2019-20 സാമ്പത്തിക വർഷത്തെ ടിഡിഎസ് / ടിസിഎസ് സ്റ്റേറ്റ്‌മെന്റ് സമർപ്പിക്കാനുള്ള തീയതി നീട്ടി

2019-20 സാമ്പത്തിക വർഷത്തേക്കുള്ള ടിഡിഎസ് / ടിസിഎസ് സ്റ്റേറ്റ്‌മെന്റുകൾ നൽകാനുള്ള സമയപരിധി നീട്ടിയതായി ആദായ നികുതി വകുപ്പ് അറിയിച്ചു. 2020 ജൂലൈ 31 ലേക്കാണ് അവസാന തീയതി നീട്ടിയത്. ഒപ്പം 2019–20 വർഷത്തെ ടിഡിഎസ് / ടിസിഎസ് സർട്ടിഫിക്കറ്റുകൾ ഇഷ്യൂ ചെയ്യുന്നതിനുള്ള അവസാന തീയതിയും ഓഗസ്റ്റ് 15 വരെ നീട്ടിയിട്ടുണ്ട്. ഒരു ട്വീറ്റിലൂടെയാണ് ആദായ നികുതി വകുപ്പ് ഈ കാര്യം അറിയിച്ചത്.

2019–20 സാമ്പത്തിക വർഷത്തിലെ ആദായനികുതി റിട്ടേണുകൾ സമർപ്പിക്കേണ്ട തീയതിയും നീട്ടിയിട്ടുണ്ട്. പുതുക്കിയ ഉത്തരവു പ്രകാരം പ്രകാരം 2020 നവംബർ 30-നകം റിട്ടേൺ സമർപ്പിച്ചാൽ മതിയാകും. കോവിഡ്-19 പശ്ചാത്തലതത്തെ തുടർന്ന് നികുതിദായകർക്കുണ്ടായ ബുദ്ധിമുട്ടുകൾ പരിഗണിച്ചാണ് തീരുമാനം. കേന്ദ്ര പ്രത്യക്ഷ നികുതി ബോർഡും 2018–19 സാമ്പത്തിക വർഷത്തിലെ പുതുക്കിയതും അല്ലാത്തതുമായ ആദായനികുതി റിട്ടേണുകൾ സമർപ്പിക്കേണ്ട തീയതിയും 2020 ജൂലൈ 31 വരെ നീട്ടിയിട്ടുണ്ട്.

നികുതി ഇളവുകൾക്കായി ജൂലൈ 31 നിക്ഷേപം നടത്താം

2019-20 സാമ്പത്തിക വർഷത്തേക്കുള്ള ആദായ നികുതി ഇളവുകൾക്കായി നിക്ഷേപ നടത്തേണ്ടവർക്ക് ഇനിയും നിക്ഷേപം നടത്താവുന്നതാണ്. ഇതിനായുള്ള സമയ പരിധി ജൂലൈ 31 വരെയായി നീട്ടിയിട്ടുണ്ട്. നേരത്തെ ജൂൺ 30 വരെയായിരുന്നു. ഇതോടെ ആദായ നികുതി നിയമത്തിന്റെ 80 സി, 80 ഡി വകുപ്പുകള്‍ പ്രകാരം നികുതി ഇളവുകള്‍ നേടുന്നതിന് വേണ്ടി നികുതി ദായകർക്ക് ഈ മാസം അവസാനം വരെ നിക്ഷേപം നടത്താവുന്നതാണ്. സാധാരണ മാര്‍ച്ച് 31 വരെ നടത്തുന്ന നിക്ഷേപങ്ങളാണ് നികുതി ഇളവിനായി പരിഗണിക്കുക. എന്നാൽ നിലവിലെ സാഹചര്യം കണക്കിലെടുത്താണ് തീയതികൾ നീണ്ടു പോയത്.

ആദായ നികുതി നിയമത്തിലെ 80 സി വകുപ്പ് പ്രകാരം നികുതിദായകർക്ക് പിപിഎഫ്, പിഎഫ്, എന്‍എസ്‌സി എന്നിവയില്‍ നടത്തുന്ന നിക്ഷേപങ്ങളും 80 ജി വകുപ്പ് പ്രകാരം ജീവകാരുണ്യ പ്രവര്‍ത്തനങ്ങള്‍ക്കും ദുരിതാശ്വാസ പ്രവര്‍ത്തനങ്ങള്‍ക്കും മറ്റും നല്‍കുന്ന സംഭാവനകളും നികുതി ഇളവിനായി പരിഗണിക്കും. 80 ഡി പ്രകാരം ആരോഗ്യ ഇന്‍ഷൂറന്‍സ് പ്രീമിയത്തിന് നികുതി ഇളവ് നേടാവുന്നതാണ്.