7 ദിവസം, നേട്ടം 40%, കത്തിക്കയറി മുക്ത ആർട്സ് ഓഹരി വില, കുതിപ്പിന് പിന്നിലെ കാരണം അറിയാം

കഴിഞ്ഞ അഞ്ച് ദിവസത്തിനിടെ 38 ശതമാനത്തിന് മുകളിൽ വളർച്ച നേടിയ ഓഹരികളിലൊന്നാണ് മുക്ത ആർട്സ് ലിമിറ്റഡ്. അതോടെ ഓഹരി വില 52 ആഴ്ചയിലെ ഏറ്റവും ഉയർന്ന വിലയായ 115 രൂപയിൽ എത്തുകയും ചെയ്തു. എന്താണ് മുക്ത ആർട്സ് ലിമിറ്റഡ് ഓഹരിയുടെ കുതിപ്പിന് കാരണമെന്നും ഓഹരിയുടെ മറ്റ് പ്രധാന വിവരങ്ങളും നമുക്ക് പരിശോധിക്കാം.

ഓഹരി വില

വ്യാഴാഴ്ച ആദ്യ സെഷനിൽ തന്നെ 10 ശതമാനത്തിന് മുകളിൽ വളർച്ച കൈവരിക്കാൻ മുക്ത ആർട്സ് ലിമിറ്റഡ് ഓഹരിക്ക് സാധിച്ചു. 111.43 എന്നതാണ് നിലവിലെ ഓഹരി വില. കഴിഞ്ഞ അഞ്ച് ദിവസത്തിനിടെ 38.58 ശതമാനം വളർച്ചയാണ് ഓഹരി നേടിയത്. ഒരു മാസത്തിനിടെ 42.73 ശതമാനം നേട്ടമുണ്ടാക്കാനും ഓഹരിക്ക് സാധിച്ചു. 46.52 ശതമാനം വളർച്ചയാണ് ആറ് മാസത്തിനിടെ ഓഹരി നേടിയത്.

42 ശതമാനം മുന്നേറ്റമാണ് 2024-ൽ ഇതുവരെ ഓഹരി നേടിയത്. ഒരു വർഷത്തിനിടെ 78.72 ശതമാനം നേട്ടമുണ്ടാക്കാനും മുക്ത ആർട്സ് ലിമിറ്റഡ് ഓഹരിക്ക് സാധിച്ചു. 58.85 രൂപയാണ് 52 ആഴ്ചയിലെ ഏറ്റവും താഴ്ന്ന ഓഹരി വില.

കുതിപ്പിന് കാരണം

മുക്ത ആർട്‌സും സീ എൻ്റർടൈൻമെൻ്റും 37 സിനിമകൾക്കായി 6 വർഷത്തെ കരാറിൽ ഒപ്പുവെച്ചതിന് പിന്നാലെയാണ് ഓഹരി വില മുകളിലേക്ക് ഉയർന്നത്. 2024 സെപ്‌റ്റംബർ 24-ലെ എക്‌സ്‌ചേഞ്ചുകളിലെ മുക്ത ആർട്‌സ് റിലീസ് അനുസരിച്ച് , 37 സിനിമകളുടെ സാറ്റലൈറ്റ്, മീഡിയ അവകാശങ്ങൾക്കായി കമ്പനിയും സീ എൻ്റർടൈൻമെൻ്റ് എൻ്റർപ്രൈസസ് ലിമിറ്റഡും ("സീ") തമ്മിൽ അസൈൻമെൻ്റ് കരാറും ടേം ഷീറ്റും നടപ്പിലാക്കിയതായി മുക്ത ആർട്‌സ് അറിയിച്ചു. 2027 ഓഗസ്റ്റ് 25 മുതൽ ആരംഭിക്കുന്ന 6 വർഷത്തേക്കാണ് കരാർ. ഉടമ്പടി സാധാരണ ബിസിനസിലാണെന്നും കമ്പനിയുടെ മാനേജ്‌മെൻ്റിനെ ബാധിക്കില്ലെന്നും മുക്ത ആർട്‌സ് പറഞ്ഞു.

മുക്ത ആർട്സ് ലിമിറ്റഡ്

1982-ൽ ആരംഭിച്ച മുക്ത ആർട്സ് ലിമിറ്റഡ് ചലച്ചിത്ര നിർമ്മാണം, വിതരണം, ചലച്ചിത്ര പ്രദർശനം തുടങ്ങിയ മേഖലകളിലാണ് പ്രവർത്തിക്കുന്നത്. 251 കോടി രൂപയാണ് വിപണി മൂലധനം. 2024 മാർച്ച് 31-ന് അവസാനിച്ച സാമ്പത്തിക വർഷത്തിലെ പ്രവർത്തനങ്ങളിൽ നിന്നുള്ള മുക്ത ആർട്‌സിൻ്റെ വരുമാനം 209 കോടി രൂപയാണ്.

നേട്ടമുണ്ടാക്കി സീ എൻ്റർടൈൻമെൻ്റും

കരാറിന് പിന്നാലെ സീ എൻ്റർടൈൻമെൻ്റ് എൻ്റർപ്രൈസസിൻ്റെ ഓഹരി വിലയും കഴിഞ്ഞ അഞ്ച് ട്രേഡിംഗ് സെഷനുകളിൽ 6-7% ഉയർന്നു. വ്യാഴാഴ്ചയും ആദ്യ സെഷനിൽ 1.5 ശതമാനത്തിന് മുകളിൽ നേട്ടമുണ്ടാക്കാൻ ഓഹരിക്ക് സാധിച്ചു. 137.02 രൂപയാണ് നിലവിലെ ഓഹരി വില. ഒരു മാസത്തിനിടെ 2 ശതമാനത്തോളം വളർച്ച കൈവരിക്കാനും സീ എൻ്റർടൈൻമെൻ്റ് എൻ്റർപ്രൈസസിൻ്റെ ഓഹരിക്ക് സാധിച്ചു.

വരുമാനത്തിൽ വർധനവ്

2024 ജൂൺ 30-ന് അവസാനിച്ച പാദത്തിൽ കമ്പനിയുടെ ഏകീകൃത മൊത്ത വരുമാനം 2149.52 കോടി രൂപ രേഖപ്പെടുത്തി. കഴിഞ്ഞ വർഷം ഇതേ പാദത്തിലെ 1998.26 കോടി രൂപയെ അപേക്ഷിച്ച് 7.57 ശതമാനത്തിന്‍റെ വർധനവ്. പാദത്തിലെ ആകെ വരുമാനം ₹ 2185.29 കോടി. കഴിഞ്ഞ പാദത്തിൽ കമ്പനി 118.01 കോടി രൂപ നികുതിക്ക് ശേഷമുള്ള അറ്റാദായം നേടി.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.