ഭവന വായ്പ: കുറഞ്ഞ പലിശ നിരക്കിലേക്ക് മാറാം, ലക്ഷങ്ങൾ ലാഭിക്കാം

ഭവന വായ്പ എടുക്കുന്നവർക്ക് എന്തുകൊണ്ടും നല്ല സമയമാണ് ഇപ്പോൾ. കുറഞ്ഞ പലിശ നിരക്കിൽ ആളുകൾക്ക് ഭവന വായ്പ ലഭ്യമാക്കാൻ ബാങ്കുകൾ മത്സരിക്കുകയാണ്. എന്നാൽ പുതിയ വായ്പ എടുക്കുന്നവർക്ക് മാത്രമല്ല കുറഞ്ഞ പലിശയുടെ ആനുകൂല്യം ലഭിക്കുന്നത്. മുൻപ് വായ്പ എടുത്തവർക്കും തങ്ങളുടെ പലിശ നിരക്ക് കുറയ്ക്കാൻ സാധിക്കും.

നിലവിൽ കൂടുതൽ പലിശയ്ക്ക് നിങ്ങൾ എടുത്തിരിക്കുന്ന ഭവന വായ്പ കുറഞ്ഞ പലിശയ്ക്ക് ഏറ്റെടുക്കാൻ മറ്റ് ബാങ്കുകളും ഹൗസിംഗ് ഫിനാന്‍സ് കമ്പനികളും തയ്യാറായിരിക്കും. പൊതുമേഖലാ ബാങ്കുകളായ എസ് ബി ഐ, കാനറാ ബാങ്ക് എന്നിവയുടെ ഭവന വായ്പാ പലിശ നിരക്ക് ഇപ്പോള്‍ 6.70 - 6.95 ശതമാനമാണ്. പ്രമുഖ സ്വകാര്യ ബാങ്കുകളുടെ പലിശ നിരക്ക് 6.70- 6.75 ശതമാനനിരക്കിലുമാണ്.

ഇത്തരത്തിൽ വായ്പ മാറ്റുന്നതിന് പ്രൊസസിങ് ഫീസ് നൽകേണ്ടി വരും. അതുപോലെ തന്നെ ബാങ്കുകള്‍ / ഹൗസിംഗ് ഫിനാന്‍സ് കമ്പനികള്‍ നിഷ്‌കര്‍ഷിക്കുന്ന നടപടിക്രമങ്ങളും പൂര്‍ത്തിയാക്കേണ്ടി വരും. എന്നിരുന്നാലും കുറഞ്ഞ പലിശ നിരക്കിലേക്ക് നിങ്ങളുടെ നിലവിലെ ഭവന വായ്പ മാറ്റിയാല്‍ ലക്ഷങ്ങള്‍ ഒരുപക്ഷേ ലാഭിക്കാന്‍ സാധിക്കും.

ഭവന വായ്പ, കുറഞ്ഞ നിരക്കിലുള്ള മറ്റൊരു ബാങ്കിലേക്കോ ഹൗസിംഗ് ഫിനാന്‍സ് കമ്പനിയിലേക്കോ മാറ്റുമ്പോള്‍, അവിടെ ലഭിക്കുന്ന പലിശ നിരക്ക് എത്രകാലത്തേക്കാണ് എന്ന് കൃത്യമായി അറിയണം. പുതിയ ഉപഭോക്താക്കളെ ആകര്‍ഷിക്കാന്‍ നിശ്ചിത കാലാവധിയിലേക്ക് കുറഞ്ഞ പലിശ നിരക്ക് വാഗ്ദാനം ചെയ്‌തേക്കാം. ആ കാലാവധി കഴിയുമ്പോള്‍ പലിശ നിരക്ക് ഉയര്‍ത്താനും സാധ്യതയുണ്ട്. അതായത് ടീസര്‍ ലോണ്‍ എന്ന ആകര്‍ഷണത്തില്‍ വീഴരുത്.