സിജെ റോയിയുടെ ആത്മഹത്യ; ജുഡീഷ്യല്‍ അന്വേഷണം ആവശ്യപ്പെട്ട് കേന്ദ്രത്തിന് മുഖ്യമന്ത്രിയുടെ കത്ത്

പ്രമുഖ റിയല്‍ എസ്റ്റേറ്റ് വ്യവസായി സിജെ റോയ് ആദായ നികുതി പരിശോധനയ്ക്കിടെ ആത്മഹത്യ ചെയ്ത സംഭവത്തില്‍ ജുഡീഷ്യല്‍ അന്വേഷണം വേണമെന്ന് മുഖ്യമന്ത്രി പിണറായി വിജയന്‍. ഇക്കാര്യം ആവശ്യപ്പെട്ട് അദ്ദേഹം കേന്ദ്ര ധനമന്ത്രി നിര്‍മ്മല സീതാരാമന് കത്തയച്ചു. സംഭവത്തിന്റെ ഞെട്ടലില്‍ നിന്നും വ്യാപാരി സമൂഹവും പൗരസമൂഹവും മുക്തരായിട്ടില്ല. രാജ്യത്തെ നികുതി നിര്‍വഹണത്തിനേറ്റ കളങ്കമാണിത്, മുഖ്യമന്ത്രി പറഞ്ഞു. ഈ സാഹചര്യത്തില്‍ മുന്‍ ജഡ്ജിയുടെ നേതൃത്വത്തില്‍ ഉന്നതതല അന്വേഷണം അനിവാര്യമാണ്.

ആദായനികുതി ഉദ്യോഗസ്ഥര്‍ പാലിക്കേണ്ട മര്യാദകളും അദ്ദേഹം വിശദീകരിക്കുന്നു. സാഹചര്യം ആവശ്യപ്പെടുന്നെങ്കില്‍ നികുതി ഉദ്യോഗസ്ഥര്‍ക്ക് കര്‍ശ്ശനമായി പെരുമാറേണ്ടിവരും. പക്ഷെ അത്തരം സന്ദര്‍ഭങ്ങളില്‍ ഉദ്യോഗസ്ഥര്‍ അതീവ ജാഗ്രത പാലിക്കേണ്ടതുണ്ട്. റെയ്ഡ് പുരോഗമിക്കുമ്പോള്‍ മറ്റൊരു മുറിയില്‍ പോയി റോയിക്ക് വെടിയുതിര്‍ക്കാന്‍ സാധിച്ചുവെന്നത് അങ്ങേയറ്റം ഗുരുതര വീഴ്ചയാണ്. ഉദ്യോഗസ്ഥര്‍ സാമാന്യ മാനദണ്ഡങ്ങള്‍ പോലും പാലിച്ചില്ലെന്നുവേണം കരുതാന്‍. ഈ സാഹചര്യത്തില്‍ പൊതുസമൂഹത്തിന്റെ വിശ്വാസ്യതയ്ക്കായി ജുഡീഷ്യല്‍ അന്വേഷണം ആവശ്യമാണ്. കര്‍ണ്ണാടക പോലീസ് നടത്തുന്ന അന്വേഷണം മാത്രം മതിയാകില്ല. നികുതി നിയമങ്ങളുടെ പേരില്‍ മനുഷ്യജീവന് വിലകല്‍പ്പിക്കാത്ത നിലപാട് അസ്വീകാര്യമാണെന്നും മുഖ്യമന്ത്രി പറഞ്ഞു.

റോയ്‌യുടെ മരണം
ജനുവരി 30-നാണ് കോണ്‍ഫിഡന്റ് ഗ്രൂപ്പ് ചെയര്‍മാന്‍ സിജെ റോയിയെ ബെംഗളൂരുവിലെ ഓഫീസില്‍ വെടിയേറ്റ് മരിച്ച നിലയില്‍ കണ്ടെത്തിയത്. ആദായ നികുതി ഉദ്യോഗസ്ഥര്‍ റെയ്ഡ് നടത്തുന്നതിനിടെ അദ്ദേഹം സ്വയം നിറയൊഴിക്കുകയായിരുന്നു. പൊതുവേദികളിലും സമൂഹമാധ്യമങ്ങളിലും സജീവമായിരുന്ന റോയിയുടെ മരണം അതുകൊണ്ടുതന്നെ ഏവരേയും ഞെട്ടിച്ചു.

വെള്ളിയാഴ്ച ഉച്ചയ്ക്ക് 12 മണിയോടെയാണ് ഐ-ടി വകുപ്പ് സംഘം റോയിയുടെ ഓഫീസിലെത്തുന്നത്. ഉച്ചയ്ക്ക് 2 മണിയോടെ റോയിയും സ്ഥലത്തെത്തി. ഉദ്യോഗസ്ഥര്‍ തുടരാന്‍ ആവശ്യപ്പെട്ടതിന്റെ അടിസ്ഥാനത്തില്‍ ക്യാബിനിലേയ്ക്ക് പോയ റോയിയെ പിന്നീട് വെടിയേറ്റ നിലയിലാണ് കണ്ടെത്തുന്നത്. ജീവനക്കാര്‍ ഉടന്‍ ആശുപത്രിയിലെത്തിച്ചെങ്കിലും മരണം സ്ഥിരീകരിച്ചു. ക്യാബിന്‍ സിസിടിവി നിരീക്ഷണത്തിലാണോ എന്ന കാര്യം വ്യക്തമല്ല. അദ്ദേഹം ക്യാബിനിലെത്തി മിനുറ്റുകള്‍ക്കകം വെടിയൊച്ച കേട്ടുവെന്നാണ് റിപ്പോര്‍ട്ടുകള്‍. റോയിയ്ക്ക് മറ്റ് പ്രശ്‌നങ്ങളൊന്നുമില്ലെന്ന് കുടുംബാംഗങ്ങള്‍ ആണയിടുന്നു. അതേസമയം ആത്മഹത്യക്കുറിപ്പ് കണ്ടെത്തിയതായാണ് വിവരം.