്തൃ കമ്മീഷൻ പറഞ്ഞു.

കുറഞ്ഞ ബാലൻസിന്റെയോ തെറ്റായ ഇസിഎസ് വിശദാംശങ്ങളുടെയോ തെളിവ് എസ്‌ബി‌ഐ നൽകിയിട്ടില്ല. ലോൺ അക്കൗണ്ടിന്റെ പ്രസ്താവനയിൽ നിന്ന് വ്യക്തമാകുന്നതുപോലെ, ശർമ്മ സമർപ്പിച്ച ഇസിഎസ് മാൻഡേറ്റ് ഫോമിൽ എസ്‌ബി‌ഐ കൃത്യമായി നടപടി സ്വീകരിച്ചുവെന്നും ഇസി‌എസ് വഴി കുറച്ച് ഇഎം‌ഐകൾ ക്ലിയർ ചെയ്‌തുവെന്നും ഡൽഹി സംസ്ഥാന ഉപഭോക്തൃ കമ്മീഷൻ പറഞ്ഞു.

സ്ത്രീയുടെ അക്കൗണ്ടിൽ ആവശ്യത്തിന് പണമുണ്ടായിരുന്നിട്ടും എസ്‌ബി‌ഐ തെറ്റായി ഇസി‌എസ് (ഇലക്ട്രോണിക് ക്ലിയറിങ് സർവീസ്) ബൗൺസ് ചാർജുകൾ ഈടാക്കിയതായി കമ്മീഷൻ വിധിക്കുകയും ഉപഭോക്താവിനോട് ഈ തുക അടയ്ക്കാൻ ഉത്തരവിടുകയും ചെയ്തു. ഉപഭോക്താക്കൾക്ക് നീതി നൽകുന്നതിൽ ഉപഭോക്തൃ കമ്മീഷനുകളുടെ പങ്ക് ഈ കേസ് എടുത്തുകാണിക്കുന്നു.