യുഎസ് ഫെഡ് മീറ്റ് ഇന്ന്, പലിശ നിരക്ക് കുറച്ചാൽ ലോട്ടറി, പ്രതീക്ഷയോടെ നിക്ഷേപകർ

ഇന്ന് ലോകത്താകമാനമുള്ള നിക്ഷേപകർ ആകാംഷയോടെ കാത്തിരിക്കുന്നത് ഒരു കാര്യം അറിയാനാണ്. അമേരിക്കയിലെ കേന്ദ്ര ബാങ്കായ ഫെഡറൽ റിസർവ് പലിശ നിരക്ക് കുറയ്ക്കുമോ, അതോ മാറ്റമില്ലാതെ നിലനിർത്തുമോ..? കഴിഞ്ഞ ഒമ്പത് മാസത്തിനിടെ തുടർച്ചയായ അഞ്ച് മീറ്റിംഗുകളിൽ പലിശ നിരക്ക് സ്ഥിരമായി നിലനിർത്തിയ ഫെഡറൽ ഓപ്പൺ മാർക്കറ്റ് കമ്മിറ്റി പക്ഷെ ഇത്തവണ നിരക്ക് കുറയ്ക്കുമെന്നാണ് പൊതുവിൽ വിലയിരുത്തപ്പെടുന്നത്. നിരക്കിൽ മാറ്റം വരുത്തുമെന്ന് എന്തുകൊണ്ടാണ് എല്ലാവരും പ്രതീക്ഷിക്കുന്നത്..? നമുക്ക് വിശദമായി നോക്കാം.

പ്രതീക്ഷയുടെ കാരണം

യുഎസ് സാമ്പത്തിക ഡാറ്റയിൽ പ്രത്യേകിച്ച് തൊഴിൽ വിപണിയിൽ കുത്തനെ ഇടിവ് സംഭവിച്ചതിന്‍റെ പശ്ചാത്തലത്തിലാണ് ഫെഡറൽ റിസർവ് അതിന്‍റെ ബെഞ്ച്മാർക്ക് പലിശ നിരക്ക് കാൽ പോയിന്‍റ് കുറയ്ക്കുമെന്ന പ്രതീക്ഷകൾ ഉയർത്തുന്നത്. വരാനിരിക്കുന്ന ഫെഡറൽ ഓപ്പൺ മാർക്കറ്റ് കമ്മിറ്റി യോഗത്തിൽ, പണപ്പെരുപ്പ നിരക്കിനെക്കാൾ തൊഴിൽ വിപണിയിലെ ബലഹീനതകൾ പരിഹരിക്കുന്നതിനാണ് ഫെഡ് മുൻഗണന നൽകുമെന്ന് വിശ്വസിക്കുന്നു എന്നാണ് ജെഎം ഫിനാൻഷ്യൽ വിലയിരുത്തുന്നത്.

മന്ദഗതിയിലുള്ള തൊഴിൽ വിപണിയുടെയും പിപിഐ റീഡിംഗിന്റെയും സൂചനകൾ അനുസരിച്ച് ബോണ്ട് ആദായം ഇതിനകം 25 ബേസിസ് 25-ബേസിസ് പോയിന്റ് കുറവ് വരുത്തിയിട്ടുണ്ട്. ഇത് നിരക്ക് കുറയ്ക്കൽ പ്രതീക്ഷകളെ വർദ്ധിപ്പിക്കുന്നു എന്നും ജെഎം ഫിനാൻഷ്യൽ കൂട്ടിച്ചേർത്തു.

ജൂലൈ 25 ന് നടന്ന യോഗത്തിൽ ഭാവിയിലെ നയ നടപടികൾ തൊഴിൽ വിപണിയുടെ അവസ്ഥയെ ആശ്രയിച്ചിരിക്കുമെന്ന് ഫെഡ് ചെയർമാൻ സൂചിപ്പിച്ചിരുന്നു. കൂടാതെ സമീപകാല ഡാറ്റ തൊഴിൽ വിപണിയിലെ ഒരു തകർച്ച കാണിക്കുന്നുണ്ട്. നിയമനത്തിലെ മാന്ദ്യം, വർദ്ധിച്ചുവരുന്ന തൊഴിലില്ലായ്മ ക്ലെയിമുകൾ, വർദ്ധിച്ചുവരുന്ന തൊഴിലില്ലായ്മ നിരക്ക് എന്നിവ കാരണം സെൻട്രൽ ബാങ്ക് ബെഞ്ച്മാർക്ക് പലിശ നിരക്ക് കുറയ്ക്കുമെന്ന് നിക്ഷേപകർ പ്രതീക്ഷിക്കുന്നതിനുള്ള ഒരു പ്രധാന കാരണമാണിത്. മാർച്ചിൽ അവസാനിച്ച വർഷത്തിൽ കമ്പനികൾ മുമ്പ് കണക്കാക്കിയതിനേക്കാൾ വളരെ കുറച്ച് തൊഴിലവസരങ്ങൾ മാത്രമേ സൃഷ്ടിച്ചിട്ടുള്ളൂവെന്ന് തൊഴിൽ വകുപ്പിന്റെ പ്രാഥമിക റിപ്പോർട്ട് കാണിക്കുന്നുണ്ട്.

ഫെഡ് ഫണ്ടുകളുടെ ഫ്യൂച്ചേഴ്‌സ് ട്രേഡിംഗ് ഡാറ്റയെ അടിസ്ഥാനമാക്കി നിരക്കുകളുടെ ചലനങ്ങൾ പ്രവചിക്കുന്ന സിഎംഇ ഗ്രൂപ്പിന്‍റെ ഫെഡ്‌വാച്ച് ടൂൾ അനുസരിച്ച് 25 ബേസിസ് പോയിന്‍റ് കുറയ്ക്കാനുള്ള സാധ്യത 96 ശതമാനം ആണ്. അതേസമയം 50 ബേസിസ് പോയിന്‍റ് കുറയ്ക്കാനുള്ള സാധ്യത വെറും 4 ശതമാനം മാത്രമാണ്. ഫെഡ് 25 ബേസിസ് പോയിന്‍റ് കുറവ് പ്രഖ്യാപിച്ചാൽ അതോടെ ഫെഡറൽ ഫണ്ട് നിരക്ക് 4.00 ശതമാനം മുതൽ 4.25 ശതമാനം വരെയാകും. 50 ബേസിസ് പോയിന്‍റാണ് കുറയ്ക്കുന്നതെങ്കിൽ നിരക്ക് 3.75-4.00 ശതമാനമായി കുറയും.

പ്രതീക്ഷയോടെ ഇന്ത്യൻ വിപണിയും

ഫെഡറൽ റിസർവിന്‍റെ പലിശ കുറയ്ക്കാനുള്ള തീരുമാനമാണ് നിക്ഷേപകർ കരുതലോടെ കാത്തിരിക്കുന്നത്. പലിശ കുറയുന്നതോടെ ഇന്ത്യ ഉൾപ്പെടെയുള്ള വിപണികളിലേക്ക് വിദേശ നിക്ഷേപ ഒഴുക്ക് കൂടിയേക്കും. ഇതോടൊപ്പം ഇന്ത്യൻ ഉത്പന്നങ്ങൾക്ക് ഡൊണാൾഡ് ട്രംപ് ഏർപ്പെടുത്തിയ 50 ശതമാനം അധിക തീരുവ ഒഴിവാക്കുന്നതിന് കേന്ദ്ര സർക്കാർ അമേരിക്കയുമായി വ്യാപാര ചർച്ചകൾ സജീവമാക്കുന്നതും നിക്ഷേപകർക്ക് പ്രതീക്ഷയാണ്.

ഫെഡറൽ റിസർവ് പലിശ കുറയ്ക്കുമെന്ന സൂചനയാണ് നിലവിൽ സ്വർണവിലയിലെ കുതിപ്പിന് പ്രധാന കാരണം. ഫെഡറൽ റിസർവ് മുഖ്യ പലിശ അര ശതമാനം കുറച്ചാൽ പവൻ വില 83,000 രൂപ കടന്നേക്കും.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.