ചാഞ്ചാട്ടം തുടർന്ന് സൂചികകൾ, ഇപ്പോൾ ഈ രണ്ട് ഓഹരികൾ വാങ്ങാം, 18 ശതമാനം ലാഭം നേടാമെന്ന് ബ്രോക്കറേജ്

തിങ്കളാഴ്ചത്തെ വ്യാപാര വ്യാപാരത്തിൽ ഇന്ത്യൻ ഓഹരി വിപണി സൂചികകൾ ചുവപ്പിലാണ് ആരംഭിച്ചത്. യുഎസുമായുള്ള വ്യാപാര ചർച്ചകളെ ചുറ്റിപ്പറ്റിയുള്ള അനിശ്ചിതത്വവും കൊട്ടക് മഹീന്ദ്ര ബാങ്കിൽ നിന്നുള്ള നിരാശാജനകമായ വരുമാനവും നിക്ഷേപകരുടെ വികാരത്തെ ബാധിച്ചു. ബിഎസ്ഇ സെൻസെക്സ് 326 പോയിന്‍റ് അഥവാ 0.4 ശതമാനം ഇടിഞ്ഞ് 81,136 ലെത്തി. നിഫ്റ്റി 50 രാവിലെ 9:18 ഓടെ 95 പോയിന്‍റ് അഥവാ 0.38 ശതമാനം ഇടിഞ്ഞ് 24,736 ലെത്തി. എന്നാൽ വേഗം തന്നെ തിരിച്ചുകയറാൻ സൂചികകൾക്ക് സാധിച്ചു. ഇത് നിക്ഷേപകരുടെ ആത്മവിശ്വാസം നേരിയ തോതിൽ വർദ്ധിപ്പിച്ചു.

ബ്രോക്കറേജ് സ്ഥാപനമായ ചോയ്‌സ് ബ്രോക്കിംഗിന്‍റെ അഭിപ്രായത്തിൽ, നിഫ്റ്റി അതിന്‍റെ 20-ഉം 50-ഉം ദിവസത്തെ ഇഎംഎ-കൾക്ക് താഴെയാണ് വ്യാപാരം നടത്തുന്നത്. ഇത് കുറച്ച് കാലത്തേക്ക് വിപണി താഴേക്ക് നീങ്ങാനുള്ള സൂചനയാണ് കാണിക്കുന്നത്. അതേസമയം, ആക്കം പോസിറ്റീവായി മാറ്റുന്നതിന് 25,150 ലെവലിനു മുകളിൽ ഒരു നിർണായക ക്ലോസ് ആവശ്യമാണ്. നിലവിലുള്ള ചാഞ്ചാട്ടത്തെ ഫലപ്രദമായി നേരിടാൻ ആഗോള, ആഭ്യന്തര ട്രിഗറുകൾ സൂക്ഷ്മമായി നിരീക്ഷിച്ചുകൊണ്ട് ജാഗ്രത പുലർത്തുന്നതാണ് ഉചിതമെന്നും ബ്രോക്കറേജ് സ്ഥാപനം കൂട്ടിച്ചേർത്തു.

ബ്രോക്കറേജ് സ്ഥാപനമായ മോത്തിലാൽ ഓസ്വാൾ ഫിനാൻഷ്യൽ സർവീസസ് ലിമിറ്റഡ് ഈ ആഴ്ച വാങ്ങാൻ രണ്ട് ഓഹരികൾ ശുപാർശ ചെയ്യുന്നുണ്ട്. ഏതൊക്കെ ആണ് ആ ഓഹരികളെന്നും ടാർഗെറ്റ് വില എത്രയാണെന്നും നമുക്ക് പരിശോധിക്കാം.

1. വിഎ ടെക് വാബാഗ് ലിമിറ്റഡ്

എൻവയോൺമെന്‍റൽ സർവീസുകളുമായി ബന്ധപ്പെട്ട് പ്രവർത്തിക്കുന്ന ഒരു സ്മാൾക്യാപ് കമ്പനിയാണിത്. ആഗോള തലത്തിൽ ഇൻഡസ്ട്രികൾക്കും, മുനിസിപ്പാലിറ്റികൾക്കും സസ്റ്റെയ്നബിൾ വാട്ടർ സൊല്യൂഷനുകൾ നൽകുന്നു.1924ൽ സ്ഥാപിതമായ കമ്പനിക്ക് ഒരു നൂറ്റാണ്ടിന്‍റെ അപൂർവ്വമായ പ്രവർത്തന പാരമ്പര്യവുമുണ്ട്. രാജ്യത്തെ വാട്ടർ മാനേജ്മെന്റ് സെക്ടറിലെ മൂന്നാമത്തെ വലിയ കമ്പനി കൂടിയാണിത്.

ടാർഗെറ്റ് വില

എൻഎസ്ഇയിൽ 1601 രൂപ നിലവാരത്തിലാണ് വിഎ ടെക് വാബാഗ് ലിമിറ്റഡ് ഓഹരിയുടെ വ്യാപാരം പുരോഗമിക്കുന്നത്. കഴിഞ്ഞ അഞ്ച് ദിവസത്തിനിടെ 4.9 ശതമാനം വളർച്ച നേടാൻ ഓഹരിക്ക് സാധിച്ചു. 8.13 ശതമാനമാണ് ഒരുമാസത്തെ മുന്നേറ്റം. ജലശുദ്ധീകരണത്തിന്‍റെ വർദ്ധിച്ചുവരുന്ന ആവശ്യകതയിൽ നിന്നും മികച്ച നേട്ടമുണ്ടാക്കാൻ കമ്പനിക്കാ സാധിക്കുമെന്നാണ് മോത്തിലാൽ പറയുന്നത്. 137 ബില്യൺ രൂപയുടെ ഓർഡർ ബുക്ക്, 200 ബില്യൺ രൂപയുടെ ബിഡ് പൈപ്പ്‌ലൈൻ എന്നിവയുടെ പിൻബലത്തിൽ വരും വർഷങ്ങളിൽ കമ്പനിയുടെ വരുമാനത്തിൽ കുതിപ്പുണ്ടാകും.

1900 രൂപ ടാർഗെറ്റ് വിലയോടെ വിഎ ടെക് വാബാഗ് ലിമിറ്റഡ് ഓഹരി വാങ്ങാമെന്നാണ് മോത്തിലാൽ ശുപാർശ. നിലവിലെ ഓഹരി വിലയുമായി താരതമ്യപ്പെടുത്തുമ്പോൾ ഏകദേശം 18 ശതമാനത്തിന്‍റെ നേട്ടം.

2. എച്ച്ഡിഎഫ്സി ബാങ്ക്

ഇന്ത്യയിലെ ഏറ്റവും വലിയ സ്വകാര്യ ബാങ്കാണ് എച്ച്ഡിഎഫ്സി ബാങ്ക്. ബാങ്ക് കഴിഞ്ഞ ദിവസം നടപ്പ് സാമ്പത്തിക വർഷത്തെ ആദ്യ ത്രൈമാസത്തിലെ ഫലങ്ങൾ പുറത്ത് വിട്ടിരുന്നു. വാണിജ്യ, ഗ്രാമീണ ബാങ്കിംഗ്, റീട്ടെയിൽ വിഭാഗങ്ങളിലുടനീളം വായ്പാ വളർച്ച മെച്ചപ്പെടുത്തുന്നതിലൂടെ ശക്തമായ വരുമാനം തിരിച്ചുപിടിക്കാൻ ബാങ്കിന് കഴിയുമെന്നാണ് ബ്രോക്കറേജ് സ്ഥാപനം വിലയിരുത്തുന്നത്. സിഡി അനുപാതം സാധാരണ നിലയിലാക്കുകയും സൂക്ഷ്മമായ ബാധ്യതാ പ്രൊഫൈൽ നൽകുകയും ചെയ്തതോടെ, 2026 സാമ്പത്തിക വർഷത്തിലും 2027 സാമ്പത്തിക വർഷത്തിലും സിസ്റ്റവുമായി പൊരുത്തപ്പെടാൻ ബാങ്ക് ക്രെഡിറ്റ് വളർച്ച ത്വരിതപ്പെടുത്താൻ ഒരുങ്ങുകയാണ്.

ടാർഗെറ്റ് വില

എൻഎസ്ഇയിൽ 2005 രൂപ നിലവാരത്തിലാണ് ബാങ്ക് ഓഹരിയുടെ വ്യാപാരം പുരോഗമിക്കുന്നത്. കഴിഞ്ഞ അഞ്ച് ദിവസത്തിനിടെ 1 ശതമാനത്തോളം വളർച്ച നേടാൻ ഓഹരിക്ക് സാധിച്ചു. ആറ് മാസത്തിനിടെ 20 ശതമാനം നേട്ടമുണ്ടാക്കാനും എച്ച്ഡിഎഫ്സി ബാങ്കിന് സാധിച്ചു. 2300 രൂപ ടാർഗെറ്റോടെ ഓഹരി വാങ്ങാനാണ് മോത്തിലാലിന്‍റെ ശുപാർശ. നിലവിലെ ഓഹരി വിലയുമായി താരമ്യപ്പെടുത്തുമ്പോൾ ഏകദേശം 15 ശതമാനം നേട്ടം.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.