കൊളംബിയ ഏഷ്യയെ ഏറ്റെടുക്കാനൊരുങ്ങി മണിപ്പാല്‍ ഹോസ്പ്പിറ്റല്‍സ്; 100 ശതമാനം ഓഹരിയും വാങ്ങും

ബംഗളൂരു: കൊളംബിയ ഏഷ്യ ആശുപത്രിയുടെ 100 ശതമാനം ഓഹരികളും വാങ്ങാനൊരുങ്ങി രാജ്യത്തെ ഏറ്റവും വലിയ ആശുപത്രി ശൃംഖലകളിലൊന്നായ മണിപ്പാല്‍ ഹോസ്പിറ്റല്‍സ് രംഗത്ത്. 2100 ഓളം കോടി രൂപയ്ക്കാണ് കൊളംബോ ഏഷ്യയെ മണിപ്പാല്‍ ഹോസ്പിറ്റല്‍ ഗ്രൂപ്പ് ഏറ്റെടുക്കുന്നതെന്ന് മണി കണ്‍ട്രോള്‍ റിപ്പോര്‍ട്ട് ചെയ്യുന്നു. റെഗുലേറ്ററി അംഗീകാരത്തിന് ശേഷം മണിപ്പാല്‍ ആശുപത്രികളിലേക്ക് ഉടമസ്ഥാവകാശം കൈമാറുന്നത് പൂര്‍ത്തിയാകും.

ബംഗളൂരു ആസ്ഥാനമായി പ്രവര്‍ത്തിക്കുന്ന മണിപ്പാല്‍ ഹോസ്പിറ്റല്‍സ് കൊളംബിയ ഏഷ്യ ഹോസ്പിറ്റല്‍സിന്റെ ഇന്ത്യയിലെ മൊത്തം ആസ്തികളും ഏറ്റെടുക്കുന്നതോടെ 15 നഗരങ്ങളിലായി 7500 ഓളം ബെഡ്ഡുള്ള ആശുപത്രി ശൃംഖലയായി മാറും. ഇതോടെ മണിപ്പാലിന് രാജ്യത്തെ ആശുപത്രി സാന്നിദ്ധ്യം ശക്തമാകും. കൂടാതെ മണിപ്പാല്‍ സംഘത്തിന് ഇന്ത്യയുടെ കിഴക്കന്‍ പ്രദേശത്തും സാന്നിദ്ധ്യം ശക്തമാക്കാനാകും.

രാജ്യത്തെ പ്രധാനപ്പെട്ട നഗരങ്ങളായ ബംഗളൂരു, മൈസൂര്‍, കൊല്‍ക്കത്ത, ഗുരുഗ്രാം, ഗാസിയ ബാദ്, പാട്യാല, പൂനെ എന്നിവിടങ്ങളിലായി 11 ആശുപത്രികളാണ് കൊളംബോ ഏഷ്യയ്ക്കുള്ളത്. 1300ഓളം ബെഡ്ഡുകളാണ് ഇവിടെയാകെ ഉള്ളത്. മണിപ്പാല്‍ ആശുപത്രിയുടെ ചികിത്സ വൈദഗ്ദ്യം കൊളംബിയ ആശുപത്രിയില്‍ എത്തുന്നതോടെ ഏറ്റവും മികച്ച ചികിത്സ നല്‍കുന്ന ആശുപത്രി ശൃംഖലയായി മണിപ്പാല്‍ മാറും. 4000ഓളം ഡോക്ടര്‍മാരുള്‍പ്പടെ 10000ഓളം ജീവനക്കാരും ഇനി മണിപ്പാല്‍ ഹോസ്പിറ്റല്‍സിന് ഉണ്ടാകും.