ജിഡിപി നിരക്ക് പ്രഖ്യാപനം; സെൻസെക്സും നിഫ്റ്റിയും ആജീവനാന്ത ഉയരത്തിൽ നിന്ന് താഴേയ്ക്ക്

സെൻസെക്സും നിഫ്റ്റിയും ആജീവനാന്ത ഉയരത്തിൽ നിന്ന് താഴ്ന്നു. സെന്സെക്സ് 200 പോയിന്റിന് താഴെയും നിഫ്റ്റി 50 പോയിന്റ് ഇടിവും രേഖപ്പെടുത്തി. ഇന്നലെ ആജീവനാന്ത ഉയരത്തിലെത്തിയ വിപണിയിലാണ് ഇന്ന് കനത്ത നഷ്ടം നേരിട്ടിരിക്കുന്നത്. രണ്ടാം പാദ ജിഡിപി വളർച്ചാ നിരക്ക് ഇന്ന് പ്രഖ്യാപിക്കാനിരിക്കെയാണ് ഇന്ന് ഓഹരി വിപണിയിൽ ഇടിവ് രേഖപ്പെടുത്തിയിരിക്കുന്നത്. ജിഡിപി വളർച്ച 4.2 ശതമാനത്തിനും 4.7 ശതമാനത്തിനും ഇടയിലായിരിക്കുമെന്നാണ് വിവിധ റേറ്റിംഗ് ഏജൻസികൾ പ്രതീക്ഷിക്കുന്നത്.

രാവിലത്തെ സെഷനിൽ 242.61 പോയിന്റ് അഥവാ 0.59 ശതമാനം കുറഞ്ഞ് സെൻസെക്സ് 40,887.56 പോയിന്റിലെത്തി. എൻ‌എസ്‌ഇ നിഫ്റ്റി 56.70 പോയിൻറ് അഥവാ 0.47 ശതമാനം താഴ്ന്ന് 12,094.45 പോയിന്റിലും എത്തി. സെൻസെക്സിൽ നിലവി ൽ ഏറ്റവും കൂടുതൽ നേട്ടമുണ്ടാക്കിയത് യെസ് ബാങ്കാണ്. നാല് ശതമാനം വരെ ഉയർന്നു. ഭാരതി എയർടെൽ, ടാറ്റ മോട്ടോഴ്സ്, ടെക് മഹീന്ദ്ര, എൻ‌ടി‌പി‌സി, ആക്സിസ് ബാങ്ക് എന്നിവയും മികച്ച പ്രകടനം കാഴ്ച്ച വച്ചു.

ജിഡിപി നിരക്ക് പ്രഖ്യാപനം; സെൻസെക്സും നിഫ്റ്റിയും ആജീവനാന്ത ഉയരത്തിൽ നിന്ന് താഴേയ്ക്ക്

എന്നാൽ ടാറ്റാ സ്റ്റീൽ, ഐസിഐസിഐ ബാങ്ക്, കൊട്ടക് ബാങ്ക്, ഇൻഫോസിസ് എന്നിവയ്ക്ക് ഇന്ന് കനത്ത നഷ്ടമാണ് നേരിടേണ്ടി വന്നിരിക്കുന്നത്. ഭാരതി ഇൻ‌ഫ്രാറ്റെൽ‌ 5.6 ശതമാനം ഉയർ‌ന്ന്‌ ഓഹരി വില 271.05 രൂപയായി. ഭാരതി എയർടെൽ‌ 1.8 ശതമാനം ഉയർ‌ന്നു. യെസ് ബാങ്ക് 4.3 ശതമാനവും സീ എന്റർടൈൻമെന്റ് രണ്ട് ശതമാനവും ഗെയിൽ 1.7 ശതമാനവും നേട്ടമുണ്ടാക്കി.

വ്യാഴാഴ്ച സെൻസെക്സ് എക്കാലത്തെയും ഉയർന്ന നിരക്കായ (ഇൻട്രാ-ഡേ) 41,163.79 ലേക്ക് ഉയർന്നിരുന്നു. 109.56 പോയിൻറ് അഥവാ 0.27 ശതമാനം ഉയർന്ന് 41,130.17 എന്ന നിലയിലെത്തി. നിഫ്റ്റിയും 50.45 പോയിൻറ് അഥവാ 0.42 ശതമാനം ഉയർന്ന് ചരിത്രത്തിലെ തന്നെ ഏറ്റവും ഉയർന്ന നിരക്കായ 12,151.15ൽ എത്തി.