പാത്രം കഴുകാനുള്ള ചാരവും ഇനി ഓണ്‍ലൈനില്‍ കിട്ടും; വില കേട്ട് മാത്രം ഞെട്ടരുത്

തൃശൂര്‍: വീടുകളില്‍ പാത്രം വൃത്തിയാക്കുന്നതിന് പണ്ട് കാലം മുതലേ ഉപയോഗിച്ചിരിക്കുന്ന ഒരു വസ്തുവാണ് ചാരം. അടുക്കളയിലെ ഒരു താരം കൂടിയായിരുന്നു ചാരം. എന്നാല്‍ അടുക്കളയൊക്കെ അല്‍പം മോഡേണായതോടെ ചാരം മിക്ക സ്ഥലങ്ങളിലും അപ്രത്യക്ഷമായി. എന്നാല്‍ ഇപ്പോള്‍ ഓണ്‍ലൈനില്‍ ഓര്‍ഡര്‍ ചെയ്താല്‍ ചാരം നിങ്ങളുടെ വീട്ടിലെത്തും. 250 ഗ്രാം തൂക്കത്തില്‍ ചാരം ഓണ്‍ലൈന്‍ പ്ലാറ്റ്‌ഫോമില്‍ ലഭ്യമാണ്. എന്നാല്‍ ഇപ്പോള്‍ ഓഫര്‍ പ്രഖ്യാപിച്ച് 160 രൂപയ്ക്ക് ലഭ്യമാണ്. പാത്രം കഴുകാനുള്ള തടിച്ചാരം എന്നാണ് വിപണിയിലെ പേര്.

തമിഴ്‌നാട് ആസ്ഥാനമായി പ്രവര്‍ത്തിക്കുന്ന കമ്പനികളാണ് കൂടുതലും ഉത്പന്നങ്ങള്‍ ഇപ്പോള്‍ വിപണിയില്‍ ഇറക്കുന്നത്. തടി ഉയര്‍ന്ന ഊഷ്മാവില്‍ കത്തിച്ച് എടുത്താണ് ഈ ചാരം നിര്‍മ്മിക്കുന്നത്. വെബ്‌സൈറ്റുകളിലെ കസ്റ്റമര്‍ റിവ്യൂവില്‍ ഒരു സ്റ്റാര്‍ മാത്രമാണ് ലഭിച്ചിരിക്കുന്നത്. നാട്ടുകാര്‍ പഴമയിലേക്ക് തിരിച്ച് പോവുന്നത് അനുസരിച്ചിരിക്കും ഈ ഉത്പ്പന്നതിന്റെ റേറ്റിംഗ് ഉയരാന്‍. പാത്രം കഴുകാനും ചെടികള്‍ക്ക് ഇടാനും എന്ന പേരിലാണ് ഈ ഉല്‍പ്പനം വിപണിയില്‍ ഇറങ്ങിയിരിക്കുന്നത്.