ട്രെയിനിൽ കൺഫേം ടിക്കറ്റ് കിട്ടാൻ അവസാന ശ്രമം; കറന്റ് ബുക്കിം​ഗ് എങ്ങനെ; സാധ്യതകളറിയാം

വേനലവധിക്കാലം അവസാനിക്കാനിക്കുകയാണ്. തീവണ്ടികളിൽ തിരക്കേറുന്ന കാലം. ഈ സമയത്ത് കൺഫേംഡ് ടിക്കറ്റ് ലഭിക്കുന്നത് വെല്ലുവിളി നിറഞ്ഞ കാര്യമാണ്. തിരക്കേറിയ സമയത്ത് 'തത്കാൽ' ടിക്കറ്റ് റിസർവേഷൻ പോലും ലഭിക്കാതെ സാഹചര്യങ്ങളുണ്ട്. ടിക്കറ്റുകളുടെ സ്ഥിതി ഇങ്ങനെയാണെങ്കിലും അടിയന്തര സാഹചര്യമുണ്ടെങ്കിൽ ദീർഘയാത്ര ചെയ്യണമെങ്കിൽ ട്രെയിൻ യാത്ര മാത്രമാണ് ഇന്നത്തെ സാഹചര്യം. ഈ സാഹചര്യത്തിൽ കൺഫേം ടിക്കറ്റില്ലാതെ ട്രെയിനിൽ യാത്ര ചെയ്യുന്നതിനെ പറ്റിയും കറന്റ് ബുക്കിം​ഗിന്റെ സാധ്യതകളെ പറ്റിയും യാത്രക്കാർ അറിഞ്ഞിരിക്കണം.

കൺഫേം ടിക്കറ്റില്ലാതെ യാത്ര ചെയ്യാമോ

ഇന്ത്യൻ റെയിൽവേയുടെ നിയമങ്ങൾ പ്രകാരം കൺഫേം ടിക്കറ്റ് ലഭിക്കാത്ത യാത്രക്കാരനാണെങ്കിൽ കയ്യിലുള്ള വെയിറ്റിംഗ് ടിക്കറ്റ് ഉപയോഗിച്ച് യാത്ര ചെയ്യാൻ സാധിക്കും. ഈ ഓപ്‌ഷൻ ഉപയോഗിക്കുന്നതിന് യാത്രക്കാരന്റെ കയ്യിൽ കൗണ്ടറിൽ നിന്നെടുത്ത റിസർവേഷൻ ടിക്കറ്റ ഉണ്ടായിരിക്കണം.

കൺഫേം ലഭിക്കാത്ത ഓൺലൈൻ ടിക്കറ്റുകൾ ഈ ഓപ്ഷൻ ഉപയോ​ഗിക്കാൻ സാധിക്കില്ല. ഓൺലൈൻ ടിക്കറ്റുകൾ ചാർട്ട് തയ്യാറാക്കിയതിന് ശേഷവും വെയ്റ്റിം​ഗ് ലിസ്റ്റിലാണെങ്കിൽ ടിക്കറ്റ് സ്വമേധയ ക്യാൻസലായി പണം യാത്രക്കാരന് തിരികെ ലഭിക്കുകയും ചെയ്യും. ഇതിനാൽ ഓൺലൈൻ യാത്രക്കാർക്ക് ഈ സൗകര്യം ഉപയോ​ഗിക്കാൻ സാധിക്കില്ല. 

ടിടിഇയെ സമീപിക്കാം

കയ്യിൽ വെയിറ്റിം​ഗ് ടിക്കറ്റുമായി ട്രെയിനിൽ കയറിയ ശേഷം സീറ്റ് ഒഴിഞ്ഞുകിടക്കുന്നുണ്ടോ എന്നറിയാൻ ടിടിഇയെ സമീപിക്കണം. ഇതോടൊപ്പം IRCTC Reservation Chart ഓൺലൈനായി പരിശോധിച്ചും തീവണ്ടിയിൽ കയറാം. അധിക സീറ്റ് അവശേഷിക്കുന്നുണ്ടെങ്കിൽ ടിക്കറ്റ് പരിശോധകൻ ലഭ്യമായ സീറ്റ് യാത്രക്കാരന് അനുവദിക്കും. 

കറന്റ് ബുക്കിം​ഗ്

അവസാന ഘട്ടത്തിലെ യാത്രക്കാർക്ക് ഉപകാരപ്പെടുന്നൊരു മാർ​ഗമാണ് കറന്റ് ബുക്കിം​ഗ്. സാധാരണ ​ഗതിയിൽ പരിശോധിക്കുമ്പോൾ വെയിറ്റിം​ഗ് ലിസ്റ്റ് കാണിക്കുന്ന ടിക്കറ്റുകൾ പോലും കറന്റ് ബുക്കിം​ഗിലൂടെ ലഭിക്കാൻ സാധ്യതയുണ്ട്. ഇന്ത്യന്‍ റെയില്‍വെയില്‍ ടിക്കറ്റ് ബുക്കിംഗിന് ഐആര്‍സിടിസി നല്‍കുന്നൊരു തരം റിസര്‍വേഷനാണ് കറന്റ് റിസര്‍വേഷന്‍.

തീവണ്ടി യാത്രയുടെ ചാര്‍ട്ട് തയ്യാറാക്കിയതിന് ശേഷം ഒഴിവ് വരുന്ന ടിക്കറ്റുകളാണ് കറന്റ് ബുക്കിംഗ് വഴി റിസര്‍വ് ചെയ്യാന്‍ സാധിക്കുക. തീവണ്ടി യാത്ര പുറപ്പെടുന്നതിന് 4 മണിക്കൂര്‍ മുന്‍പാണ് ചാര്‍ട്ട് തയ്യാറാക്കുക. 

ബുക്കിംഗ് സമയം

വെയ്റ്റിം​ഗ് ലിസ്റ്റ്, ആർഎസി ടിക്കറ്റുകൾ നൽകിയ ശേഷവും ട്രെയിനിൽ ഒഴിവ് വരുന്ന ടിക്കറ്റുകളാണ് കറന്റ് ബുക്കിം​ഗിന് ലഭ്യമാവുക. ഇതിനാൽ വളരെ കുറഞ്ഞ അളവിലാണ് കറന്റ് ബുക്കിം​ഗിന് ടിക്കറ്റുകൾ ലഭിക്കുന്നത്. ചാർട്ട് തയ്യാറാക്കിയ ശേഷം ശേഷം കറന്റ് ബുക്കിംഗ് ഉപയോഗപ്പെടുത്താനാകും.

ഐആര്‍സിടിസി ആപ്പ് വഴിയാണ് ടിക്കറ്റ് ബുക്ക് ചെയ്യാനാവുക. ഏത് സ്റ്റേഷനില്‍ നിന്നാണോ ടിക്കറ്റ് ബുക്ക് ചെയ്യേണ്ടത്, അവിടെ തീവണ്ടി എത്തുന്നതിന് 3 മണിക്കൂര്‍ മുന്‍പ് ടിക്കറ്റ് ബുക്ക് ചെയ്യണം.

ചാർട്ട് പരിശോധിക്കാം

കറന്റ് ബുക്കിം​ഗ് ചെയ്യാൻ സാധിച്ചില്ലെങ്കിലും സീറ്റുകൾ ഒഴിവുണ്ടോ എന്നറിയാൻ റിസർവേഷൻ ചാർട്ട് പരിശോധിക്കാം. ഇവിടെ ഓരോ ക്ലാസിലും ടിക്കറ്റുകൾ ലഭ്യമാണെങ്കിൽ അക്കാര്യം വ്യക്തമായി കാണിക്കും. ജനറൽ ടിക്കറ്റുമായി ട്രെയിനിൽ കയറി ടിടിഇ യെ കണ്ട് ടിക്കറ്റ് മാറ്റിയെടുക്കാൻ സാധിക്കും. 

ശ്രദ്ധിക്കേണ്ട കാര്യങ്ങൾ

* ചാർട്ട് തയ്യാറാക്കിയ ശേഷം വിവിധ റിസർവേഷനുകളിൽ ബാക്കിയുള്ള ടിക്കറ്റുകളാണ് കറന്റ് ബുക്കിം​ഗിനായി നൽകുന്നത്.

* റിസർവേഷനുകൾ പൂർത്തിയായാൽ ടിക്കറ്റ് ലഭിക്കാനുള്ള സാധ്യതയില്ല. ഇതിനാൽ കറന്റ് ബുക്കിം​ഗിനെ അമിതമായി ആ​ശ്രയിക്കാൻ സാധിക്കില്ല.

* കറന്റ് ബുക്കിം​ഗ് വഴിയെടുത്ത ടിക്കറ്റിൽ ബോര്‍ഡിംഗ് പോയിന്റ് മാറ്റാന്‍ സാധിക്കില്ല. പേര്, പ്രായം, ലിം​ഗം എന്നിവയും മാറ്റാൻ സാധിക്കില്ല.

* കറന്റ് ബുക്കിം​ഗ് വഴി കണ്‍ഫേം ടിക്കറ്റ് മാത്രമെ ബുക്ക് ചെയ്യാന്‍ സാധിക്കുകയുള്ളൂ.