ഒരു ഒന്നൊന്നര മൾട്ടിബാഗർ സ്റ്റോക്ക്, ഒരു വർഷം കൊണ്ട് നേടിയ വളർച്ച 762 ശതമാനം, കൂടെക്കൂട്ടുന്നോ...

ഓഹരി വിപണിയിൽ നിന്നും ലഭിക്കുന്ന നേട്ടം നമുക്ക് ഒരിക്കലും പ്രവചിക്കാൻ സാധിക്കുകയകില്ല. ചിലപ്പോൾ ചുരുങ്ങിയ കാലം കൊണ്ട് മികച്ച ലാഭം നേടാൻ സാധിക്കും. ചിലപ്പോൾ കുറച്ച് കാലം കാത്തിരുന്നാൽ മാത്രമാണ് വലിയ ലാഭത്തിലേക്കെത്താൻ സാധിക്കുകയുള്ളു. എന്തായാലും കൃത്യമായ നിരീക്ഷണവും ധാരണയും ഉള്ള നിക്ഷേപകർക്ക് വലിയ ലാഭം തന്നെ ഓഹരി വിപണിയിൽ നിന്നും നേടാൻ സാധിക്കും.

3,500 കോടിയിൽ താഴെ വിപണി മൂലധനമുള്ള ഒരു മൈക്രോക്യാപ് കമ്പനിയുടെ ഓഹരികൾ വെറും 16 വർഷം കൊണ്ട് നിക്ഷേപകരെ കോടീശ്വരന്മാരാക്കിയിട്ടുണ്ട്. 2008 മെയ് 29 ന് 10 രൂപയായിരുന്നു കമ്പനിയുടെ ഓഹരി വില. എന്നാൽ ഇന്ന് ഓഹരിയുടെ വില 1205.20 രൂപയാണ്. ഏതാണ് കമ്പനി എന്ന് ആലോചിക്കുകയാണോ. വെരിറ്റാസ് ഇന്ത്യ ലിമിറ്റഡാണ് ആ കമ്പനി.

വെരിറ്റാസ് ഇന്ത്യ ലിമിറ്റഡ്

വ്യാപാരം, ലോജിസ്റ്റിക്‌സ്, വൈദ്യുതി ഉൽപ്പാദനം, ഐടി-സോഫ്റ്റ്‌വെയർ മേഖലകളിൽ ശ്രദ്ധ കേന്ദ്രീകരിച്ച് വൈവിധ്യമാർന്ന വാണിജ്യ സേവനങ്ങൾ നൽകുന്ന കമ്പനിയാണ് വെരിറ്റാസ് ഇന്ത്യ ലിമിറ്റഡ്.

2008 മെയ് 29-ന് 10 രൂപയായിരുന്നു കമ്പനിയുടെ ഓഹരി വില. എന്നാൽ 2024 ഏപ്രിൽ 8 തിങ്കളാഴ്ച കമ്പനിയുടെ ഓഹരി വില 1205.20 രൂപയാണ്. അതായത് 16 വർഷം കൊണ്ട് കമ്പനി നേടിയത് 11,952 ശതമാനത്തിന്‍റെ വളർച്ച. ഒരു നിക്ഷേപകൻ 2008 ൽ 1,00,000 രൂപയുടെ ഓഹരി വാങ്ങിയിരുന്നെങ്കിൽ ഇന്ന് അതിന്‍റെ മൂല്യം 1.2 കോടി രൂപയായാകുമായിരുന്നു എന്ന് ചുരുക്കം.

മൾട്ടിബാഗർ സ്റ്റോക്ക്

762.71 ശതമാനത്തിന്‍റെ മുന്നേറ്റമാണ് വെരിറ്റാസ് ഇന്ത്യ ലിമിറ്റഡ് കഴിഞ്ഞ ഒരു വർഷത്തിനിടെ നടത്തിയത്. ആറ് മാസത്തിനിടെ 418.37 ശതമാനം വളർച്ച കൈവരിക്കാനും കമ്പനിക്ക് സാധിച്ചു. 32.37 ശതമാനം നേട്ടമാണ് മാർച്ച് മാസത്തിൽ ഓഹരി നേടിയത്. 1205.20 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില. 132.90 രൂപയാണ് 52 ആഴ്ചയിലെ ഏറ്റവും താഴ്ന്ന ഓഹരി വില.

വെരിറ്റാസ് ഇന്ത്യയുടെ ഓഹരികൾ അതിൻ്റെ 50-ദിന, 100-ദിന എക്‌സ്‌പോണൻഷ്യലി വെയ്‌റ്റഡ് മൂവിംഗ് ആവറേജുകൾക്ക് (ഇ.ഡബ്ല്യു.എം.എ) മുകളിൽ സുഖകരമായി വ്യാപാരം നടത്തുന്നുണ്ട്. അതോടൊപ്പം ആപേക്ഷിക ശക്തി സൂചിക റേറ്റ് 49.76 ആണ്. പരമ്പരാഗതമായി, ആർഎസ്ഐ 70-ന് മുകളിലായിരിക്കുമ്പോൾ കൂടുതൽ വാങ്ങുകയും 30-ൽ താഴെ വിറ്റഴിയുകയും ചെയ്യുന്നു.

ലാഭ വിഹിതം

ലാഭവിഹിതം എന്നത് ഒരു കമ്പനി അതിൻ്റെ ഓഹരി ഉടമകൾക്ക് നൽകുന്ന ലാഭത്തിൻ്റെയും വരുമാനത്തിൻ്റെയും ഒരു വിഹിതമാണ്. സ്ഥിരമായി ലാഭവിഹിതം നൽകുന്ന കമ്പനികളാണെങ്കിൽ ലാഭത്തിലാണെന്ന് സാരം. 2011 മുതൽ എല്ലാ വർഷവും (2012 ഒഴികെ) 0.05 രൂപ വെരിറ്റാസ് ഇന്ത്യ ലാഭ വിഹിതമായി നിക്ഷേപകർക്ക് നൽകിയിട്ടുണ്ട്.

മൾട്ടിബാഗർ നേട്ടം നൽകിയ മറ്റൊരു ഓഹരിയെക്കുറിച്ചും നമുക്ക് പരിശോധിക്കാം.

ശേഖാവതി പോളി-യാൺ ലിമിറ്റഡ്

ഇന്ത്യയിൽ പോളിസ്‌റ്റർ ടെക്‌സ്‌ചറൈസ് ചെയ്‌ത നൂലുകളുടെയും നെയ്‌തെടുത്ത തുണിത്തരങ്ങളുടെയും നിർമ്മാണത്തിലും വിൽപ്പനയിലും ഏർപ്പെട്ടിരിക്കുന്ന കമ്പനിയാണിത്. 1990ൽ സ്ഥാപിതമായ കമ്പനി വിവിധ നെയ്‌ത തുണിത്തരങ്ങൾ ആഭ്യന്തര, അന്തർദേശീയ വിപണി ലക്ഷ്യമിട്ട് നിർമ്മിക്കുന്നുണ്ട്.

ഓഹരി വിപണിയിലെ പ്രകടനം

മൾട്ടിബാഗർ പെന്നി സ്‌റ്റോക്ക് ഏകദേശം 307 ശതമാനം ഉയർച്ചയാണ് കഴിഞ്ഞ ഒരു വർഷത്തിനിടെ നടത്തിയത്, 2023 മാർച്ചിലെ വിലയായ 0.65 രൂപയിൽ നിന്ന് നിലവിൽ 2.63 രൂപ വരെയാണ് വ്യാപാരം നടക്കുന്നത്. കഴിഞ്ഞ 4 വർഷത്തിനിടയിൽ അതായത് 2020 മാർച്ച് മുതൽ ഈ ഓഹരി നിക്ഷേപകർക്ക് നൽകിയ നേട്ടം 1215 ശതമാനമാണ്.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.