വില്ലേജ് ഓഫീസർമാരുടെ ശമ്പളം സർക്കാർ വെട്ടിക്കുറച്ചു

വില്ലേജ് ഉദ്യോഗസ്ഥരുടെ ശമ്പള സ്കെയിൽ കുറയ്ക്കാൻ ധനവകുപ്പ് ഉത്തരവ് പുറപ്പെടുവിച്ചു. 10-ാം ശമ്പള കമ്മീഷൻ ശുപാർശ പ്രകാരം വില്ലേജ് ഓഫീസർമാർക്ക് മാത്രം പ്രത്യേക ശമ്പള സ്കെയിൽ അനുവദിക്കുന്നത് ഭരണപരമായ പ്രശ്നങ്ങൾ ഉണ്ടാക്കുമെന്നതിനെ തുടർന്നാണ് പുതിയ തീരുമാനം. ഉത്തരവ് ജൂലൈ 1 മുതൽ പ്രാബല്യത്തിൽ വരും.

പത്താം ശമ്പളക്കമ്മീഷൻ തീരുമാനപ്രകാരം സർക്കാർ ജീവനക്കാരുടെ ശമ്പളം വർധിപ്പിച്ചപ്പോഴായിരുന്നു വില്ലേജ് ഓഫീസർമാർക്ക് പുതിയ സ്കെയിൽ നിലവിൽ വന്നത്. 29200 -62400 എന്നതായിരുന്നു പുതിയ ശമ്പള സ്കെയിൽ. ഇത് സംസ്ഥാന സർക്കാരും അംഗീകരിച്ചു. എന്നാൽ ഈ തീരുമാനം പിന്നീട് അസാധുവാക്കിയത് ഭരണപരമായ ബുദ്ധിമുട്ടുകൾ കാരണമാണെന്നാണ് വിലയിരുത്തൽ. റവന്യൂ വകുപ്പിലെ ഹെഡ് ക്ലാർക്കുമാരാണ് പലപ്പോഴും വില്ലേജ് ഓഫീസർമാർ ആയി നിയമിതരാവാറുള്ളത്. ഇവർ പലപ്പോഴും പഴയ പോസ്റ്റുകളിലേക്ക് തിരികെ പോവാറുമുണ്ട്.

വില്ലേജ് ഓഫീസർമാരുടെ ശമ്പളം സർക്കാർ വെട്ടിക്കുറച്ചു

ഹെഡ് ക്ലാർക്ക് തസ്തികയേക്കാൾ ഉയർന്ന ശമ്പളമാണ് വില്ലേജ് ഓഫീസർക്ക് നൽകുന്നത്. ഈ പുതിയ ഉത്തരവിന്റെ അടിസ്ഥാനത്തിൽ വില്ലേജ് ഉദ്യോഗസ്ഥരുടെ ശമ്പളം ജൂലൈ മുതൽ 27,800- 59,400 രൂപയായി മാറ്റും.

 റവന്യു ഭരണ നിര്‍വഹണത്തിനായി ഏറ്റവും താഴെ തട്ടില്‍ ഉള്ളതും പൊതുജനങ്ങളോട് ഏറ്റവും സമ്പര്‍ക്കം പുലർത്തുന്നതുമായ സ്ഥാപനമാണ്‌ വില്ലേജ് ഓഫീസ്. വില്ലേജ് ഓഫീസര്‍ വില്ലേജില്‍ ഭരണത്തിന്റെ തലവനും സര്‍ക്കാരിന്റെ പ്രതിനിധിയും ആണ്. വില്ലേജ് ഓഫീസുകളുടെ പ്രവര്‍ത്തനം താലൂക്ക് ഓഫീസിന്റെ നിയന്ത്രണത്തില്‍ ആയിരിക്കും. താലൂക്ക് തഹസില്‍ദാര്‍ ആണ് താലൂക്ക് ഓഫീസിന്റെ ചുമതലക്കാരന്‍. ഒരു താലൂക്ക് തഹസില്‍ദാരുടെ കീഴില്‍ നിരവധി വില്ലേജ് ഓഫീസുകള്‍ വരും.