ഏതൊരാൾക്കും 10 ശതമാനം ഇളവില്‍ ട്രെയിൻ ടിക്കറ്റ് റിസർവ് ചെയ്യാം; കറന്റ് ബുക്കിം​ഗിന്റെ ​ഗുണങ്ങളറിയാം

അവസാന നിമിഷം യാത്രയ്ക്കൊരുങ്ങുന്നവരാണെങ്കിൽ തീവണ്ടിയിൽ റിസർവേഷൻ ടിക്കറ്റ് ലഭിക്കുക എന്നത് ബുദ്ധിമുട്ടുള്ള കാര്യമാണ്. പ്രത്യേകിച്ച് തിരക്കുള്ള റൂട്ടുകളിൽ. ഇവിടെ പലരും ഉപയോ​ഗിക്കുന്നത് തത്‍കാൽ ടിക്കറ്റ് ബുക്കിം​ഗാണ്. ജനറൽ ക്വാട്ടയിൽ ബുക്ക് ചെയ്യുന്നതിനേക്കാൾ ഉയർന്ന വില നൽകിയാണ് തത്കാൽ ടിക്കറ്റുകൾ നേടുന്നത്.

സ്ലീപ്പർ ടിക്കറ്റിന് തന്നെ 100 രൂപയോളം അധികം നൽകേണ്ടി വരുന്നുണ്ട്. എന്നാൽ തീവണ്ടി യാത്രക്കാർക്ക് ഏറ്റവും അവസാന നിമിഷം ടിക്കറ്റ് ബുക്ക് ചെയ്യാനും ടിക്കറ്റ് വിലയിൽ 10 ശതമാനം ഇളവ് നേടാനും സാധിക്കുന്നൊരു വഴിയാണ് കറന്റ് ബുക്കിം​ഗ്. ഇത് എങ്ങനെയെന്ന് വിശദമായി നോക്കാം.

എന്താണ് കറന്റ് ബുക്കിം​ഗ്

ഇന്ത്യന്‍ റെയില്‍വെയില്‍ ടിക്കറ്റ് ബുക്കിംഗിന് ഐആര്‍സിടിസി നല്‍കുന്നൊരു തരം റിസര്‍വേഷനാണ് കറന്റ് റിസര്‍വേഷന്‍. തീവണ്ടി യാത്രയുടെ ചാര്‍ട്ട് തയ്യാറാക്കിയതിന് ശേഷം ഒഴിവ് വരുന്ന ടിക്കറ്റുകളാണ് കറന്റ് ബുക്കിംഗ് വഴി റിസര്‍വ് ചെയ്യാന്‍ സാധിക്കുക. തീവണ്ടി യാത്ര പുറപ്പെടുന്നതിന് 4 മണിക്കൂര്‍ മുന്‍പാണ് ചാര്‍ട്ട് തയ്യാറാക്കുക.

ഇതിന് ശേഷം കറന്റ് ബുക്കിംഗ് ഉപയോഗപ്പെടുത്താനാകും. ഐആര്‍സിടിസി ആപ്പ് വഴിയാണ് ടിക്കറ്റ് ബുക്ക് ചെയ്യാനാവുക. ഏത് സ്റ്റേഷനില്‍ നിന്നാണോ ടിക്കറ്റ് ബുക്ക് ചെയ്യേണ്ടത്, അവിടെ തീവണ്ടി എത്തുന്നതിന് 3 മണിക്കൂര്‍ മുന്‍പ് ടിക്കറ്റ് ബുക്ക് ചെയ്യണം.

10 ശതമാനം ഇളവ്

കറന്റ് ബുക്കിം​ഗ് വഴി എടുക്കുന്ന ടിക്കറ്റിന് 10 ശതമാനത്തോളം ഇളവ് ടിക്കറ്റ് വിലയിൽ ലഭിക്കും. ചാർട്ട് തയ്യാറാക്കിയതിന് ശേഷം ബർത്തുകൾ ലഭ്യമാണെങ്കിൽ ടിക്കറ്റ് ബുക്കിംഗിൽ 10 ശതമാനം കിഴിവ് നൽകും. കണ്ണൂരിൽ നിന്ന് കോട്ടയത്തേക്ക് സെക്കന്റ് എസി ടിക്കറ്റ് നിരക്ക് 865 രൂപയാണ്.

കറന്റ് ബുക്കിം​ഗിൽ 785 രൂപ അടിസ്ഥാന നിരക്കിൽ ടിക്കറ്റ് ലഭിക്കും. എല്ലാ ചാർജുമടക്കം 808 രൂപയ്ക്ക് ടിക്കറ്റ് ലഭിക്കും. പ്രീമിയം, സുവിധ ട്രെയിനുകളിലെ കറന്റ് ബുക്കിംഗ് നിരക്ക് അവസാന ബുക്കിംഗ് നിരക്കിന് തുല്യമായിരിക്കും. 

ശ്രദ്ധിക്കേണ്ട കാര്യങ്ങൾ

ചാർട്ട് തയ്യാറാക്കിയ ശേഷം വിവിധ റിസർവേഷനുകളിൽ ബാക്കിയുള്ള ടിക്കറ്റുകളാണ് കറന്റ് ബുക്കിം​ഗിനായി നൽകുന്നത്. റിസർവേഷനുകൾ പൂർത്തിയായാൽ ടിക്കറ്റ് ലഭിക്കാനുള്ള സാധ്യതയില്ല. ഇതിനാൽ കറന്റ് ബുക്കിം​ഗിനെ അമിതമായി ആ​ശ്രയിക്കാൻ സാധിക്കില്ല.

കറന്റ് ബുക്കിം​ഗ് വഴിയെടുത്ത ടിക്കറ്റിൽ ബോര്‍ഡിംഗ് പോയിന്റ് മാറ്റാന്‍ സാധിക്കില്ല. പേര്, പ്രായം, ലിം​ഗം എന്നിവയും മാറ്റാൻ സാധിക്കില്ല. കറന്റ് ബുക്കിം​ഗ് വഴി കണ്‍ഫേം ടിക്കറ്റ് മാത്രമെ ബുക്ക് ചെയ്യാന്‍ സാധിക്കുകയുള്ളൂ. കറന്റ് ബുക്കിം​ഗിൽ ടിക്കറ്റ് ലഭിക്കാനുള്ള സാധ്യത ഉറപ്പാക്കാൻ സാധിക്കാത്തതിനാൽ തത്കാൽ ബുക്കിം​ഗ് നോക്കാവുന്നതാണ്. 

തത്കാൽ ബുക്കിം​ഗ്

ജനറൽ ക്വാട്ടയിൽ റിസർവേഷൻ ടിക്കറ്റ് ലഭിക്കാത്ത സാഹചര്യത്തിൽ അധിക നിരക്കിൽ ടിക്കറ്റ് നേടാനുള്ള വഴിയാണ് തത്കാൽ ബുക്കിം​ഗ്.
ഇതിനായി ഓരോ തീവണ്ടിയിലും നിശ്ചിത ശതമാനം ടിക്കറ്റുകള്‍ നീക്കി വെയ്ക്കും. ചാർട്ട് തയ്യാറാക്കുന്നതിന് തൊട്ട് മുന്‍പുള്ള ദിവസമാണ് തത്കാല്‍ ടിക്കറ്റ് ബുക്ക് ചെയ്യാന്‍ സാധിക്കുക. അതായത് തീവണ്ടി പുറപ്പെടുന്നതിന് തൊട്ട്മുൻപുള്ള ദിവസം.

15-ാം തീയതി യാത്രയുള്ള വ്യക്തി യാത്ര ചെയ്യാൻ ഉദ്യേശിക്കുന്ന തീവണ്ടി 14-ാം തീയതി പുറപ്പെട്ടുന്നുണ്ടെങ്കില്‍ 13-ാം തീയതി ടിക്കറ്റ് ബുക്ക് ചെയ്യണം. എസിക്ക് ക്ലാസുകളിലെ തത്കാല്‍ ടിക്കറ്റ് ബുക്കിംഗ് 10 മണിക്ക് ആരംഭിക്കും. സ്ലീപ്പര്‍ ക്ലാസ് തത്കാല്‍ ടിക്കറ്റുകള്‍ 11 മണിക്കാണ് ബുക്കിംഗ് ആരംഭിക്കുക. തത്കാൽ ബുക്കിം​ഗ് വഴിയെടുത്ത ടിക്കറ്റ് റദ്ദാക്കിയാൽ റീഫണ്ട് ലഭിക്കില്ല.