ഉള്ള് പൊള്ളിച്ച് പൊന്ന്, സ്വർണവില സർവ്വകാല റെക്കോർഡിൽ, പവന്‍റെ വില 60,000 കടക്കുമോ, വിശദമായി അറിയാം

കേരളത്തിന്‍റെ ചരിത്രത്തിലെ ഏറ്റവും ഉയർന്ന വിലയിലാണ് സ്വർണവ്യാപാരം നടക്കുന്നത്. കഴിഞ്ഞ ആറ് ദിവസത്തിനിടെ മാത്രം 1,240 രൂപയാണ് ഒരു പവന് വർദ്ധിച്ചത്. വരും ദിവസങ്ങളിലും വില വർദ്ധിക്കാനുള്ള സാധ്യതയുണ്ട് എന്നാണ് പൊതുവിൽ വിലയിരുത്തുന്നത്. അതുകൊണ്ടു തന്നെ ആഭരണപ്രേമികൾ വലിയ ആശങ്കയിലാണ്. എന്താണ് സ്വർണവില റോക്കറ്റ് പോലെ കുതിച്ചുയരാൻ കാരണമെന്ന് നമുക്ക് പരിശോധിക്കാം.

ഇന്നത്തെ സ്വർണവില

ഇന്ന് ഒരു പവൻ സ്വർണ്ണത്തിന് 56,480 രൂപയും, ഗ്രാമിന് 7,060 രൂപയുമാണ് വില. ബുധനാഴ്ചയും സ്വർണ്ണ വിലയിൽ വർധനയുണ്ടായിരുന്നു.പവന് 480 രൂപയും, ഗ്രാമിന് 60 രൂപയുമാണ് വില കൂടിയത്.

കുതിപ്പിന് കാരണം എന്ത്...?

നവംബറിൽ നടക്കുന്ന യോ​ഗത്തിൽ ഫെഡറൽ റിസർവ് പലിശ നിരക്ക് വീണ്ടും അരശതമാനം കുറയ്ക്കുമെന്ന പ്രതീക്ഷയിലാണ് സ്വർണ വില ഉയരത്തിൽ തുടരുന്നത്. അതോടൊപ്പം ഭൗമരാഷ്ട്രീയ പിരിമുറുക്കം, വിപണിയിലെ അനിശ്ചിതത്വം എന്നിവയും സ്വർണവിലയുടെ കുതിപ്പിനാ കാരണമായെന്നാണ് വിപണി വിദഗ്ധർ പറയുന്നത്.

വ്യക്തിഗത ഉപഭോഗച്ചെലവ് (പിസിഇ) സൂചികയും തൊഴിൽ കണക്കുകളും ഉൾപ്പെടെയുള്ള പ്രധാന യുഎസ് സാമ്പത്തിക ഡാറ്റ പ്രതീക്ഷകളെ തെറ്റിച്ചാൽ സ്വർണം മുകളിലേക്ക് പോകാനുള്ള സാധ്യതയുണ്ടെന്ന് എബിസി റിഫൈനറിയിലെ നിക്കോളാസ് ഫ്രാപ്പൽ സൂചിപ്പിച്ചു. മിഡിൽ ഈസ്റ്റിലെ ഭൗമരാഷ്ട്രീയ പിരിമുറുക്കങ്ങൾ സ്വർണവില ഇനിയും ഉയരാൻ ഇടയാക്കുമെന്ന് ഏഞ്ചൽ വണ്ണിലെ ഡിവിപി-ഗവേഷകനായ പ്രതമേഷ് മല്യ കൂട്ടിച്ചേർത്തു.

വരും ദിവസങ്ങളിലും വില ഉയരുമോ..?

ഔൺസിന് 2,700 ഡോളറിൽ (10 ഗ്രാമിന് ₹ 76,000) എത്തിയതിനുശേഷം, സ്വർണ്ണ വില ഓവർബോട്ട് സോണിലാണ്. ഒരു ഔൺസിന് $2,500 (ഔൺസിന് ₹71,800) അല്ലെങ്കിൽ ഔൺസിന് $2,475 (~₹71,000) 10 ഗ്രാം) ഉടൻ സംഭവിക്കാം. മൊത്തത്തിൽ, വരും ആഴ്‌ചകളിൽ സ്വർണത്തിൻ്റെ പ്രകടനം പ്രധാനമായും യുഎസ് ഫെഡറൽ റിസർവിൻ്റെ നയ തീരുമാനങ്ങളെയും മിഡിൽ ഈസ്റ്റിലെ ജിയോപൊളിറ്റിക്കൽ സംഭവവികാസങ്ങളെയും ആശ്രയിച്ചിരിക്കുമെന്നാണ് ആഗ്മോണ്ടിലെ റിസർച്ച് ഹെഡ് റെനിഷ ചൈനാനി വിലയിരുത്തിയത്.

ഗോള്‍ഡ് അഡ്വാന്‍സ് ബുക്കിംഗ്

സ്വര്‍ണവില ഉയരുന്ന കാലത്ത് അധിക ഭാരം ഏറ്റെടുക്കാതെ സ്വര്‍ണം വാങ്ങാന്‍സാധാരണക്കാരെ സഹായിക്കുന്നൊരു മാര്‍ഗമാണ് ഗോള്‍ഡ് അഡ്വാന്‍സ് ബുക്കിംഗ് പ്ലാന്‍. വില ഇനിയും ഉയരുമെന്ന കണക്കുകൂട്ടലിൽ നിലവിലുള്ള വിലയില്‍സ്വര്‍ണം ബുക്ക് ചെയ്യാനുള്ള അവസരമാണ് അഡ്വാന്‍സ് ബുക്കിംഗിലൂടെ ലഭിക്കുന്നത്.

സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്റെ പ്രത്യേകത.

സ്വർണവിലയുടെ ചരിത്രം

കഴിഞ്ഞ രണ്ടര പതിറ്റാണ്ടിനിടെ 50,000 രൂപയുടെ വർധനവാണ് സ്വർണ വിലയിലുണ്ടായത്. 2005 ഓക്ടോബർ മാസത്തെ പവന്‍റെ വില 5,040 രൂപയായിരുന്നു. മൂന്ന് വർഷങ്ങൾക്ക് ശേഷം 2008 ഒക്ടോബർ മാസം സ്വർണ വില 10,000 കടന്നു. 2010-ൽ വില 15,000 രൂപയും 2011 ഓഗസ്റ്റ് മാസത്തിൽ വില 20,000 രൂപയും കടന്നു.

പവന്‍റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്‍റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്‍റെ വില അരലക്ഷം രൂപയും കടന്നു.

ആരാണ് സ്വര്‍ണവില നിശ്ചയിക്കുന്നത്..?

സ്വര്‍ണം ഒരു ഉത്പന്നം മാത്രമായതിനാല്‍സര്‍ക്കാരിന് വില നിശ്ചയിക്കാനാവില്ല. ഭീമ ജുവലറി ചെയര്‍മാന്‍ഡോ.ബി. ഗോവിന്ദന്‍നയിക്കുന്ന ഓള്‍കേരള ഗോള്‍ഡ് ആന്‍ഡ് സില്‍വര്‍മര്‍ച്ചന്‍റ്സ് അസോസിയേഷനാണ് കാലങ്ങളായി കേരളത്തിലെ സ്വര്‍ണവില നിശ്ചയിക്കുന്നത്. മറ്റ് സംഘടനകളും സ്വര്‍ണാഭരണ വിതരണക്കാരും ഈ വില പിന്തുടരുകയുമാണ് ചെയ്യുന്നത്.

ഓരോ ദിവസത്തെയും ഡോളറിന്റെ മൂല്യം, രൂപയുമായുള്ള വിനിമയനിരക്ക്, സ്വര്‍ണത്തിന്റെ അന്താരാഷ്ട്ര വിലയ്ക്കനുസരിച്ച് ഇന്ത്യയില്‍24 കാരറ്റ് സ്വര്‍ണത്തിന്റെ ബാങ്ക് നിരക്ക്, ഇവ പ്രകാരം മുംബൈ വിപണിയിലെ വില എന്നിവ അവലോകനം ചെയ്താണ് ഓരോ ദിവസവും സ്വര്‍ണവില നിര്‍ണയിക്കുന്നത്.