കുതിച്ച് പാഞ്ഞ് റെയിൽവേ ഓഹരികൾ, നിക്ഷേപകരുടെ കീശ നിറയുന്നു, നിങ്ങൾ ഇനിയും ഓഹരി വാങ്ങിയില്ലേ..?

കഴിഞ്ഞ കുറേ നാളുകളായി നിക്ഷേപകരുടെ കീശ വീർപ്പിക്കുകയാണ് പൊതുമേഖലാ ഓഹരികൾ. അതിൽ മുൻപന്തിയിൽ തന്നെ റെയിൽവേ പൊതുമേഖലാ ഓഹരികളെ കണാൻ സാധിക്കും. ലോക്സഭാ തെരഞ്ഞെടുപ്പ് ഫലം പുറത്ത് വന്ന ജൂൺ 04 ന് സാക്ഷ്യം വഹിച്ച കുത്തനെയുള്ള തിരുത്തലിന് ശേഷം സമീപകാല സെഷനുകളിൽ വീണ്ടും വിജയപാതയിലേക്ക് നീങ്ങുകയാണ് റെയിൽവേ പൊതുമേഖലാ ഓഹരികൾ.

ചൊവ്വാഴ്ച റെയിൽവേ ഓഹരികളെല്ലാം മികച്ച മുന്നേറ്റമാണ് കാഴ്ചവെച്ചത്. 8.5 ശതമാനം നേട്ടത്തോടെ റെയിൽടെൽ കോർപ്പറേഷനാണ് ഏറ്റവും മുന്നിൽ നിൽക്കുന്നത്. തൊട്ടുപിന്നാലെ ഇർകോൺ ഇൻ്റർനാഷണലും 8 ശതമാനത്തിന് മുകളിൽ നേട്ടമുണ്ടാക്കി. അതുപോലെ ഐആർഎഫ്‌സി , റെയിൽ വികാസ് നിഗം ​​എന്നിവയും യഥാക്രമം 4.2 ശതമാനം, 4.3 ശതമാനം വർധനവ് രേഖപ്പെടുത്തി.

മുന്നേറ്റത്തിന് കാരണം

നരേന്ദ്രമോദി സർക്കാർ തന്നെ വീണ്ടും അധികാരത്തിലെത്തിയതിന് പിന്നാലെയാണ് റെയിൽവേ പൊതുമേഖലാ ഓഹരികൾ മുന്നോട്ട് കുതിച്ചത്. സർക്കാർ നയങ്ങളുടെ തുടർച്ചയുടെയും നിലവിലുള്ള സാമ്പത്തിക പരിഷ്കാരങ്ങളുടെയും സാധ്യതകളും നിക്ഷേപകർക്ക് ആവേശം പകരുന്നു.

റെയിൽവേയുടെ പുനരുജ്ജീവനമാണ് സർക്കാരിന് ഊന്നൽ നൽകുന്ന ഒരു പ്രധാന മേഖല. കഴിഞ്ഞ ദശകത്തിൽ, ഇന്ത്യൻ റെയിൽവേ സംവിധാനത്തിനുള്ളിൽ വിപുലമായ നവീകരണ ശ്രമങ്ങൾ സർക്കാർ ഏറ്റെടുത്തിട്ടുണ്ട്. കൂടാതെ, 2019-ൽ 'വന്ദേ ഭാരത്' ട്രെയിനുകൾ അവതരിപ്പിക്കുന്നതിനൊപ്പം വിവിധ നഗരങ്ങളിലുടനീളം മെട്രോ ട്രെയിൻ ശൃംഖലകളുടെ ശ്രദ്ധേയമായ വിപുലീകരണവും ഉണ്ടായിട്ടുണ്ട്.

ഇന്ത്യൻ റെയിൽവേ 2025-26 ഓടെ സെമി-ഹൈ-സ്പീഡ് 'വന്ദേ ഭാരത്' ട്രെയിനുകൾ യൂറോപ്യൻ, തെക്കേ അമേരിക്കൻ, കിഴക്കൻ ഏഷ്യൻ വിപണികളിലേക്ക് 'ഇന്ത്യയിൽ നിർമ്മിച്ച' ട്രെയിനുകൾ കയറ്റുമതി ചെയ്യാൻ പദ്ധതിയിടുന്നു. ഇന്ത്യൻ റെയിൽവേ സിഗ്നലിംഗ്, ടെലികമ്മ്യൂണിക്കേഷൻ തുടങ്ങിയ മേഖലകളിൽ സാങ്കേതികവിദ്യ വികസിപ്പിക്കുകയും സൃഷ്ടിക്കുകയും ചെയ്യുന്നു. ഇതെല്ലാം നിക്ഷേപകരുടെ ആത്മവിശ്വാസം വർധിപ്പിച്ചിട്ടുണ്ട്.

ഇനി നമുക്ക് കഴിഞ്ഞ ദിവസങ്ങളിൽ വലിയ മുന്നേറ്റം കാഴ്ചവെച്ച ചില പൊതുമേഖലാ റെയിൽവേ ഓഹരികളുടെ വിശദാംശങ്ങൾ പരിശോധിക്കാം.

1. റെയിൽടെൽ കോർപ്പറേഷൻ

രാജ്യത്തെ വലിയ ന്യൂട്രൽ ടെലികോം ഇൻഫ്രാസ്ട്രക്ചർ സേവനദാതാക്കളിൽ ഉൾപ്പെടുന്ന കമ്പനിയാണ് റെയിൽടെൽ കോർപ്പറേഷൻ ഓഫ് ഇന്ത്യ. എൻഎസ്ഇയിൽ 417.45 രൂപ എന്നതാണ് നിലവിൽ ഓഹരിയുടെ വില. 17.08 ശതമാനം മുന്നേറ്റമാണ് ഒരു മാസം കൊണ്ട് ഓഹരി നേടിയത്.

2. ഇർകോൺ ഇൻ്റർനാഷണൽ

സംയോജിത എഞ്ചിനീയറിംഗ്, കൺസ്ട്രക്ഷൻ പൊതുമേഖലാ സ്ഥാപനമാണ് ഇർകോൺ ഇൻ്റർനാഷണൽ. എൻഎസ്ഇയിൽ 271.15 രൂപ എന്നതാണ് നിലവിലെ ഓഹരി വില. 20.73 ശതമാനമാണ് ഒരു മാസത്തെ വളർച്ച.

3. ഐആർഎഫ്‌സി

ആഭ്യന്തര, വിദേശ വിപണികളിൽ നിന്ന് ഫണ്ട് സ്വരൂപിക്കുന്നതിനായി ഇന്ത്യൻ റെയിൽ‌വേയുടെ സമർപ്പിത ധനകാര്യ വിഭാഗമാണ് ഐ‌ആർ‌എഫ്‌സി. എൻഎസ്ഇയിൽ 176.10 രൂപ എന്നതാണ് നിലവിലെ ഓഹരി വില. ഒരു മാസത്തിനിടെ 20 ശതമാനത്തിന് മുകളിൽ ലാഭമുണ്ടാക്കാനും ഓഹരിക്ക് സാധിച്ചു.

4. റെയിൽ വികാസ് നിഗം ലിമിറ്റഡ്

റെയിൽവേയുമായി ബന്ധപ്പെട്ട സ്പെഷ്യൽ പർപസ് ഫിനാൻസ് കമ്പനിയാണിത്. എൻഎസ്ഇയിൽ 389.70 രൂപ എന്നതാണ് നിലവിലെ ഓഹരി വില. 52.38 ശതമാനം വളർച്ചയാണ് ഒരു മാസം കൊണ്ട് ഓഹരി നേടിയത്. ആറ് മാസത്തിനിടെ 118 ശതമാനം മുന്നേറ്റമുണ്ടാക്കാനും റെയിൽവേ ഓഹരിക്ക് സാധിച്ചു.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.