രണ്ട് ദിവസത്തെ റാലിക്ക് അന്ത്യം, തകർന്നടിഞ്ഞ് ജെപി പവർ ഓഹരി, വാങ്ങിയവർ ഇന്ന് വിൽക്കണോ..?

കഴിഞ്ഞ രണ്ട് ട്രേഡിങ് സെഷനുകളിലെ ഗണ്യമായ റാലിക്ക് ശേഷം ജയ്പ്രകാശ് പവർ വെഞ്ച്വേഴ്‌സിന്റെ (ജെപി പവർ) ഓഹരികൾ താഴേക്ക് വീഴുകയാണ്. ലാഭമെടുക്കലും കൗണ്ടറിലെ ഉയർന്ന വോള്യങ്ങളും കണക്കിലെടുത്ത് ജെപി പവറിന്‍റെ ഓഹരി വില ബിഎസ്ഇയിൽ 8.5% വരെ ഇടിഞ്ഞ് ദിവസത്തെ ഏറ്റവും താഴ്ന്ന നിലയായ 19.79 എത്തി. അദാനി ഗ്രൂപ്പ് ജയ്പ്രകാശ് പവർ വെഞ്ച്വേഴ്‌സിനെ ഏറ്റെടുക്കുന്നു എന്ന വാർത്ത വന്നതിന് പിന്നാലെയാണ് ജെപി പവർ ഓഹരി കുതിപ്പ് ആരംഭിച്ചത്. കഴിഞ്ഞ രണ്ട് ദിവസത്തിനുള്ളിൽ സ്‌ക്രിപ് 29 ശതമാനം ഉയർന്നു. നിക്ഷേപകർ ഇനി എന്താണ് ചെയ്യേണ്ടത്..?

അദാനിയുടെ ഏറ്റെടുക്കൽ

ജയപ്രകാശ് അസോസിയേറ്റ്‌സിനെ (ജെഎഎൽ) 14,535 കോടി രൂപയ്ക്ക് ഏറ്റെടുക്കാമെന്ന അദാനി ഗ്രൂപ്പിന്‍റെ നിർദ്ദേശത്തിന് വായ്പക്കാരുടെ അംഗീകാരം ലഭിച്ചിരുന്നു. വേദാന്തയെ പിന്തള്ളിയാണ് അദാനിയുടെ നീക്കം. കടക്കാരിൽ നിന്ന് 89 ശതമാനം വോട്ടുകൾ അദാനിക്കാണ് ലഭിച്ചത്. ജെപി പവറിൽ ജെഎഎല്ലിന് ഏകദേശം 24% ഓഹരി പങ്കാളിത്തമുള്ളതിനാൽ, അദാനിയെപ്പോലുള്ള സാമ്പത്തികമായി ശക്തനായ ഒരു സ്പോൺസറെ ഉൾപ്പെടുത്തി വിജയകരമായ ഒരു പരിഹാരം ജെപി പവറിന്റെ അടിസ്ഥാന ബിസിനസിന് അർത്ഥവത്തായ മൂല്യം സൃഷ്ടിക്കുമെന്ന് വിപണികൾ പ്രതീക്ഷിച്ചു. അതോടെയാണ് ഓഹരി വില മുകളിലേക്ക് കുതിച്ചത്.

നിലവിലെ ഓഹരി വില

എൻഎസ്ഇയിൽ 20.08 രൂപ എന്നതാണ് നിലവിൽ ഓഹരിയുടെ വില. കഴിഞ്ഞ ഒരുമാസത്തിനിടെ 11.49 ശതമാനം വളർച്ചയാണ് ഓഹരി നേടിയത്. ആറ് മാസത്തിനിടെ 35 ശതമാനം നേട്ടമുണ്ടാക്കാനും ഓഹരിക്ക് സാധിച്ചു. 27.70 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില. 12.36 രൂപയാണ് 52 ആഴ്ചയിലെ ഏറ്റവും കുറഞ്ഞ ഓഹരി വില.

നിക്ഷേപകർ ലാഭം ബുക്ക് ചെയ്യണോ..?

കഴിഞ്ഞ കുറച്ച് ആഴ്ചകളായി ജെപി പവർ ഓഹരികൾ കുത്തനെ ഉയർന്നു. അതുകൊണ്ടാണ് നിക്ഷേപകർ ലാഭം ബുക്ക് ചെയ്തത്. എന്നാൽ ഇന്നത്തെ തിരുത്തൽ ആരോഗ്യകരമാണ്. കമ്പനി പ്രവർത്തനപരമായ മെച്ചപ്പെടുത്തലുകൾ വരുത്തിയാൽ ഈ ചാഞ്ചാട്ടം അമിതമായ ഒരു റാലിക്ക് ശേഷം പതിവ് ഏകീകരണമായി മാറുമെന്നാണ് INVAsset PMS-ലെ ബിസിനസ് ഹെഡ് ഹർഷൽ ദസാനി അഭിപ്രായപ്പെടുന്നത്.

ജെപി പവർ ക്യു2 ഫലങ്ങൾ

രണ്ടാം പാദത്തിൽ ജെപി പവറിന്റെ ലാഭ വളർച്ച 182.10 കോടി രൂപയായി . കഴിഞ്ഞ വർഷം ഇതേ കാലയളവിൽ ഇത് 182.66 കോടി രൂപയായിരുന്നു. ആകെ വരുമാനം 1,305.19 കോടിയിൽ നിന്ന് 1,478.49 കോടിയായി ഉയർന്നു. ചെലവുകളും 1,070.76 കോടിയിൽ നിന്ന് 1,186.48 കോടിയായി വർദ്ധിച്ചു.

കടം കേറി തകർന്ന ഭീമൻ

ഗ്രേറ്റര്‍ നോയിഡയിലെ ജെപി ഗ്രീന്‍സ്, നോയിഡയിലെ ജെപി ഗ്രീന്‍സ് വിഷ് ടൗണ്‍, ജെവാര്‍ ഇന്റര്‍നാഷണല്‍ എയര്‍പോര്‍ട്ടിനടുത്തുള്ള ജെപി ഇന്റര്‍നാഷണല്‍ സ്‌പോര്‍ട്‌സ് സിറ്റി തുടങ്ങിയ പ്രധാന റിയല്‍ എസ്റ്റേറ്റ് പ്രോജക്ടുകൾ തുടങ്ങിയ ജയപ്രകാശ് അസോസിയേറ്റ്‌സിന് കീഴിലാണ്. നാഷണല്‍ കമ്പനി ലോ ട്രൈബ്യൂണലിന്റെ അലഹബാദ് ബെഞ്ച് വിധിയെ തുടര്‍ന്ന് 2024 ജൂണ്‍ 3 മുതല്‍ ജയ്പ്രകാശ് അസോസിയേറ്റ്സ് പാപ്പരത്ത നടപടികളിലേയ്ക്ക് കടന്നു. കടങ്ങള്‍ തിരിച്ചടയ്ക്കുന്നതില്‍ പരാജയപ്പെട്ടതായിരുന്നു പ്രധാന പ്രശ്‌നം.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.