ടിക്കറ്റ് റദ്ദാക്കുമ്പോൾ പരമാവധി തുക റീഫണ്ട് നേടാം; ടിക്കറ്റ് റദ്ദാക്കേണ്ടത് എപ്പോൾ; വിശദമായി അറിയാം

രാജ്യത്തെ ഏറ്റവും ചെലവ് കുറഞ്ഞ യാത്ര സംവിധാനമാണ് ഇന്ത്യൻ റെയിൽവെ. ആകർഷകമായ നിരക്കിലെ ടിക്കറ്റ് തന്നെയാണ് യാത്രക്കാരെ കൂടുതലായും തീവണ്ടി യാത്രയിലേക്ക് ആകർഷിക്കുന്നത്. ഈ ആകർഷണം കാരണം പല റൂട്ടുകളും തീവണ്ടി ടിക്കറ്റ് ലഭിക്കുക എന്നത് പ്രയാസമുള്ള കാര്യമാണ്.

ഇതിനായി നേരത്തെ ടിക്കറ്റ് ബുക്ക് ചെയ്യുകയോ തത്‍കാൽ ടിക്കറ്റിനെ ആശ്രയിക്കുകയോ ചെയ്യേണ്ടി വരും. നേരത്തെ ടിക്കറ്റ് ബുക്ക് ചെയ്താൽ, അവസാന നിമിഷം യാത്ര പ്ലാനിൽ മാറ്റങ്ങളുണ്ടായാൽ ടിക്കറ്റ് റദ്ദാക്കുക മാത്രമാണ് വഴി. ടിക്കറ്റ് ബുക്ക് ചെയ്ത് റദ്ദാക്കുമ്പോൾ റെയിൽവെ വിവിധ നിരക്കുകൾ ഈടാക്കുന്നുണ്ട്. ഇവ വിശദമായി നോക്കാം.

ടിക്കറ്റ് റദ്ദാക്കൽ നിരക്കുകൾ

ഇന്ത്യൻ റെയിൽവെയിൽ ടിക്കറ്റ് റദ്ദാക്കൽ നിരക്കുകൾ സമയം, കോച്ച്, ടിക്കറ്റ് എന്നിവ അനുസരിച്ച് വ്യത്യസ്തമാണ്. കൺഫേം ടിക്കറ്റ് റദ്ദാക്കുന്നതിനും ആർഎസി ടിക്കറ്റ് റദ്ദാക്കുന്നതിനും വെയ്റ്റിം​ഗ് ലിസ്റ്റ് ടിക്കറ്റ് റദ്ദാക്കുന്നതിനും ടിക്കറ്റ് റദ്ദാക്കുന്ന സമയത്തെ അടിസ്ഥാനമാക്കിവ വ്യത്യസ്ത നിരക്കാണ് കുറയ്ക്കുന്നത്. റെയിൽവേ പാസഞ്ചേഴ്‌സ് റൂൾ 2015 പ്രകാരമാണ് ടിക്കറ്റ് റദ്ദാക്കുമ്പോൾ റെയിൽവേ ക്യാൻസലേഷൻ അല്ലെങ്കിൽ ക്ലിയറേജ് ചാർജ് ഈടാക്കുന്നുത്.

48 മണിക്കൂർ മുൻപ്

ട്രെയിൻ പുറപ്പെടുന്നതിന് 48 മണിക്കൂറിന് മുൻപ് കൺഫേം യാത്ര ടിക്കറ്റുകൾ റദ്ദാക്കിയാൽ എസി ഫസ്റ്റ്/എക്‌സിക്യുട്ടീവ് ക്ലാസ് യാത്രക്കാർക്ക് 240 രൂപയാണ് ക്യാൻസലേഷൻ ചാർജായി ഈടാക്കുന്നത്. എസി 2-ടയർ ക്ലാസിന് 200 രൂപ ഈടാക്കും. എസി 3-ടയർ/എസി ചെയർ കാ‌ർ യാത്രക്കാർക്ക് 180 രൂപയും സെക്കൻഡ് ക്ലാസിന് 60 രൂപയുമാണ് ക്യാൻസലേഷൻ ചാർജ്. ക്യാൻസലേഷൻ ചാർജ് കുറച്ച് ബാക്കി തുക ടിക്കറ്റ് ബുക്ക് ചെയ്ത അക്കൗണ്ടിലേക്ക് എത്തും. 

12 മണിക്കൂർ മുൻപ്

ട്രെയിൻ പുറപ്പെടുന്നതിന് 48 മണിക്കൂറിൽ താഴെയും 12 മണിക്കൂർ മുൻപും യാത്രക്കാരൻ കൺഫേം ടിക്കറ്റ് റദ്ദാക്കിയാൽ ടിക്കറ്റ് നിരക്കിന്റെ 25 ശതമാനം നിരക്ക് ക്യാൻസലേഷൻ ചാർജ് ആയി ഈടാക്കും. ട്രെയിൻ പുറപ്പെടുന്നതിന് 12 മണിക്കൂറിൽ താഴെ 4 മണിക്കൂർ മുൻപ് ടിക്കറ്റ് റദ്ദാക്കിയാൽ ടിക്കറ്റ് നിരക്കിൻെറ 50 ശതമാനം ക്യാൻസലേഷൻ ചാർജ് ഈടാക്കും. ഓരോ ക്ലാസിനും ഏറ്റവും കുറഞ്ഞ ഫ്ലാറ്റ് റദ്ദാക്കൽ ചാർജ് ബാധകമായിരിക്കും.

ആർഎസി/ വെയ്റ്റിം​ഗ് ലിസ്റ്റ്/ തത്‍കാൽ

ട്രെയിൻ പുറപ്പെടുന്നതിന് അര മണിക്കൂർ മുൻപ് ആർഎസി/വെയ്റ്റ്‌ലിസ്റ്റ് ടിക്കറ്റുകൾ റദ്ദാക്കിയാൽ ക്ലറിക്കൽ ചാർജ് കുറച്ചതിന് ശേഷം മുഴുവൻ റീഫണ്ടും നൽകും. അതേസമയം തത്‍കാൽ ബുക്കിം​ഗിൽ ലഭിച്ച കൺഫേം ടിക്കറ്റ് റദ്ദാക്കിയാൽ റീഫണ്ട് ഒന്നും ലഭിക്കുകയില്ല. ടിക്കറ്റ് കൺഫേം ആയിട്ടില്ലെങ്കിൽ ഓൺലൈനായി എടുത്ത ടിക്കറ്റ് ഓട്ടോമാറ്റിക്കായി റദ്ദാവുകയും തുക തിരികെ അക്കൗണ്ടിലേക്ക് വരുകയും ചെയ്യും.

റെയിൽവെ വരുമാന സ്രോതസ്

ടിക്കറ്റ് റദ്ദാക്കൽ റെയിൽവെയ്ക്ക് വലിയ വരുമാന സ്രോതസാണ്. ഇ-ടിക്കറ്റുകൾ റദ്ദാക്കിയതിലൂടെ റെയിൽ‌വേയ്ക്ക് 1900 കോടിയിലധികം രൂപയുടെ റെക്കോർഡ് ഉയർന്ന വരുമാനമാണ് ഈയിടെ ലഭിച്ചത്. റെയിൽവേ മന്ത്രി അശ്വിനി വൈഷ്ണവ് പാർലമെന്റിൽ നൽകിയ രേഖാമൂലമുള്ള മറുപടി പ്രകാരം, 2019-2020 നും 2022-2023 നും ഇടയിൽ (ഡിസംബർ വരെ) ടിക്കറ്റുകൾ റദ്ദാക്കിയതിലൂടെ റെയിൽവേക്ക് ആകെ 1,949.98 കോടി രൂപയാണ് വരുമാനം ലഭിച്ചത്.

2021-22 സാമ്പത്തിക വർഷത്തിൽ റെയിൽവേ ഏറ്റവും ഉയർന്ന വരുമാനം 694.08 കോടി രൂപയാണ്.2022-23 സാമ്പത്തിക വർഷത്തിൽ (ഡിസംബർ വരെ) വരുമാനം 604.40 കോടി രൂപ കവിഞ്ഞു.