ഇത് വമ്പൻ ട്വിസ്റ്റ്; സ്വർണ വില ഇന്നും ഇടിയുന്നു, രണ്ട് ദിവസം കൊണ്ട് 1760 രൂപ കുറഞ്ഞു

വമ്പൻ ട്വിസ്റ്റോടെ സ്വർണ വില ഇന്നും ഇടിയുന്നു. സംസ്ഥാനത്തെ സ്വർണ വില ഇന്ന് പവന് 960 രൂപയാണ് കുറഞ്ഞത്. ആഭരണപ്രേമികൾക്ക് ആശ്വസിക്കാം. രണ്ട് ദിവസം കൊണ്ട് 1760 രൂപയാണ് കുറഞ്ഞത്. കഴിഞ്ഞ ഒരാഴ്ചയ്ക്കിടെ ഇപ്പോഴാണ് സ്വർണ വില താഴേക്ക് വീഴുന്നത്. ഇന്നലെ 800 രൂപയായിരുന്നു കുറഞ്ഞത്. രാജ്യാന്തര വിപണയിലെ വിലക്കുറവാണ് സംസ്ഥാനത്തെ സ്വർണ വിലയേയും ബാധിച്ചത്. ഇസ്രായേൽ- ഹിസ്ബുല്ല യുദ്ധം അവസാനിച്ചേക്കാം എന്ന വാർത്ത വന്നതോടെയാണ് ഇന്ന് സ്വർണ വിലയിൽ ഇടിവുണ്ടായത്. 

ഇന്നത്തെ വില

ഇന്ന് ഒരു ​ഗ്രാമിന് 120 രൂപ കുറഞ്ഞ് 7080 രൂപയായി. പവന് 960 രൂപ കുറഞ്ഞ് 56,640 രൂപയായി. രണ്ട് ദിവസം കൊണ്ട് സ്വർണ വില കുറഞ്ഞത് വിവാഹ ആവശ്യങ്ങൾക്ക് സ്വർണാഭരണം വാങ്ങിക്കുന്നവർക്ക് അനു​ഗ്രഹമായി. നവംബറിൽ സ്വർണ വില കഴിഞ്ഞയാഴ്ചയിലെ പ്രകടനം അപ്രതീക്ഷിതമായിരുന്നു. ഇന്നത്തെ വിലപ്രകാരം 10 ​ഗ്രാം സ്വർണം വാങ്ങാൻ 70,800 രൂപയാവുന്നു. 24 കാരറ്റ് സ്വർണത്തിന് ഒരു ​ഗ്രാമിന് 7724 രൂപയും പവന് 61,792 രൂപയുമാവുന്നു. 18 ​കാരറ്റിന് ഒരു ​ഗ്രാമിന് 5793 രൂപയും പവന് 46,344 രൂപയുമാണ്.

യുദ്ധം അവസാനിക്കുന്നു....

ഒരാഴ്ചയ്ക്കിടെ ഇന്നലെയും ഇന്നും സ്വർണ വിലയ്ക്ക് കനത്ത തിരിച്ചടിയുണ്ടായി. ഇസ്രയേൽ-ഹിസ്ബുല്ല യുദ്ധം ഉടൻ അവസാനിക്കുമെന്ന വിവരം പുറത്ത് വന്നതോടെയാണ് രാജ്യാന്തര വില ഇന്നും കുറഞ്ഞത്. നിലവിൽ ഔൺസിന് 2615 ഡോളറിലേക്കാണ് വ്യാപാരം പുരോ​ഗമിക്കുന്നത്. കഴിഞ്ഞയാഴ്ച ഇത് 2700 നു മുകളിൽ വില കയറിയിരുന്നു.

യുദ്ധം അവസാനിക്കുമ്പോൾ സ്വാഭാവികമായും സ്വർണത്തിൻ്റെ ഡിമാൻഡ് കുറയും. അത് വിലയേയും ബാധിക്കും. കഴിഞ്ഞ ഒരാഴ്ച ഉണ്ടായിരുന്ന വിലക്കയറ്റം മൂലം സ്വർണ നിക്ഷേപങ്ങളിലേക്ക് ആളുകൾ ഒരുപാട് എത്തിയിരുന്നു. എന്നാൽ മണിക്കൂറുകൾ കൊണ്ടാണ് സ്വർണ വില മലക്കം മറിഞ്ഞത്. 

ഒരു പവൻ ആഭരണത്തിന് എത്ര വേണം?

ഇന്ന് സ്വർണം പവന് 56,640 രൂപയാണ്. എങ്കിൽ ഇന്നത്തെ വില പ്രകാരം 5% പണിക്കൂലി നോക്കിയാൽ കേരളത്തിലെ ജ്വല്ലറിയിൽ നിന്നും ഇന്ന് ഒരു പവൻ സ്വർണാഭരണം വാങ്ങാൻ 61,310 രൂപ വേണം. ഒരു ​ഗ്രാം ആഭരണത്തിന് ഇന്ന് 7664 രൂപ കൊടുക്കണം. 3% ജി.എസ്.ടി, ഹോൾമാർക്ക് ചാർജ് (53.10 രൂപ), പണിക്കൂലി എന്നീ ചാർജുകൾ ഈടാക്കുന്നതിനാലാണ് സ്വർണാഭരണം വാങ്ങുമ്പോൾ അധിക വില കൊടുക്കേണ്ടി വരുന്നത്. പണിക്കൂലിയിലെ നേരിയ മാറ്റങ്ങളാണ് സ്വർണാഭരണ വിലയിലും വ്യത്യാസം ഉണ്ടാവാൻ കാരണമാവുന്നത്. സാധാരണയായി 5 മുതൽ 30% വരെയാണ് പണിക്കൂലി ഈടാക്കുന്നത്.

സ്വർണം ബുക്ക് ചെയ്തോളൂ....

സ്വർണ വില ഇന്നും ഇടിഞ്ഞു. സാധാരണക്കാർക്കും ആഭരണപ്രേമികൾക്കും വിവാഹ ആവശ്യമുള്ളവർക്കും ഇതാണ് നല്ല സമയം. ഈ വിലയിൽ തന്നെ സ്വർണം ബുക്ക് ചെയ്താൽ ഇന്നത്തെ വിലയിൽ തന്നെ ആഭരണം വാങ്ങാം. ഒരാഴ്ചയ്ക്കിടെ കനത്ത ഇടിവാണ് ഈ രണ്ട് ദിവസങ്ങളിലായി നടന്നത്. സമയം കളയാതെ ഇന്ന് തന്നെ ബുക്ക് ചെയ്തോളൂ. വരും ദിവസങ്ങളിൽ സ്വർണ വില മലക്കം മറിയാൻ സാധ്യതയും ഉണ്ട്.