ജാഗ്വാർ ലാൻഡ് റോവർ വിൽപ്പന 12 ശതമാനം ഉയർന്നു: ഒഹരിവിപണിയില്‍ നേട്ടം കൊയ്ത് ടാറ്റാ മോട്ടോഴ്സ്

ദില്ലി: കമ്പനിയുടെ ഉടമസ്ഥതയിലുള്ള ജാഗ്വാർ ലാൻഡ് റോവറിന്‍റെ ചില്ലറ വിൽപ്പനയിൽ 12.4 ശതമാനം വർധന രേഖപ്പെടുത്തിയതിനെ തുടർന്ന് ടാറ്റാ മോട്ടോഴ്‌സിന്റെ ഓഹരികൾ ആറ് ശതമാനം ഉയർന്നു. 2020-21 നാലാം പാദത്തിൽ ജാഗ്വാർ ലാൻഡ് റോവറിന്‍റെ റീട്ടെയിൽ വിൽപ്പനയിൽ 12.4 ശതമാനം വർധനവോടെ 1,23,483 യൂണിറ്റായിരുന്നു. തിങ്കളാഴ്ച ടാറ്റാ മോട്ടോഴ്സിന്‍റെ ഓഹരി വില ബിഎസ്ഇയില്‍ 5.62 ശതമാനം ഉയർന്ന് 302.70 രൂപയായി. ഒരു ഘട്ടതില്‍ 6.24 ശതമാനം ഉയർന്ന് 304.50 രൂപയിലേക്ക് ഇത് എത്തിയിരുന്നു. എൻ‌എസ്‌ഇയിൽ ഇത് 5.68 ശതമാനം ഉയർന്ന് 302.85 രൂപയിലാണ് ക്ലോസ് ചെയ്തത്.

ട്രേഡ് ചെയ്ത വോളിയം കണക്കനുസരിച്ച്, 78.13 ലക്ഷം ഓഹരികൾ ബി‌എസ്‌ഇയിലും 11.68 കോടിയിലധികം ഷെയറുകള്‍ എന്‍എസ്ഇയിലുമാണ് വ്യാപാരം നടന്നത്. കോവിഡ് -19 ന്റെ ആഘാതത്തിൽ നിന്ന് മികച്ച രീതിയില്‍ പുറത്ത് വന്നുകൊണ്ടിരിക്കുകയാണെന്ന് പറഞ്ഞ ജെ‌എൽ‌ആർ, ചൈനയിലെ അവസാന പാദ വിൽ‌പന 127 ശതമാനം ഉയർ‌ന്നെന്നും വ്യക്തമാക്കുന്നു. മുൻ‌വർഷത്തെ അപേക്ഷിച്ച് കോവിഡ് വ്യാപനം വിപണിയെ സാരമായി ബാധിച്ചുവെന്നും അവര്‍ അഭിപ്രായപ്പെട്ടു.

വടക്കേ അമേരിക്കയിലെ വിൽപ്പനയും വർഷം തോറും (10.4 ശതമാനം) ഉയർന്നു. മറ്റ് പ്രദേശങ്ങളില്‍ കോവിഡിന് മുമ്പുള്ളതിനേക്കാൾ കുറവാണ്,
യുകെ 6.8 ശതമാനത്തിന്‍റെയും യൂറോപ്പില്‍ 4.9 ശതമാനം ഇടിവും ഉണ്ടായിട്ടുണ്ടെന്ന് ജാഗ്വാർ ലാൻഡ് റോവര്‍ അധികൃതര്‍ വ്യക്തമാക്കി. 2020-21 സാമ്പത്തിക വർഷത്തിൽ ജെ‌എൽ‌ആറിന്റെ ആഗോള റീട്ടെയിൽ വിൽ‌പന 4,39,588 യൂണിറ്റായിരുന്നു. മുൻ‌വർഷത്തെ അപേക്ഷിച്ച് 13.6 ശതമാനം ഇടിവാണ് ആകെ ഉണ്ടായിരിക്കുന്നത്.

കോവിഡ് -19 പാൻഡെമിക് ആഗോള വാഹന വ്യവസായത്തിൽ നിരന്തരമായ സ്വാധീനം ചെലുത്തുന്നുണ്ടെങ്കിലും, സാമ്പത്തിക വർഷം അവസാനത്തോടെ വിൽ‌പനയിൽ വർദ്ധനവുണ്ടായതിൽ സന്തോഷമുണ്ടെന്നായിരുന്നു ജെ‌എൽ‌ആർ ചീഫ് കൊമേഴ്‌സ്യൽ ഓഫീസർ ഫെലിക്സ് ബ്രൗട്ടിഗാം അഭിപ്രായപ്പെട്ടത്.