ഓടിത്തളർന്നു: ഇന്ന് സ്വർണ വിലയിൽ നേരിയ ഇടിവ്, വില കുറഞ്ഞിട്ടും നിരാശ കുറയുന്നില്ല

കുതിപ്പിനൊടുവിൽ നേരിയ ഇടിവ്. 6 ദിവസത്തെ വിലക്കയറ്റത്തിനൊടുവിലാണ് ഇന്ന് സ്വർണ വില കുറഞ്ഞത്. ഇന്ന് പവന് 80 രൂപയാണ് ഇടിഞ്ഞത്. 6 ദിവസം കൊണ്ട് പവന് 1000 രൂപയാണ് വർദ്ധിച്ചത്. അതിനാൽ ഇന്നത്തെ 80 രൂപ ഇടിവ് സാധാരണക്കാർക്ക് നിരാശ തന്നെയാണ്. എന്നാൽ വരും ദിവസങ്ങളിൽ വില ഇടിഞ്ഞാൽ ആശ്വസിക്കാം. 2025 ലെ പ്രവചനം സത്യമാവും എന്നതിനുള്ള ലക്ഷണങ്ങളാണ് സ്വർ‌ണ വിലയുടെ ഈ ഉയർച്ച. ആഭരണപ്രേമികൾക്കും വിവാഹാഘോഷങ്ങൾക്ക് ആഭരണം എടുക്കുന്നവർക്കും നിരാശ കുറയുന്നില്ല.

ഇന്നത്തെ വില

ഇന്ന് ഒരു ​ഗ്രാമിന് 10 രൂപ കുറഞ്ഞ് 7330 രൂപയായി. പവന് 80 രൂപ കുറഞ്ഞ് 58,640 രൂപയായി. ഇന്നത്തെ വിലപ്രകാരം 10 ​ഗ്രാം സ്വർണം വാങ്ങാൻ 73,300 രൂപയാവുന്നു. 24 കാരറ്റ് സ്വർണത്തിന് ഒരു ​ഗ്രാമിന് 7996 രൂപയും പവന് 63,968 രൂപയുമാവുന്നു. 18 ​കാരറ്റിന് ഒരു ​ഗ്രാമിന് 5997 രൂപയും പവന് 47,976 രൂപയുമാണ്.

ഇന്ന് രാജ്യാന്തര വില ഔൺസിന് 2673 ഡോളറിലാണ് വ്യാപാരം നടത്തുന്നത്. ഈ നേരിയ ചലനമാണ് കേരളത്തിലെ സ്വർണ വിലയേയും വീഴ്ത്താൻ ഇടയാക്കിയത്. സ്വർണ വില ഉയർന്നതോടെ സ്വർണ നിക്ഷേപങ്ങളിലും ആളുകൾ ധാരാളമായി നിക്ഷേപിക്കുന്നുണ്ടായിരുന്നു. ഇന്നത്തെ വിലക്കുറവ് താത്കാലികമാണ്. അതിനാൽ നാളെ വില ഉയരാനും സാധ്യതയുണ്ട്.

 സ്വർണ വില ഇനിയും ഉയരും. ഒക്ടോബറിലെ റെക്കോർഡ് തകർത്ത് പുതിയ റെക്കോർഡ് സൃഷ്ടിക്കാനുള്ള ഓട്ടത്തിലാണ് സ്വർണ വില. ഇന്നലെ വരെയുണ്ടായിരുന്ന ട്രെൻഡിൽ ഇന്നും വില ഉയർന്നാൽ 59000ലേക്ക് പെട്ടെന്ന് എത്താൻ സാധിച്ചേനെ. അതായത് 60000 എന്ന സംഖ്യ വിദൂരമല്ല. എപ്പോൾ വേണമെങ്കിലും ആ വിലയിലേക്ക് സ്വർണം എത്തും. 

ഒരു പവൻ ആഭരണത്തിന് എത്ര വേണം?

സ്വർണ വില ഉയരുമ്പോൾ ആഭരണത്തിൻ്റെ വിലയും ഉയരുന്നു. ഇന്നത്തെ വിലയിൽ പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നിവ നോക്കിയാൽ കേരളത്തിൽ നിന്നും ഇന്ന് ഒരു പവൻ സ്വർണാഭരണം വാങ്ങാൻ ഏകദേശം 63,470 രൂപ വേണം. ഒരു ​ഗ്രാം ആഭരണത്തിന് ഇന്ന് ഏകദേശം 7,980 രൂപ കൊടുക്കണം. പണിക്കൂലി ഒരിക്കലും ഒരേ പോലെയാവില്ല. അതിനാൽ ഈ വില കൃത്യമായ കണക്കല്ല. ഓരോ ജ്വല്ലറിയിലും പണിക്കൂലി മാറുന്നതിന് അനുസരിച്ച് ഈ വിലയിൽ നേരിയ മാറ്റങ്ങൾ വന്നേക്കാം.

ബുക്ക് ചെയ്യുന്നുണ്ടോ?

ഇന്ന് വിലയിൽ നേരിയ ഇടിവുണ്ടായി. പക്ഷേ ആശ്വാസകരമായ വിലക്കുറവ് ഉണ്ടായിട്ടില്ല. ഇന്നും വില 58000 തന്നെ ശക്തമായി നിലകൊള്ളുന്നു. വരും ദിവസങ്ങളിൽ വില ഇടിഞ്ഞാൽ ആശ്വാസകരമാവും. എന്നാൽ നാളെ ഇതിൽ ശക്തമായി വില ഉയർന്നാൽ എന്തു ചെയ്യും? ഇന്നത്തെ വിലക്കുറവിൽ ആഭരണം വാങ്ങാൻ പ്ലാനുണ്ടോ? എങ്കിൽ വേഗം തന്നെ ബുക്ക് ചെയ്തോളൂ...