ഉല്‍പാദന ചെലവ് ഉയരുന്നു; 2021 ജനുവരിയില്‍ കാറുകളുടെ വില വര്‍ദ്ധിപ്പിക്കാനൊരുങ്ങി എംജി മോട്ടർ

ദില്ലി: എംജി മോട്ടോഴ്‌സിന്റെ വാഹനങ്ങള്‍ ഇന്ത്യന്‍ റോഡുകളില്‍ എത്തിയിട്ട് ഒരു വര്‍ഷം തികയുകയാണ്. ഹെക്ടറില്‍ തുടങ്ങിയ എംജി ഇന്ന് ഗ്ലോസ്റ്ററില്‍ വരെ എത്തി നില്‍ക്കുകയാണ്. ഒരു വര്‍ഷം തികഞ്ഞതിന് പിന്നാലെ ഇന്ത്യയില്‍ വില വര്‍ദ്ധിപ്പിക്കാന്‍ ഒരുങ്ങുകയാണ് എംജി. അടുത്ത വര്‍ഷം ജനുവരി മുതല്‍ മൂന്ന് ശതമാനം വരെ വര്‍ദ്ധിപ്പിക്കാനാണ് കമ്പനി ഒരുങ്ങുന്നത്. ഉല്‍പാദന ചെലവിലെ വര്‍ദ്ധനയാണ് വില വില കൂട്ടാന്‍ ഇപ്പോള്‍ കമ്പനിയെ പ്രേരിപ്പിച്ചത്.

വില കൂടുതന്നതിന് പിന്നാലെ ഏഴ് സീറ്റുള്ള ഹെക്ടര്‍ പ്ലസ് മോഡല്‍ അടുത്തമാസം വിപണിയില്‍ എത്തിക്കുമെന്നും കമ്പനി വൃത്തങ്ങള്‍ അറിയിച്ചു.
നിലവില്‍ ആറ് സീറ്റര്‍ പതിപ്പില്‍ ക്യാപ്റ്റന്‍ സീറ്റുകളുള്ള ഹെക്ടര്‍ പ്ലസ് മോഡലാണ് വിപണിയില്‍ ലഭ്യമാകുന്നത്. ഹെക്ടര്‍, ഹെക്ടര്‍ പ്ലസ്, സെഡ് എസ് ഇവി, ഗ്ലോസ്റ്റര്‍ എന്നീ മോഡലുകളാണ് വിപണി കീഴടക്കിയിരിക്കുന്നത്. 12.83 ലക്ഷം മുതല്‍ 35.6 ലക്ഷം വരെയാണ് വിവിധ വേരിയന്റുകളുടെ വില.

രാജ്യത്തെ മറ്റ് പ്രമുഖ വാഹന നിര്‍മാതാക്കളായ മാരുതി സുസുക്കി ഇന്ത്യ, ഫോര്‍ഡ് ഇന്ത്യ, മഹീന്ദ്ര, മഹീന്ദ്ര, ഹീറോ മോട്ടോകോര്‍പ്പ് എന്നിവ ജനുവരി മുതല്‍ അതത് വാഹനങ്ങളുടെ വില വര്‍ദ്ധിപ്പിക്കുമെന്ന് അറിയിച്ചിട്ടുണ്ട്. ഉല്‍പാദന ചെലവ് വര്‍ദ്ധിച്ചത് തന്നെയാണ് വില വര്‍ദ്ധനവിന് പല കമ്പനികളെയും പ്രേരിപ്പിക്കുന്നത്.