മാരുതി കാറുകളുടെ വില കൂട്ടി, വില ഉയർത്തിയ മോഡലുകൾ ഏതെല്ലാം?

രാജ്യത്തെ ഏറ്റവും വലിയ കാർ നിർമാതാക്കളായ മാരുതി സുസുക്കി ഇന്ത്യ (എം‌എസ്‌ഐ) തിരഞ്ഞെടുത്ത മോഡലുകളുടെ വില 10,000 രൂപ വരെ വർദ്ധിപ്പിച്ചതായി അറിയിച്ചു. വിവിധ മോഡലുകൾക്ക് വ്യത്യസ്ത രീതിയിലാണ് വില വർദ്ധനവ്. 4.7% വരെ വില കൂടിയ വാഹനങ്ങളുമുണ്ട്. 2020 ജനുവരി 27 മുതൽ പുതിയ വില പ്രാബല്യത്തിൽ വരുമെന്നും മാരുതി സുസുക്കി ഇന്ത്യ പ്രസ്താവനയിൽ പറഞ്ഞു.

എൻട്രി ലെവൽ മോഡലായ ആൾട്ടോ ശ്രേണിയുടെ വില 9,000 മുതൽ 6,000 രൂപ വരെയും എസ്-പ്രസ്സോ വില 1,500 മുതൽ 8,000 രൂപ വരെയും വാഗൺആർ 1,500 മുതൽ 4,000 രൂപ വരെയും ഉയരും. മൾട്ടി പർപ്പസ് വാഹനമായ എർട്ടിഗയുടെ വില 4,000-10,000 രൂപ വരെയും ബലേനോ 3,000 മുതൽ 8,000 രൂപ വരെയും എക്സ് എൽ 6 5,000 രൂപ വരെയും കമ്പനി ഉയർത്തി.

മാരുതി കാറുകളുടെ വില കൂട്ടി, വില ഉയർത്തിയ മോഡലുകൾ ഏതെല്ലാം?

നിലവിൽ, എൻട്രി ലെവൽ വാഹനങ്ങളായ കാർ ആൾട്ടോ മുതൽ പ്രീമിയം മൾട്ടി പർപ്പസ് വെഹിക്കിൾ എക്സ് എൽ 6 വരെ 2.89 ലക്ഷം മുതൽ 11.47 ലക്ഷം വരെ വിലയ്ക്കാണ് കമ്പനി വിൽക്കുന്നത്. 2020 ജനുവരി മുതൽ വിവിധ മോഡലുകളിലുള്ള കാറുകളുടെ വില വർദ്ധിപ്പിക്കുമെന്ന് മാരുതി ഡിസംബറിൽ തന്നെ ഉപഭോക്താക്കളെ അറിയിച്ചിരുന്നു. നിർമ്മാണ ചെലവ് വർദ്ധിക്കുന്നതിനാലാണ് കമ്പനി വില വർദ്ധിപ്പിക്കുന്നത്.

അറീന, നെക്സ ഡീലർഷിപ്പുകൾ വഴിയാണ് മാരുതിയുടെ കാർ വിൽപ്പന. ചെറു കാറുകളെ അറീനയിലൂടെയും പ്രീമിയം കാറുകളെ നെക്സ ശൃഖലയിലൂടെയും കമ്പനി വിൽക്കുന്നു. ആൾട്ടോ, വാഗൺആർ, സെലറിയോ, എസ്-പ്രെസ്സോ, സ്വിഫ്റ്റ്, ഡിസയർ, വിറ്റാര ബ്രെസ്സ, എർട്ടിഗ, ഈക്കോ മോഡലുകളാണ് മാരുതിയുടെ അറീന ഡീലർഷിപ്പുകളിലുള്ളത്. പ്രീമിയം മുഖച്ഛായ അവകാശപ്പെടുന്ന ഇഗ്നിസ്, ബലെനോ, സിയാസ്, എസ്-ക്രോസ്, XL6 കാറുകളുടെ ചുമതല നെക്സ ഡീലർഷിപ്പുകൾ ഏറ്റെടുക്കുന്നു.