2021 ജനുവരി മുതൽ മാരുതി കാറുകൾക്ക് വില ഉയരും

അസംസ്കൃത വസ്തുക്കളുടെ വിലയിൽ വർധനവുണ്ടായതിനാൽ ജനുവരി മുതൽ വാഹനങ്ങളുടെ വില വർധിപ്പിക്കുമെന്ന് മാരുതി സുസുക്കി അറിയിച്ചു. ഓട്ടോ ഭീമനായ മാരുതി വിവിധ കാറുകളുടെ വില എത്ര വീതം വ‍‍ർദ്ധിക്കുമെന്ന് വ്യക്തമാക്കിയിട്ടില്ല. എന്നാൽ വില വർദ്ധനവ് വിവിധ മോഡലുകളിലുടനീളം വ്യത്യാസപ്പെടുമെന്ന് പറഞ്ഞു.

നി‍ർമ്മാണ ചെലവുകളുടെ വർദ്ധനവ് കാരണം കഴിഞ്ഞ ഒരു വർഷത്തിൽ കമ്പനിയുടെ വാഹനങ്ങളുടെ വിലയെ പ്രതികൂലമായി ബാധിച്ചു. അതിനാൽ, 2021 ജനുവരിയിലെ വില വർധനയിലൂടെ മുകളിൽ പറഞ്ഞ അധിക ചെലവിന്റെ സ്വാധീനം ഉപയോക്താക്കളിലേയ്ക്ക് കൈമാറേണ്ടത് അനിവാര്യമായിരിക്കുന്നതായി കമ്പനി വ്യക്തമാക്കി. സ്റ്റോക്ക് എക്സ്ചേഞ്ചുകൾക്ക് നൽകിയ റെഗുലേറ്ററി ഫയലിംഗിലാണ് മാരുതി സുസുക്കി ഇക്കാര്യം അറിയിച്ചത്.

2021 ജനുവരി മുതൽ മാരുതി കാറുകൾക്ക് വില ഉയരും

നിലവിൽ, ആൾട്ടോ (2.99 ലക്ഷം രൂപ, എക്സ്ഷോറൂം) മുതൽ എക്സ്എൽ 6 (9.84 ലക്ഷം രൂപ, എക്സ്ഷോറൂം) വരെയുള്ള 14 കാറുകളാണ് മാരുതിയ്ക്ക് കീഴിലുള്ളത്. മാരുതി സുസുക്കി അടുത്തിടെ വിവിധ മോഡലുകളിൽ ഡിസ്കൗണ്ട് ഓഫറുകൾ പ്രഖ്യാപിച്ചിരുന്നു. കഴിഞ്ഞ മാസത്തിലെ വിൽപ്പന റിപ്പോർട്ടുകൾ നോക്കുമ്പോൾ കമ്പനി മൊത്തം 1,35,775 യൂണിറ്റ് പാസഞ്ചർ വാഹന വിൽപ്പന നടത്തി.

ഇവയിൽ, മിനി, കോംപാക്റ്റ് കാറുകളെ വളരെയധികം ആശ്രയിക്കുന്ന ഉപവിഭാഗങ്ങളുടെ വിൽപ്പന 5.1 ശതമാനം കുറഞ്ഞു. മൊത്തത്തിൽ, കാർ നിർമാതാക്കളുടെ വിൽപ്പന 2020 നവംബറിൽ 1.7 ശതമാനം വളർച്ച രേഖപ്പെടുത്തി.