കേന്ദ്ര ബജറ്റിനു മുന്നേ പൊന്നിന് ഇന്നും വില ഉയർന്നു; സ്വർണ വില 62,000ലേക്ക് കുതിക്കുന്നു

2025 കേന്ദ്ര ബജറ്റ് ദിവസമായ ഇന്നും സ്വർണ വിലയിൽ രക്ഷയില്ല. ഇന്നും റെക്കോർഡ് വിലയിലാണ് സ്വർണം കുതിക്കുന്നത്. സാധാരണക്കാർക്ക് ആശ്വസിക്കാനുള്ള വകയില്ലാതെ സ്വർണ വില ഇന്ന് പവന് 120 രൂപ ഉയർന്ന് മുന്നേറുന്നു. നാല് ദിവസം കൊണ്ട് 1,880 രൂപയാണ് സ്വർണം പവന് വർദ്ധിച്ചത്. രാജ്യാന്തര വിപണിയിലെ മാറ്റങ്ങളാണ് കേരളത്തിലും സ്വർണത്തെ ശക്തയാക്കുന്നത്. സ്വർണാഭരണങ്ങൾ വാങ്ങുന്നത് വെറും സ്വപ്നമായി മാറുന്നു. ഈ ട്രെൻഡ് പരിശോധിച്ചാൽ വില ഇനിയും ഉയരും.

ഇന്നത്തെ വില

ഇന്ന് ഒരു ​ഗ്രാമിന് 15 രൂപ വർദ്ധിച്ച് 7745 രൂപയായി. പവന് 120 രൂപ വർദ്ധിച്ച് 61,960 രൂപയായി. ഇന്നത്തെ വിലപ്രകാരം 10 ​ഗ്രാം സ്വർണം വാങ്ങാൻ 77,450 രൂപയാവുന്നു. 24 കാരറ്റ് സ്വർണത്തിന് ഒരു ​ഗ്രാമിന് 8449 രൂപയും പവന് 67,592 രൂപയുമാവുന്നു. 18 ​കാരറ്റിന് ഒരു ​ഗ്രാമിന് 6337 രൂപയും പവന് 50,696 രൂപയുമാണ്.

ഒരു പവൻ ആഭരണത്തിന് എത്ര വേണം?

ഇന്നത്തെ വില പ്രകാരം പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നിവയും ചേർന്നാൽ കേരളത്തിലെ ജ്വല്ലറിയിൽ നിന്നും ഇന്ന് ഒരു പവൻ സ്വർണാഭരണം വാങ്ങാൻ ഏകദേശം 67,060 രൂപ വേണം. ഒരു ​ഗ്രാം ആഭരണത്തിന് ഇന്ന് ഏകദേശം 8,430 രൂപ കൊടുക്കണം. ഇതേ തുക എല്ലാ ജ്വല്ലറികളിലും ഒരുപോലെ വരില്ല. പണിക്കൂലിയിലെ വ്യത്യാസം ഈ തുകയിൽ മാറ്റം വരാൻ കാരണമാവുന്നു.

സ്വർണം വാങ്ങുമോ?

ഈ വിലക്കയറ്റത്തിൽ സാധാരണക്കാർക്കു പോലും ആശ്വാസമില്ല. വിവാഹാഘോഷങ്ങൾക്ക് തയ്യാറെടുക്കുന്നവർക്ക് വിലക്കയറ്റം വലിയ തിരിച്ചടിയാവുന്നു. നേരത്തെ ബുക്ക് ചെയ്യാത്തവർക്കാണ് ഇത് കാര്യമായി ബാധിക്കാൻ പോകുന്നത്. 22 കാരറ്റ് സ്വർണം ആഭരണ രൂപത്തിൽ വാങ്ങുമ്പോഴേക്കും 65,000 രൂപയ്ക്ക് മുകളിലേക്കാണ് വില ഉയരുന്നത്. ഇത് താങ്ങാവുന്നതിലും അപ്പുറമാണ്.