കേരളത്തിന്റെ നേന്ത്രക്കായകള്‍ ഇനി കടല്‍ കടക്കും; മാര്‍ച്ച് മുതല്‍ ആദ്യഘട്ട കയറ്റുമതി ആരംഭിക്കും

തിരുവനന്തപുരം: കേരളത്തിന്റെ നേന്ത്രക്കായകള്‍ കടല്‍ കടന്ന് ഇംഗ്ലീഷ് നാട്ടിലേക്ക് കയറ്റി അയയ്ക്കുന്നു. ആദ്യ ഘട്ടത്തില്‍ ലണ്ടനിലേക്കാണ് നേന്ത്രക്കായകള്‍ കയറ്റി അയയ്ക്കുന്നത്. പ്രോമോഷന്‍ കൗണ്‍സില്‍ കേരളയുടെ സീ-ഷിപ്പ്‌മെന്റ് പ്രോട്ടോക്കോള്‍ പ്രകാരമാണ് കയറ്റുമതി. 20 മുതല്‍ 25 ദിവസത്തിനുള്ളില്‍ നേന്ത്രക്കായകള്‍ ലണ്ടനില്‍ എത്തിക്കാനാവുമെന്നാണ് കരുതുന്നത്.

ഇതുമായി ബന്ധപ്പെട്ട് കര്‍ഷകര്‍ക്കും കയറ്റുമതിക്കാര്‍ക്കും ആവശ്യമായ സൗകര്യങ്ങള്‍ ഒരുക്കുന്നത്. വിപിഎഫ്‌സികെ ആണ്. കടല്‍ മാര്‍ഗമുള്ള കയറ്റുമതി സൗകര്യമാണ് ഇതിന് വേണ്ടി ഉപയോഗിക്കുന്നത്. വിമാനമാര്‍ഗത്തേക്കാള്‍ ചെലവ് കുറഞ്ഞതും ലാഭകരവുമാണ് കടല്‍മാര്‍ഗമുള്ള കയറ്റുമതി. ആദ്യ ഘട്ടത്തിലേക്കുള്ള കാര്‍ഗോ മാര്‍ച്ച് മുതല്‍ അയച്ചുതുടുങ്ങുമെന്നാണ് ബന്ധപ്പെട്ടവര്‍ അറിയിച്ചിരിക്കുന്നത്. തുടക്കത്തില്‍ 10 ടണ്ണാണ് അയയ്ക്കുക.

തൃശൂര്‍ ജില്ലയില്‍ തിരഞ്ഞെടുത്ത 10 കര്‍ഷകരില്‍ നിന്നാണ് നേന്ത്രക്കായ ശേഖരിക്കുന്നത്. പദ്ധതി വിജയം കാണുകയാണെങ്കില്‍ ഇത്പന്നങ്ങള്‍ ബ്രാന്‍ഡ് ചെയ്ത് കൂടുതല്‍ രാജ്യങ്ങളിലേക്ക് കയറ്റുമതി ചെയ്യുമെന്നും അധികൃതര്‍ അറിയിച്ചു. കൃഷിയിടത്തില്‍ നിന്ന് പടലകളാക്കി, കറയോ പാടുകളോ ഇല്ലാത്ത കായ്കള്‍ പായ്ക്ക് ഹൗസില്‍ എത്തിച്ച് പ്രീകൂളിംഗിനും ശുദ്ധീകരണത്തിനും ശേഷം ശ്രദ്ധയോടെ സംഭരിക്കും. അതിന് ശേഷം കാര്‍ട്ടണ്‍ ബോക്‌സുകളിലാക്കി താപനില, ഊഷ്മാവ് എന്നിവ ക്രമീകരിച്ച് പ്രത്യേക കണ്ടെയ്നറുകളിലാക്കിയാണ് കയറ്റി അയയ്ക്കുക.