വിപണിയുടെ നഷ്ടത്തിലും നേട്ടമുണ്ടാക്കിയ റെയിൽവേ ഓഹരി, ഇന്നത്തെ വളർച്ച 3%, കുതിപ്പ് തുടരുമോ..?

ഓഹരി വിപണിയിലെ ചാഞ്ചാട്ടം തുടരുകയാണ്. ബജറ്റിന് പിന്നാലെ തകർന്നടിഞ്ഞ വിപണി ബുധനാഴ്ചയും ചുവപ്പിലാണ് അവസാനിച്ചത്. അതേസമയം ചില ഓഹരികൾ നേട്ടമുണ്ടാക്കിയിട്ടുണ്ട്. അതിൽ ഏറ്റവും പ്രധാനപ്പെട്ട റെയിൽവേ ഓഹരികളിലൊന്നാണ് ടിറ്റാഗർ റെയിൽ സിസ്റ്റംസ്. ബുധനാഴ്ച ആദ്യ സെഷനിൽ തന്നെ 3 ശതമാനത്തിലധികം നേട്ടമുണ്ടാക്കാൻ ഓഹരിക്ക് സാധിച്ചു. എന്താണ് ഓഹരിയുടെ മുന്നേറ്റത്തിന് കാരണമെന്ന് നോക്കാം.

കുതിപ്പിന് പിന്നിൽ

ട്രാക്ഷൻ കൺവെർട്ടറുകളുടെ കയറ്റുമതി ആരംഭിച്ചതായി കമ്പനി അറിയിച്ചതിന് പിന്നാലെയാണ് ഓഹരിയുടെ കുതിപ്പ്. 8 കൺവെർട്ടറുകളുടെ ആദ്യ ബാച്ച് ഈ മാസം 19 ന് ഇറ്റലിയിലേക്ക് അയച്ചെന്നാണ് കമ്പനി വ്യക്തമാക്കിയത്. അതോടൊപ്പം ഏകദേശം 276 മില്യൺ യൂറോയുടെ മൊത്തം മൂല്യമുള്ള 38 ട്രെയിൻസെറ്റുകളുടെ രൂപകല്പന, നിർമ്മാണം, വിതരണം എന്നിവയ്ക്കായി ഇറ്റലിയിലെ റീജിയൺ ലാസിയോയിൽ നിന്ന് ടിറ്റാഗർ ഫയർമയ്ക്ക് ഓർഡർ ലഭിച്ചിരുന്നു.

ഓഹരി വിപണിയിലെ പ്രകടനം

എൻഎസ്ഇയിൽ 1,636.35 രൂപ എന്നതാണ് ടിറ്റാഗർ റെയിൽ സിസ്റ്റംസ് ഓഹരിയുടെ വില. കഴിഞ്ഞ ഒരു മാസത്തിനിടെ 1.5 ശതമാനം വളർച്ചയാണ് ഓഹരി നേടിയത്. ആറ് മാസത്തിനുള്ളിൽ 49.20 ശതമാനം നേട്ടമുണ്ടാക്കാനും റെയിൽവേ ഓഹരിക്ക് സാധിച്ചു. 57.07 ശതമാനം മുന്നേറ്റമാണ് 2024-ൽ ഇതുവരെ ഓഹരി നേടിയത്.

ഒരു വർഷത്തിനിടെ 158 ശതമാനം വളർച്ചയോടെ മൾട്ടിബാഗർ ഓഹരികളുടെ പട്ടികയിൽ ഇടം നേടാനും ടിറ്റാഗർ റെയിൽ സിസ്റ്റംസിന് സാധിച്ചു. 1,896.95 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില. 610.10 രൂപയാണ് 52 ആഴ്ചയിലെ ഏറ്റവും താഴ്ന്ന ഓഹരി വില.

സാങ്കേതിക കാര്യങ്ങൾ

ഓഹരിയുടെ ആപേക്ഷിക ശക്തി സൂചിക (ആർഎസ്ഐ) 45.9 ആണ്. ഇത് ഓവർബോട്ടിലോ ഓവർസെൽഡ് സോണിലോ അല്ല വ്യാപാരം ചെയ്യുന്നതെന്ന് സൂചിപ്പിക്കുന്നു. ഓഹരികൾ 5 ദിവസം, 10 ദിവസം, 20 ദിവസം, 30 ദിവസം എന്നിവയേക്കാൾ കുറവാണ്, എന്നാൽ 50 ദിവസം, 100 ദിവസം, 150 ദിവസം, 200 ദിവസം ചലിക്കുന്ന ശരാശരിയേക്കാൾ ഉയർന്നതാണ്.

കമ്പനിയെക്കുറിച്ച്

ചരക്ക് വാഗണുകൾ, പാസഞ്ചർ കോച്ചുകൾ, മെട്രോ ട്രെയിനുകൾ, ട്രെയിൻ ഇലക്ട്രിക്കൽസ്, സ്റ്റീൽ കാസ്റ്റിംഗുകൾ, പ്രത്യേക ഉപകരണങ്ങൾ, പാലങ്ങൾ, കപ്പലുകൾ എന്നിവയുടെ നിർമ്മാണത്തിലും വിൽപ്പനയിലും ടിറ്റാഗഡ് റെയിൽ സിസ്റ്റംസ് ഏർപ്പെട്ടിരിക്കുന്നു.

സാമ്പത്തിക വർഷത്തിൻ്റെ ആദ്യ പാദത്തിലെ സാമ്പത്തിക ഫലങ്ങൾ അംഗീകരിക്കുന്നതിനുമായി കമ്പനിയുടെ ഡയറക്ടർ ബോർഡ് യോഗം ജൂലൈ 30 ന് നടക്കുമെന്ന് ടിറ്റാഗർ റെയിൽ, എക്സ്ചേഞ്ചുകളെ അറിയിച്ചു.

നഷ്ടത്തിൽ അവസാനിച്ച് വിപണി

ഓഹരി വിപണിക്ക് ഇന്നും നഷ്ടത്തോടെ അവസാനം. സെൻസെക്സും നിഫ്റ്റി 50-ഉം തുടർച്ചയായ നാലാം സെഷനിലേക്ക് അവരുടെ നഷ്ടം നീട്ടി.സെൻസെക്സ് 280 പോയിൻറ് അഥവാ 0.35 ശതമാനം ഇടിഞ്ഞ് 80,148.88 ലും നിഫ്റ്റി 50 66 പോയിൻറ് അഥവാ 0.27 ശതമാനം നഷ്ടത്തിൽ 24,413.50 ലും വ്യാപാരം അവസാനിപ്പിച്ചു. ബാങ്കിംഗ്, എഫ്എംസിജി ഓഹരികളിലെ ലാഭ ബുക്കിംഗാണ് ബെഞ്ച്മാർക്ക് സൂചികകളിലെ ഇടിവിന് പ്രധാന കാരണം.

ദീർഘകാല, ഹ്രസ്വകാല മൂലധന നേട്ടത്തിലെ ഉയർന്ന പരിഷ്കരണം ഹ്രസ്വകാല വിപണിയുടെ വികാരത്തെ ബാധിക്കുമെന്നാണ് വിദഗ്ധരുടെ വിലയിരുത്തൽ.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.