ജിഎസ്ടിയില്‍ മദ്യവും ഇന്ധനവും ഉള്‍പ്പെടുത്തുന്നതിനെ കൗണ്‍സില്‍ യോഗത്തില്‍ കേരളം എതിര്‍ത്തു: ധനമന്ത്രി

തിരുവനന്തപുരം: സംസ്ഥാനങ്ങള്‍ക്ക് നല്‍കാനുള്ള ജി എസ് ടി നഷ്ടപരിഹാരം ഉടന്‍ നല്‍കാന്‍ കേരളം ആവശ്യപ്പെട്ടെന്ന് സംസ്ഥാന ധനമന്ത്രി കെഎന്‍ ബാലഗോപാല്‍ പറഞ്ഞു. മദ്യവും ഇന്ധനവിലയും ജി എസ് ടിയില്‍ ഉള്‍പ്പെടുത്തരുതെന്ന സംസ്ഥാനത്തിന്റെ നിലപാട് കൗണ്‍സിനെ അറിയിച്ചെന്നും അദ്ദേഹം വ്യക്തമാക്കി.

കൂടാതെ മദ്യ ഉത്പാദനത്തിലെ പൂരിത ആല്‍ക്കഹോളിനെ ജി എസ് ടിയില്‍ ഉള്‍പ്പെടുത്തുന്നതിനെയും കേരളം യോഗത്തില്‍ എതിര്‍ത്തു. ഇക്കാര്യങ്ങളില്‍ സംസ്ഥാന സര്‍ക്കാരിന്റെ നയം ഇത് തന്നെയാണെന്നും അദ്ദേഹം വ്യക്തമാക്കി.

കൊവിഡ് വാക്‌സിന്‍ അടക്കം ചികിത്സയുമായി ബന്ധപ്പെട്ട എല്ലാ സാമഗ്രികളുടെയും നികുതി ഒഴിവാക്കണമെന്നും കേരളം ആവശ്യപ്പെട്ടു. കേരളത്തിന്റെ നിര്‍ദ്ദേശങ്ങള്‍ കേന്ദ്രം ക്രിയാത്മകമായി എടുത്തിട്ടുണ്ടെന്നും ധനമന്ത്രി വ്യക്തമാക്കി.

തുണിത്തരങ്ങള്‍, ചെരുപ്പ് തുടങ്ങിയ ഉത്പ്പനങ്ങളുടെ നികുതി വര്‍ദ്ധിപ്പിക്കരുതെന്നും കേരളം ആവശ്യപ്പെട്ടിട്ടുണ്ട്. കൊവിഡ് ചികിത്സാ സാമഗ്രികളുടെ നികുതി ഒഴിവാക്കുന്ന കാര്യത്തില്‍ അടുത്ത എട്ട് ദിവസത്തിനുള്ളില്‍ തീരുമാനമുണ്ടാകുമെന്നും കെ എന്‍ ബാലഗോപാല്‍ അറിയിച്ചിട്ടുണ്ട്.