ഇതരസംസ്ഥാന വാഹന രജിസ്‌ട്രേഷന്‍ ഇനി എളുപ്പമാകും, നിയമം ഉടന്‍-വിശദാംശങ്ങള്‍

ഇതരസംസ്ഥാന വാഹന രജിസ്‌ട്രേഷന്‍ ഇനി എളുപ്പമാകും. ഇതിനുള്ള നടപടികള്‍ കേന്ദ്രസര്‍ക്കാര്‍ തുടങ്ങി. നീതി ആയോഗിന്റെ നിര്‍ദ്ദേശാനുസരണമാണിത്.

ഇത് പ്രകാരം വാഹന്‍ ഡാറ്റാബേസുപയോഗിച്ച് ഓണ്‍ലൈനായി നടപടികള്‍ പൂര്‍ത്തിയാക്കും. രജിസ്റ്റര്‍ ചെയ്ത സംസ്ഥാനത്തുനിന്നും നൊ ഒബ്ജക്ഷന്‍ സര്‍ട്ടിഫിക്കറ്റ് (എന്‍ഒസി) നേടുക എന്ന കടമ്പ ഇതോടെ ഒഴിവാകും.

മലയാളികള്‍ക്ക് വലിയ ഗുണം

വാഹന നികുതി കൂടുതലുള്ള സംസ്ഥാനങ്ങളില്‍ ഒന്നാണ് കേരളം. അതിനാല്‍ പല മലയാളികളും കര്‍ണാടക (KA), തമിഴ്‌നാട് (TN), പുതുച്ചേരി (PY), ഗോവ (GA) പോലുള്ള സംസ്ഥാനങ്ങളില്‍ നിന്ന് കുറഞ്ഞവിലയ്ക്ക് സെക്കന്റ് ഹാന്റ് വാഹനങ്ങള്‍ വാങ്ങുന്നു.

അന്യസംസ്ഥാന വാഹനങ്ങള്‍ കേരളത്തിലേക്ക് കൊണ്ടുവരുമ്പോള്‍, സാധാരണയായി, എന്‍ഒസി എടുക്കല്‍, ആര്‍ടിഒ നടപടികള്‍ പൂര്‍ത്തിയാക്കല്‍, രജിസ്‌ട്രേഷന്‍ എന്നിവ പൂര്‍ത്തിയാക്കണം.

പുതിയ സംവിധാനം നിലവില്‍ വന്നാല്‍::

ബെംഗളൂരു/ചെന്നൈയില്‍ നിന്ന് വാഹനം കൊണ്ടുവരുന്ന മലയാളികള്‍ക്ക് വലിയ സൗകര്യമാകും.

വിദ്യാര്‍ത്ഥികള്‍ക്കും ഐടി ജോലിക്കാര്‍ക്കും വാഹനമാറ്റം എളുപ്പമാകും

സെക്കന്‍ഡ് ഹാന്‍ഡ് വാഹന വിപണി കൂടുതല്‍ സജീവമാകും.

ഇപ്പോഴത്തെ നിയമം
പഴയ സംസ്ഥാനത്തെ ആര്‍ടിഒയില്‍ നിന്ന് NOC എടുക്കണം

വാഹനത്തിന്റെ രജിസ്‌ട്രേഷന്‍ സര്‍ട്ടിഫിക്കറ്റ്, ഫിറ്റ്‌നസ് സര്‍ട്ടിഫിക്കറ്റ്, നികുതി രസീത് എന്നിവ സമര്‍പ്പിക്കണം

വാഹനത്തിന് പെന്‍ഡിംഗ് റോഡ് ടാക്‌സ്, ചലാന്‍, പിഴകള്‍ ഇല്ലെന്ന് തെളിയിക്കണം

ഇതിനു ശേഷം മാത്രമേ പുതിയ സംസ്ഥാനത്ത് രജിസ്‌ട്രേഷന്‍ നടത്താനാകൂ. ഈ നടപടികള്‍ പൂര്‍ത്തിയാകാന്‍ പലപ്പോഴും ആഴ്ചകളോ മാസങ്ങളോ എടുക്കും.

കേരളത്തില്‍ വാഹനങ്ങളുടെ എണ്ണം വളരെ കൂടുതലാണ്. മോട്ടോര്‍ വാഹന വകുപ്പ് (MVD) കണക്കുകള്‍ പ്രകാരം 2025ല്‍ മാത്രം 8,78,863 പുതിയ വാഹനങ്ങള്‍ രജിസ്റ്റര്‍ ചെയ്തു. 2024നെ അപേക്ഷിച്ച് 12.8% വര്‍ധനവ്.

സംസ്ഥാനത്ത് ആകെ രജിസ്റ്റര്‍ ചെയ്ത വാഹനങ്ങള്‍ 1.88 കോടി എണ്ണമാണ്.

ഇത്രയും വാഹനങ്ങളുള്ള സംസ്ഥാനത്ത് ഇന്റര്‍-സ്റ്റേറ്റ് വാഹന ട്രാന്‍സ്ഫര്‍ ലളിതമാക്കുന്നത് വലിയ മാറ്റമായിരിക്കും എന്ന് വിദഗ്ധര്‍ പറയുന്നു.