ഇന്ത്യ പോസ്റ്റ് ഇനി വേറെ ലെവല്‍!; പാഴ്‌സലുകള്‍ 24 മണിക്കൂറില്‍ ലക്ഷ്യസ്ഥാനത്തെത്തും, സേവനം ബെംഗളൂരുവിലും

രേഖകളും പാഴ്‌സലുകളും ദ്രുതഗതിയില്‍ ലക്ഷ്യസ്ഥാനത്തെത്തിക്കാന്‍ ഇന്ത്യ പോസ്റ്റ്, '24 സ്പീഡ് പോസ്റ്റ്','48 സ്പീഡ് പോസ്റ്റ്' സേവനങ്ങള്‍ തുടങ്ങി.ഇതോടെ, രേഖകളും പാഴസലുകളും അടുത്ത ദിവസമോ, രണ്ട് ദിവസത്തിനകമോ രാജ്യത്തെ വിവിധ നഗരങ്ങളിലെത്തും. 

'24 സ്പീഡ് പോസ്റ്റ്,' '24 സ്പീഡ് പോസ്റ്റ് പാഴ്‌സല്‍' സേവനങ്ങള്‍ അടുത്ത ദിവസ ഡെലിവറി ഉറപ്പാക്കുമ്പോള്‍, '48 സ്പീഡ് പോസ്റ്റ്' രണ്ട് പ്രവൃത്തി ദിവസത്തിനുള്ളില്‍ രേഖകളെത്തിക്കുന്നു.
സ്ഥാപനങ്ങള്‍ക്ക്‌ സേവനം പ്രയോജനപ്പെടുത്താം.

പാഴ്‌സല്‍ അയക്കുന്നവര്‍ക്ക് വലിയ ആശ്വാസമാണ് 24 പാഴ്‌സല്‍ ഡെലിവറി. എയര്‍ ട്രാന്‍സ്‌പോര്‍ട്ട് വഴിയായതിനാല്‍ സമയ നഷ്ടം പരമാവധി കുറയും. സുരക്ഷ ഉറപ്പാക്കുന്നതിനായി ഒടിപി,പ്രൂഫ് ഓഫ് ഡെലിവറി, പിക്കപ്പ് , ഇന്‍ഷുറന്‍സ് സേവനങ്ങളും ഉള്‍പ്പെടുത്തിയിരിക്കുന്നു.

വ്യക്തിഗത ഉപഭോക്താക്കളേക്കാളുപരി, കമ്പനികള്‍ക്കും ബിസിനസ് സ്ഥാപനങ്ങള്‍ക്കും ഏറെ പ്രയോജനകരമാണ് പുതിയ സേവനങ്ങള്‍. വേഗതയേറിയ ഡെലിവറി ഉപയോഗപ്പെടുത്തി, ബിസിനസ് കാര്യക്ഷമമാക്കാം.

നടപ്പിലാക്കുന്ന നഗരങ്ങള്‍

പദ്ധതി നടപ്പിലാക്കുന്ന നഗരങ്ങളില്‍ ബെംഗളൂരുവും ഉള്‍പ്പെടുന്നു. ഡല്‍ഹി, മുംബൈ, ചെന്നൈ, കൊല്‍ക്കത്ത, ഹൈദരാബാദ് എന്നിവയാണ് മറ്റ് നഗരങ്ങള്‍. ക്രമേണ സേവനം മറ്റിടങ്ങളിലേയ്ക്കും വ്യാപിപ്പിക്കും.

നിരക്ക്

5 കിലോഗ്രാം വരെ ഭാരമുള്ള പാഴ്‌സലുകള്‍ക്ക് വോള്യൂമെട്രിക് വെയ്റ്റ് അല്ലെങ്കില്‍ യഥാര്‍ത്ഥ ഭാരം ഇവയില്‍ ഏതാണോ കൂടുതല്‍ അതിനുള്ള നിരക്കുകളും ബാധകമാകും. രജിസ്‌ട്രേഷന്‍ ഫീസ് ഓരോ ഇനത്തിനും 5 രൂപ. ജിസ്ടിയും ബാധകമാണ്.

നിബന്ധനകള്‍

ഭാരം, വലുപ്പം, ഉള്ളടക്കം എന്നിവയുമായി ബന്ധപ്പെട്ട് നിലവിലുള്ള സ്പീഡ് പോസ്റ്റ് നിബന്ധനകള്‍ ബാധകമാക്കിയിരിക്കുന്നു. നഷ്ടപരിഹാര വ്യവസ്ഥകളും നിലവിലുള്ളതുപോലെ തുടരും.

ആശയവിനിമയ മന്ത്രാലയത്തിന്റെ പോസ്റ്റ് ഓഫീസ് (സെക്കന്റ് അമന്റ്‌മെന്റ്) നിയന്ത്രണങ്ങള്‍ 2026 പ്രകാരമുള്ള പദ്ധതി, മാര്‍ച്ച് 17 നാണ് നടപ്പിലാകുക. ആദ്യഘട്ടത്തില്‍ ഡല്‍ഹി, മുംബൈ, ചെന്നൈ, കൊല്‍ക്കത്ത, ബെംഗളൂരു, ഹൈദരാബാദ് നഗരങ്ങളില്‍ സേവനം ലഭ്യമാകും. പിന്നീട് മറ്റ് നഗരങ്ങളിലേയ്ക്കും വ്യാപിപ്പിക്കും.