1 ലക്ഷം 16 ലക്ഷമാക്കിയ ഓഹരി, വളർച്ച 1,600 ശതമാനം, ഈ സ്‌മോൾക്യാപ് ഓഹരി പൊളിയല്ലേ...

ഓഹരി വിപണിയിലെ നിരവധി കമ്പനികളാണ് ഒരു വർഷത്തിനുള്ളിൽ നിക്ഷേപകരുടെ പണം ഇരട്ടിയാക്കിയത്. ചുരുങ്ങിയ സമയത്തിനുള്ളിൽ മികച്ച ലാഭം നൽകുന്ന കമ്പനികളെ മൾട്ടിബാഗർ ഓഹരികളെന്നാണ് വിശേഷിപ്പിക്കുന്നത്. നിക്ഷേപകർക്ക് ഒരു വർഷത്തിനുള്ളിൽ 1,600 ശതമാനം ലാഭം നൽകിയ സ്റ്റീൽ ഓഹരിയുടെ വിശദാശങ്ങൾ നമുക്ക് ഇന്ന് പരിശോധിക്കാം. ജയ് ബാലാജി ഇൻഡസ്ട്രീസാണ് നിക്ഷേപകർക്ക് കണ്ണ് തള്ളുന്ന ലാഭം നൽകിയ കമ്പനി.

കീശ വീർപ്പിച്ച സ്റ്റീൽ ഓഹരി

ബിഎസ്ഇയിൽ 3.50 ശതമാനം ഇടിവോടെ 1027.75 രൂപ എന്നതാണ് നിലവിൽ ജയ് ബാലാജി ഇൻഡസ്ട്രീസിന്‍റെ ഓഹരി വില. കഴിഞ്ഞ 5 ദിവസത്തിനിടെ 2.65 ശതമാനം വളർച്ച ഓഹരി നേടിയിട്ടുണ്ട്. 9 ശതമാനമാണ് കഴിഞ്ഞ ഒരു മാസത്തെ മുന്നേറ്റം. ആറ് മാസത്തിനിടെ 85.27 ശതമാനം ലാഭം നിക്ഷേപകർക്ക് നൽകാനും ഓഹരിക്ക് സാധിച്ചു.

2023 ജൂലൈ മുതൽ ഓഹരി അതിൻ്റെ കുത്തനെ ഉയർന്ന റാലി ആരംഭിച്ചു. 2024 ഫെബ്രുവരി 8 വരെ ആ റാലി തുടരുകയും ചെയ്തു. അതിന് ശേഷം ഓഹരി ഏകീകരണത്തിന്‍റെ പാതയിലാണ്. കഴിഞ്ഞ ഒരു വർഷം കൊണ്ട് 1600 ശതമാനത്തിന്‍റെ വളർച്ച. ദീർഘകാല വീക്ഷണകോണിൽ നിന്ന് നോക്കുമ്പോൾ, കഴിഞ്ഞ അഞ്ച് വർഷങ്ങളിൽ 3,215 ശതമാനവും കഴിഞ്ഞ 10 വർഷങ്ങളിൽ 6,155 ശതമാനവും ആദായമാണ് ഈ സ്റ്റോക്ക് നൽകിയതെന്ന് ബിഎസ്ഇ വെബ്‌സൈറ്റ് പറയുന്നു.

1307 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില. 55.55 രൂപയാണ് 52 ആഴ്ചയിലെ ഏറ്റവും താഴ്ന്ന ഓഹരി വില. കമ്പനിയുടെ വിപണി മൂലധനം ഏപ്രിൽ 30 വരെ 16,819.16 കോടി രൂപയാണ്. ഓഹരി എസ് ആൻ്റ് പി ബിഎസ്ഇ സ്മോൾക്യാപ്പിൻ്റെ ഒരു ഘടകമാണ്.

10,000 രൂപയുടെ നിക്ഷേപം ഇന്ന് 1 ലക്ഷം

2023 മെയ് 2 ന് 61.05 രൂപയായിരുന്നു ജയ് ബാലാജി ഇൻഡസ്ട്രീസിന്‍റെ ഓഹരി വില. എന്നാൽ ഇതുവരെ ഓഹരി 1,583.5 ശതമാനം ഉയർന്ന് 1027. 75 രൂപയിലെത്തിയിരിക്കുകയാണ്. അതായത് കഴിഞ്ഞ വർഷം ആരെങ്കിലും ഈ ഓഹരിയിൽ 10,000 രൂപ നിക്ഷേപിച്ചെങ്കിൽ, ഇന്ന് അതിന്‍റെ മൂല്യം 1.68 ലക്ഷം രൂപയായി വളർന്നിട്ടുണ്ടാകും. 1 ലക്ഷം രൂപയുടെ ഓഹരി വാങ്ങിയിരുന്നെങ്കിൽ അതിന്‍റെ മൂല്യം ഇപ്പോൾ ഏകദേശം 16 ലക്ഷം രൂപയായി വളർന്നിട്ടുണ്ടാകും.

ജയ് ബാലാജി ഇൻഡസ്ട്രീസ് ലിമിറ്റഡ്

രാജ്യത്ത് അയൺ & സ്‌റ്റീൽ ഉൽപന്നങ്ങളുടെ നിർമാണം നടത്തുന്ന സ്‌മാൾക്യാപ് കമ്പനിയാണ് ജയ് ബാലാജി ഇൻഡസ്ട്രീസ്. പിഗ് അയൺ, സ്പോഞ്ച് അയർ, ടിഎംടി ബാറുകൾ, ഫെറോ ക്രോം തുടങ്ങിയവയും കമ്പനിയുടെ പ്രധാന ഉത്പന്നങ്ങളാണ്. ഇന്ത്യയിലെ വിവിധ സംസ്ഥാനങ്ങളിലും, മറ്റ് രാജ്യങ്ങളിലും ഇവർക്ക് ബിസിനസുകൾ ഉണ്ടെന്നതാണ് സവിശേഷത. കൊൽക്കത്ത ആസ്ഥാനമായി പ്രവർത്തിക്കുന്ന ജയ് ബാലാജി ഇൻഡസ്ട്രീസ് ലിമിറ്റഡ് 1999-ലാണ് സ്ഥാപിച്ചത്.

ഷെയർ ഹോൾഡിംഗ്

2024 മാർച്ച് 31 വരെ കമ്പനിയുടെ 60.80 ശതമാനം ഓഹരികളും പ്രൊമോട്ടർമാരുടെ ഉടമസ്ഥതയിലാണ്. വിദേശ പോർട്ട്‌ഫോളിയോ നിക്ഷേപകർ 3.05 ശതമാനവും ആഭ്യന്തര സ്ഥാപന നിക്ഷേപകർ 0.07 ശതമാനം ഓഹരികളും കൈവശം വയ്ക്കുമ്പോൾ സ്ഥാപനേതര ഓഹരിയുടമകൾക്ക് 36.07 ശതമാനം ഓഹരിയുണ്ട്.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.