സ്വർണവില തുണച്ചില്ല, ഓഹരി വിപണിയിൽ അടിതെറ്റി കല്യാൺ ജ്വല്ലേഴ്സ്, ഇടിവ് തുടരുമെന്ന് വിദഗ്ധർ

കല്യാൺ ജ്വല്ലേഴ്സ് - മലയാളികൾക്ക് പരിചയപ്പെടുത്തേണ്ട ആവശ്യമില്ല. തൃശ്ശൂരിൽ നിന്നും തുടങ്ങി ലോകം മുഴുവൻ വ്യാപിച്ച സ്വർണ സാമ്രാജ്യം. ഓഹരി വിപണിയിലേക്ക് വന്നാൽ 2021-ലാണ് കല്യാൺ ജ്വല്ലേഴ്സ് വിപണിയിൽ ലിസ്റ്റ് ചെയ്യുന്നത്. ദീർഘകാലാടിസ്ഥാനത്തിൽ മികച്ച വളർച്ച നേടാൻ കേരളത്തിന്‍റെ സ്വന്തം ഓഹരിക്ക് സാധിച്ചിട്ടുണ്ടെങ്കിലും കഴിഞ്ഞ കുറച്ചു നാളുകളായി കല്യാൺ ജ്വല്ലേഴ്‌സ് ഇന്ത്യ ലിമിറ്റഡിന്‍റെ ഓഹരി താഴേക്ക് വീഴുകയാണ്. സ്വർണവില ഉയരുമ്പോഴും കല്യാൺ ജ്വല്ലേഴ്‌സ് ഓഹരി താഴേക്ക് വീഴുകയാണ്.

ചൊവ്വാഴ്ചത്തെ വ്യാപാരത്തിൽ കല്യാൺ ജ്വല്ലേഴ്‌സ് ഓഹരികൾ 3.12 ശതമാനം ഇടിഞ്ഞ് 504 രൂപയിലെ ഒരു ദിവസത്തെ ഏറ്റവും താഴ്ന്ന നിലയിലെത്തി. അവസാനമായി ഓഹരി 2.33 ശതമാനം ഇടിഞ്ഞ് 508.10 രൂപയിലാണ് വ്യാപാരം അവസാനിപ്പിച്ചത്. വരും ദിവസങ്ങളിലും ഓഹരി താഴേക്ക് വീഴുമെന്നാണ് വിദഗ്ധർ വിലയിരുത്തുന്നത്. കാരണം നമുക്ക് പരിശോധിക്കാം.

പദഫലം

വരുമാനത്തിന്റെ കാര്യത്തിൽ, ജൂണ്‍ 30 ന് അവസാനിച്ച പാദത്തിൽ കമ്പനിയുടെ നികുതി ശേഷമുള്ള ലാഭം (PAT) 48.73 ശതമാനം വർധിച്ച് 264.08 കോടി രൂപയായി. കഴിഞ്ഞ വർഷം ഇതേ കാലയളവിൽ ഇത് 177.55 കോടി രൂപയായിരുന്നു. പ്രവർത്തനങ്ങളിൽ നിന്നുള്ള വരുമാനം 31.48 ശതമാനം ഉയർന്ന് 7,268.47 കോടി രൂപയായി. കഴിഞ്ഞ വർഷം ഇതേ കാലയളവിൽ ഇത് 5,527.81 കോടി രൂപയായിരുന്നു.

സ്വർണ്ണ വിലയിൽ ചാഞ്ചാട്ടം ഉണ്ടായിട്ടും 2026 സാമ്പത്തിക വർഷത്തിലെ ആദ്യ പാദത്തിൽ കമ്പനിക്ക് മികച്ച നേട്ടമുണ്ടാക്കാൻ സാധിച്ചെന്ന് കല്യാൺ ജ്വല്ലേഴ്‌സിന്‍റെ എക്‌സിക്യൂട്ടീവ് ഡയറക്ടർ രമേശ് കല്യാണരാമൻ പറഞ്ഞു. രാജ്യത്തുടനീളം വരാനിരിക്കുന്ന ഉത്സവ സീസണിൽ ഞങ്ങൾക്ക് പ്രതീക്ഷയുണ്ട്. അതുകൊണ്ടുതന്നെ
പുതിയ ശേഖരണങ്ങളും കാമ്പെയ്‌നുകളും ആരംഭിക്കുന്നതിനായി തയ്യാറെടുക്കുകയാണെന്നും അദ്ദേഹം കൂട്ടിച്ചേർത്തു.

ഇടിവ് തുടരും

2025-ൽ ഇതുവരെ 34.43 ശതമാനം നഷ്ടം കല്യാൺ ജ്വല്ലേഴ്‌സ് ഓഹരി നേരിട്ടിട്ടുണ്ട്. കല്യാൺ ജ്വല്ലേഴ്‌സ് ചാർട്ടുകളിൽ ദുർബലമായി കാണപ്പെടുന്നുവെന്നും 485-470 രൂപ എന്ന നിലയിലേക്ക് വീഴാൻ സാധ്യതയുണ്ടെന്നാണ് മാർക്കറ്റ് വിദഗ്ധർ ചൂണ്ടിക്കാട്ടുന്നത്. എന്നാൽ 540 രൂപയ്ക്ക് മുകളിലേക്ക് ഉയർന്നാൽ ഓഹരി കൂടുതൽ മുകളിലേക്ക് ഉയർന്നേക്കാം. ഓഹരി നിർണായകമായ ഒരു തിരുത്തലിന് വിധേയമായി. മുമ്പത്തെ സ്വിംഗ് താഴ്ന്ന നില വീണ്ടും പരിശോധിച്ചു. 500 രൂപയ്ക്ക് താഴെയുള്ള ഒരു ഇടിവ്, ഹ്രസ്വകാല പ്രതീക്ഷകളെ കൂടുതൽ ദുർബലപ്പെടുത്തുകയും 490-485 രൂപയിലേക്ക് വലിച്ചിടുകയും ചെയ്യുമെന്നാണ് ഏഞ്ചൽ വണ്ണിലെ ടെക്നിക്കൽ & ഡെറിവേറ്റീവ് റിസർച്ച് സീനിയർ അനലിസ്റ്റ് ഓഷോ കൃഷൻ വിലയിരുത്തുന്നത്. 540 രൂപയ്ക്ക് മുകളിലുള്ള ഒരു നീക്കം മാത്രമേ നിലവിലുള്ള ബെയറിഷ് പ്രവണതയെ അസാധുവാക്കൂ എന്നും അദ്ദേഹം കൂട്ടിച്ചേർത്തു.

കല്യാൺ ജ്വല്ലേഴ്‌സ് ചാർട്ടുകളിൽ ദുർബലമായി കാണപ്പെടുന്നു. സമീപഭാവിയിൽ 470 രൂപയിലേക്ക് താഴാം. അതേസമയം പ്രതിരോധം 515 രൂപയിൽ കാണപ്പെടുന്നു എന്ന് റെലിഗെയർ ബ്രോക്കിംഗിലെ റീട്ടെയിൽ റിസർച്ച് സീനിയർ വൈസ് പ്രസിഡന്‍റ് രവി സിംഗ് കൂട്ടിച്ചേർത്തു. 2025 ജൂൺ വരെ, കേരളം ആസ്ഥാനമായുള്ള ആഭരണ സ്ഥാപനത്തിൽ പ്രൊമോട്ടർമാർക്ക് 62.82 ശതമാനം ഓഹരികളുണ്ടായിരുന്നു.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.