സംസ്ഥാന ബജറ്റ്‌ നാളെ: ഇത്തവണ ബജറ്റിൽ എന്തെല്ലാം?

തിരുവനന്തപുരം: പിണറായി വിജയൻ സർക്കാരിന്റെ 2021-22 സാമ്പത്തിക വർഷത്തേക്കുള്ള ബജറ്റ്‌ വെള്ളിയാഴ്‌ച ധനമന്ത്രി ഡോ. ടി എം തോമസ്‌ ഐസക്‌ നിയമസഭയിൽ അവതരിപ്പിക്കും. സമ്പൂർണ ബജറ്റാകും അവതരിപ്പിക്കുക. പിണറായി വിജയൻ സർക്കാരിന്റെ ആറാമത്തെ ബജറ്റാണ്‌ ധനമന്ത്രി വെള്ളിയാഴ്‌ച അവതരിപ്പിക്കുന്നത്.

കൊവിഡ് പ്രതിസന്ധികളെ തരണം ചെയ്യാൻ സർക്കാർ എന്തൊക്കെ പദ്ധതികളാണ് തയ്യാറാക്കിയിട്ടുള്ളതെന്ന് നാളെത്തെ ബജറ്റ് അവതരണത്തിലൂടെ വ്യക്തമാകും. തെരഞ്ഞെടുപ്പ് ബജറ്റ് എന്ന മുൻധാരണ വേണ്ടെന്ന് ധനമന്ത്രി നേരത്തെ തന്നെ മുന്നറിയിപ്പ് നൽകിയിരുന്നു. സുസ്ഥിര വികസനമാണ് മുൻബജറ്റുകൾ ലക്ഷ്യമിട്ടതെന്നും തുടർച്ചയായി അടുത്ത അഞ്ചുവർഷത്തേക്കുള്ള വ്യക്തമായ കർമ പദ്ധതി പ്രതീക്ഷിക്കാമെന്നും‌ ധനമന്ത്രി പറഞ്ഞു.

സംസ്ഥാന ബജറ്റ്‌ നാളെ: ഇത്തവണ ബജറ്റിൽ എന്തെല്ലാം?

ക്ഷേമ പദ്ധതികളിൽ സർക്കാരിന്റെ മുൻഗണന തുടരുമെന്ന സൂചനകളാണ് ഇപ്പോൾ ലഭിക്കുന്നത്. ക്ഷേമ പെൻഷനും മറ്റ് ക്ഷേമ പദ്ധതികൾക്കും വലിയ വകയിരുത്തലുണ്ടാകുമെന്നാണ് നിരീക്ഷകരുടെ വിലയിരുത്തൽ. ലക്ഷക്കണക്കിന് അഭ്യസ്ഥവിദ്യർക്ക് തൊഴിൽ ഉറപ്പാക്കുകയായിരിക്കും സർക്കാരിന്റെ അടുത്ത ലക്ഷ്യം.

അഞ്ചുവർഷത്തിൽ ശമ്പള പരിഷ്കരണമെന്ന വാഗ്ദാനം നടപ്പാക്കാൻ സർക്കാർ ബാധ്യസ്ഥമാണ്. അടുത്ത ഏപ്രിൽമുതൽ പരിഷ്കരിച്ച ശമ്പളം ലഭ്യമാകുന്ന നിലയിൽ ഉത്തരവിറക്കാനാകുമെന്നാണ് പ്രതീക്ഷ. എല്ലാവർക്കും സൗജന്യമായി കോവിഡ് വാക്സിൻ ഉറപ്പാക്കാനും പണം തടസ്സമാകില്ലെന്നാണ് വിവരം. കർഷകർക്ക്‌ മികച്ച താങ്ങുവിലയും, ഉൽപ്പന്ന സംഭരണ, സംസ്കരണ സംവിധാനങ്ങളും ഉറപ്പാക്കാൻ‌ ബജറ്റിൽ പ്രത്യേക വകയിരുത്തലുണ്ടാകുമെന്നും നിരീക്ഷകർ പ്രതീക്ഷിക്കുന്നു.