തെന്നിന്ത്യയിലെ ഏറ്റവും ധനികനായ നടൻ; രജനീകാന്തോ, പ്രഭാസോ, വിജയ്‌യോ അല്ല

ബോക്സോഫിസിൽ ബോളിവുഡ് സിനിമകളെ കടത്തി വെട്ടുന്ന രീതിയിലാണ് തമിഴ്, തെലുങ്ക്, കന്നഡ, മലയാളം സിനിമാ ഇൻഡസ്ട്രിയുടെ വളർച്ച. കഴിഞ്ഞ ഏതാനും വർഷങ്ങൾ നോക്കിയാൽ ബാഹുബലി, കെജിഎഫ് തുടങ്ങി വമ്പൻ ചിത്രങ്ങളാണ് തെന്നിന്ത്യയിൽനിന്നും ബോക്സോഫിസിൽ ചരിത്രം കുറിച്ചത്. തെന്നിന്ത്യൻ സിനിമാ ഇൻഡസ്ട്രിയുടെ ഈ വളർച്ച താരങ്ങളുടെ സമ്പത്തിലും പ്രതിഫലിച്ചിട്ടുണ്ട്. ബോളിവുഡ് താരങ്ങളെക്കാൾ സമ്പത്തിൽ ഏറെ മുന്നിലാണ് ചില തെന്നിന്ത്യൻ താരങ്ങൾ.

പണം വരുന്നതും പോകുന്നതും അറിയുന്നില്ലേ? ഈ നിസാര കാര്യങ്ങൾ ശ്രദ്ധിച്ചാൽ ഇനി നേട്ടമുണ്ടാക്കാം

തെലുങ്ക് സൂപ്പർതാരം നാഗാർജുന അക്കിനേനിയാണ് നിലവിൽ തെന്നിന്ത്യയിലെ ഏറ്റവും ധനികനായ നടൻ. മണികൺട്രോളിന്റെ കണക്കനുസരിച്ച്, നാഗാർജുനയുടെ ആസ്തി 410 മില്യൺ ഡോളറാണ് (3572 കോടിയിൽ കൂടുതൽ). ഇന്ത്യയിലെ ഏറ്റവും ധനികനായ നടന്മാരിൽ ഒരാളാണ് നാഗാർജുന. ഷാരൂഖിനും ജൂഹി ചൗളയ്ക്കും തൊട്ടുപിന്നിലാണ് അദ്ദേഹം. അമിതാഭ് ബച്ചൻ (3200 കോടി), ഹൃതിക് റോഷൻ (3100 കോടി), സൽമാൻ ഖാൻ (2900 കോടി), അക്ഷയ് കുമാർ (2700 കോടി), ആമിർ ഖാൻ (1900 കോടി) തുടങ്ങിയ ബോളിവുഡ് താരങ്ങളെയെല്ലാം പിന്നിലാക്കിയാണ് നാഗാർജുന പട്ടികയിൽ മുന്നിലെത്തിയത്.

നാഗാർജുനയ്ക്ക് തൊട്ടുപിന്നിൽ ചിരഞ്ജീവിയാണ്. അദ്ദേഹത്തിന്റെ ആസ്തി 1650 കോടിയെന്നാണ് റിപ്പോർട്ട്. രാം ചരൺ (1370 കോടി), കമൽ ഹാസൻ (600 കോടി), രജനീകാന്ത് (500 കോടി), ജൂനിയർ എൻ‌ടി‌ആർ (500 കോടി), പ്രഭാസ് (250 കോടി) എന്നിവരാണ് അതിസമ്പന്നരായ മറ്റ് തെന്നിന്ത്യൻ താരങ്ങൾ.

തെലുങ്ക് സിനിമയിലെ സൂപ്പർ താരങ്ങളിൽ ഒരാളാണ് നാഗാർജുന എങ്കിലും സമ്പത്തിന്റെ കാര്യത്തിൽ മുന്നിലായിരുന്നില്ല. തെന്നിന്ത്യയിലെ ഏറ്റവും ധനികനായ നടൻ എന്ന പേര് ഏറ്റവും കൂടുതൽ കാലം ചിരഞ്ജീവിക്കായിരുന്നു. പിന്നീട്, ഈ നേട്ടം പ്രഭാസിനും രാം ചരണിനും ആയിരുന്നു. ബിസിനസിലൂടെയാണ് നാഗാർജുന സമ്പന്നരായ താരങ്ങളുടെ പട്ടികയിൽ മുന്നിലെത്തിയത്.

ഈ ശീലങ്ങൾ നിങ്ങൾക്കുണ്ടോ? അപകടമാണ്, ഒരിക്കലും സമ്പത്തുണ്ടാക്കാൻ പറ്റില്ല

സിനിമകളിൽ നിന്ന് മാത്രമല്ല, റിയൽ എസ്റ്റേറ്റ്, സ്പോർട്സ് ഫ്രാഞ്ചൈസികൾ എന്നിവയുൾപ്പെടെയുള്ള മറ്റ് ബിസിനസുകളിലെ നിക്ഷേപങ്ങളിലൂടെയും നാഗാർജുനയുടെ സമ്പത്ത് വർധിച്ചിട്ടുണ്ട്. ടോളിവുഡിലെ ഏറ്റവും വലിയ നിർമ്മാണ കമ്പനികളിലൊന്നും സ്റ്റുഡിയോകളിലും ഒന്നായ അന്നപൂർണ്ണ സ്റ്റുഡിയോയുടെ ഉടമയാണ് നാഗാർജുന. റിയൽ എസ്റ്റേറ്റ് സ്ഥാപനമായ N3 റിയൽറ്റി എന്റർപ്രൈസസും അദ്ദേഹത്തിന്റേതാണ്. നാഗാർജുനയുടെ ഉടമസ്ഥതയിലുള്ള റിയൽ എസ്റ്റേറ്റുകളുടെ ആകെ മൂല്യം ഏകദേശം 900 കോടിയാണ്. കൂടാതെ, ഒരു സ്വകാര്യ ജെറ്റ്, ആഡംബര കാറുകൾ എന്നിവയ്ക്കു പുറമേ, മൂന്ന് സ്‌പോർട്‌സ് ഫ്രാഞ്ചൈസികളും നാഗാർജുനയ്ക്ക് സ്വന്തമാണ്.