സ്ഥിര നിക്ഷേപമിട്ടാൽ പണം ഇരട്ടിയാകുമോ? നിക്ഷേപം ഇരട്ടിയാകാൻ ഏത് കാലാവധിയിൽ നിക്ഷേപിക്കണം

അധികം റിസ്കെടുക്കാതെ സ്ഥിര നിക്ഷേപം നടത്തുന്നവരാണോ? മുതിർന്ന പൗരന്മാരായ നിക്ഷേപകാരാണെങ്കിൽ നിങ്ങളുടെ പണം ഇരട്ടിയാക്കാനുള്ള മാർ​ഗമുണ്ട്. രാജ്യത്തെ മുൻനിര ബാങ്കുകളിൽ സ്ഥിര നിക്ഷേപമിടുന്നവർക്ക് നിലവിലെ പലിശ നിരക്കിൽ നിക്ഷേപം ഇരട്ടിയാക്കാനാണ് അവസരം. സ്റ്റേറ്റ് ബാങ്ക് ഓഫ് ഇന്ത്യ, എച്ച്ഡിഎഫ്സി ബാങ്ക്, ഐസിഐസിഐ ബാങ്ക് എന്നിവയിൽ സ്ഥിര നിക്ഷേപം നടത്തുന്ന മുതിർന്ന പൗരന്മാർക്കാണ് ഈ അവസരം. ഈ ബാങ്കുകളിൽ ഏത് കാലയളവിൽ നിക്ഷേപിക്കണമെന്ന് നോക്കാം.

മുതിർന്ന പൗരന്മാരുടെ പലിശ നിരക്ക്

മുതിർന്ന പൗരന്മാർക്ക് സാധാരണയായി ലഭിക്കുന്ന പ്രീമിയം നിരക്കിനൊപ്പം ബാങ്കുകൾ അവതരിപ്പിച്ച പ്രത്യേക സ്ഥിര നിക്ഷേപം പദ്ധതി വഴി അധിക നിരക്ക് ഈ ബാങ്കുകൾ നൽകുന്നുണ്ട്. എസ്ബിഐയിൽ വീകെയർ സ്ഥിര നിക്ഷേപം വഴി 0.50 ശതമാനം അധിക നിരക്കും എച്ച്ഡിഎഫ്സി ബാങ്ക് സീനിയർ സിറ്റിസൺ കെയർ എഫ്ഡിക്ക് 0.25 ശതമാനം അധിക നിരക്കും ലഭിക്കുന്നുണ്ട്. ഈ പദ്ധതികൾ വഴിയാണ് നിക്ഷേപകന് പണം ഇരട്ടിയാക്കാൻ സാധിക്കുന്നത്.

എസ്ബിഐ

എസ്ബിഐയില്‍ മുതിര്‍ന്ന പൗരന്മാര്‍ക്ക് ലഭിക്കുന്ന ഉയർന്ന പലിശ നിരക്ക് 7.50 ശതമാനമാണ്. 2 വർഷം മുതൽ 3 വർഷം വരെയുള്ള കാലാവധിയിലും 5 വർഷം മുതൽ 10 വർഷം വരെയുള്ള കാലാവധിയിലും മുതിർന്ന പൗരന്മാർക്ക് ഈ ഉയർന്ന പലിശ ലഭിക്കും. നിക്ഷേപം ഇരട്ടിയാക്കണമെങ്കിൽ 5 വർഷം മുതൽ 10 വര്‍ഷത്തെ സ്ഥിര നിക്ഷേപം തിരഞ്ഞെടുക്കണം.

5 വർഷം മുതൽ 10 വര്‍ഷത്തേക്ക് വീകെയർ സ്ഥിര നിക്ഷേപ പദ്ധതി പ്രകാരമാണ് 7.50 ശതമാനം പലിശ ലഭിക്കുന്നത്. 10 വര്‍ഷകാലത്തേക്ക് 1 ലക്ഷം രൂപ നിക്ഷേപിക്കുന്നൊരാൾക്ക് കാലാവധിയിൽ 2,10,235 രൂപ ലഭിക്കും.

എച്ച്ഡിഎഫ്സി ബാങ്ക്

എച്ച്ഡിഎഫ്‌സി ബാങ്കില്‍ മുതിര്‍ന്ന പൗരന്മാര്‍ക്ക് ലഭിക്കുന്ന ഏറ്റവും ഉയര്‍ന്ന പലിശ 7.75 ശതമാനമാണ്. 5 വർഷം 1 ദിവസം മുതൽ 10 വര്‍ഷ കാലത്തെ സ്ഥിര നിക്ഷേപത്തിനാണ് 7.75 ശതമാനം പലിശ ലഭിക്കുന്നത്. എച്ച്ഡിഎഫ്സി ബാങ്കിലെ സ്ഥിര നിക്ഷേപം ഇരട്ടിയാക്കാൻ 10 വർഷ കാലാവധിയിൽ നിക്ഷേപിക്കണം. 1 ലക്ഷത്തിന്റെ നിക്ഷേപം 2,15,458 രൂപയായി വളരും.

എച്ച്ഡിഎഫ്‌സി ബാങ്കില്‍ 2 വര്‍ഷം 11 മാസം മുതല്‍ 35 മാസമാണ്. മുതിര്‍ന്ന പൗരന്മാര്‍ക്ക് 7.65 ശതമാനം പലിശ ലഭിക്കും. 4 വര്‍ഷം 7 മാസം മുതല്‍ 55 മാസത്തേക്ക് 7.70 ശതമാനം പലിശയും ലഭിക്കും. 15 മുതല്‍ 18 മാസത്തില്‍ താഴെ 7.60 ശതമാനം പലിശയും ലഭിക്കും.

ഐസിഐസിഐ ബാങ്ക്

ഐസിഐസിഐ ബാങ്കിൽ മുതിർന്ന പൗരന്മാർക്ക് 2 വർഷം മുതൽ 10 വർഷത്തേക്ക് 7.50 ശതമാനം പലിശ ലഭിക്കും. 7.50 ശതമാനം പലിശ നിരക്കിൽ 10 വർഷത്തേക്ക് 1 ലക്ഷം രൂപ സ്ഥിര നിക്ഷേപമിട്ടാൽ 2,10,234 രൂപ കാലാവധിയിൽ ലഭിക്കും. ഐസിഐസിഐ ബാങ്കില്‍ ഏറ്റവും ഉയ‌ർന്ന പലിശ നിരക്ക് 7.60 ശതമാനമാണ്. 15 മാസം മുതൽ 2 വർഷത്തിൽ താഴെയുള്ള നിക്ഷേപങ്ങൾക്കാണ് മുതിർന്ന പൗരന്മാർക്ക് ഈ പലിശ നിരക്കാണ് ലഭിക്കുന്നത്.

നിക്ഷേപകർ ശ്രദ്ധിക്കാൻ

സ്ഥിര നിക്ഷേപത്തിന്റെ പലിശയ്ക്ക് 10 ശതമാനം സ്രോതസിൽ നിന്നുള്ള നികുതി (ടിഡിഎസ്) കുറയ്ക്കും. റെ​ഗുലർ നിക്ഷേപകരുടെ പലിശ വരുമാനം സാമ്പത്തിക വർഷത്തിൽ 40,000 രൂപ കവിഞ്ഞാലാണ് ടിഡിഎസ് ഈടാക്കുക. മുതിർന്ന പൗരന്മാർക്ക് 50,000 രൂപയാണ് പരിധി. പലിശ വരുമാനം വ്യക്തിയുടെ മൊത്തം വരുമാനത്തിനൊപ്പം ചേർത്ത് നിക്ഷേപകന്റെ നികുതി സ്ലാബിന് അനുസരിച്ചുള്ള നികുതിയും ചുമത്തും.