പുതിയ ആദായ നികുതി ബിൽ നാളെ അവതരിപ്പിക്കും; അതിനു മുന്നേ അറിഞ്ഞിരിക്കേണ്ട 10 കാര്യങ്ങൾ

2025 ഫെബ്രുവരി 1നായിരുന്നു കേന്ദ്ര ബജറ്റ് നടന്നത്. നികുതി ആനുകൂല്യങ്ങളെ കുറിച്ചുള്ള പ്രഖ്യാപനങ്ങൾ നടന്നെങ്കിലും പുതിയ ആദായനികുതി ബിൽ അവതരിപ്പിച്ചിരുന്നില്ല. പ്രതീക്ഷകൾക്ക് വിരാമമിട്ട് കേന്ദ്ര ധനമന്ത്രി നിർമ്മല സീതാരാമൻ ഫെബ്രുവരി 13 വ്യാഴാഴ്ച പാർലമെന്റിൽ പുതിയ ആധായ നികുതി നിയമം അവതരിപ്പിക്കും. നാളെ പുതിയ നികുതി ബിൽ അവതരിപ്പിച്ചാൽ 2026 ഏപ്രിൽ മുതലാണ് ഇത് നടപ്പിലാക്കുന്നത്.

പുതിയ നിയമ പരിഷ്കരണത്തിൽ 536 സെക്ഷനുകളും 16 ഷെഡ്യൂളുകളും 23 അധ്യായങ്ങളും ഉൾപ്പെടുന്നു. ഇത് ഇന്ത്യയുടെ നികുതി വ്യവസ്ഥയിലെ ഒരു പ്രധാന മാറ്റത്തെ സൂചിപ്പിക്കുന്നു. നികുതി നിയമങ്ങൾ ലളിതമാക്കുവാനാണ് പുതിയ നികുതി ബില്ലില്ലൂടെ ലക്ഷ്യം വെക്കുന്നത്. മാത്രമല്ല നിലവിലുള്ള നികുതി സ്ലാബുകളിൽ മാറ്റം വരുത്തുകയോ നൽകിയിട്ടുള്ള നികുതി ഇളവുകൾ അവലോകനം ചെയ്യുകയോ ചെയ്യില്ല.

നികുതിദായകർക്ക് നികുതി വ്യവസ്ഥകൾ എളുപ്പത്തിൽ മനസ്സിലാക്കാൻ കഴിയുന്ന തരത്തിൽ സെക്ഷനുകൾ പുനഃക്രമീകരിക്കുക എന്നതാണ് പുതിയ നികുതി നിയമത്തിന്റെ ഒരു പ്രധാന സവിശേഷത. ബില്ലിൽ പഴയ നികുതി വ്യവസ്ഥയെക്കുറിച്ചുള്ള പരാമർശങ്ങൾ ഒഴിവാക്കുമെന്നാണ് പ്രതീക്ഷിക്കുന്നത്. എന്നാൽ നികുതിദായകർക്ക് താത്പര്യമെങ്കിൽ പഴയ നികുതി വ്യവസ്ഥ തിരഞ്ഞെടുക്കാം.

പുതിയ ആദായ നികുതി ബിൽ ലോക്‌സഭയിൽ നാളെ അവതരിപ്പിക്കുമ്പോൾ അറിഞ്ഞിരിക്കേണ്ട 10 പ്രധാന കാര്യങ്ങൾ ഇതാ;

അറിഞ്ഞിരിക്കേണ്ട പ്രധാന കാര്യങ്ങൾ

1. 1961 ലെ ആദായനികുതി നിയമത്തിൽ 823 പേജുകളുണ്ട്, 2024 ൽ ഭേദഗതി ചെയ്തതനുസരിച്ച്, പുതിയ ആദായനികുതി ബിൽ 622 പേജുകളിലായി കുറച്ചിരിക്കുന്നു. അതായത് 201 പേജുകൾ ചുരുക്കി.

2. 536 സെക്ഷനുകളും 23 അധ്യായങ്ങളും 16 ഷെഡ്യൂളുകളും ഉണ്ട്.

3 നാളെ ഈ ബിൽ പാർലമെന്റിൽ പാസായാൽ അത് പാർലമെന്ററി സ്റ്റാൻഡിംഗ് കമ്മിറ്റിക്ക് റഫർ ചെയ്യും, ശേഷം സ്റ്റാൻഡിംഗ് കമ്മിറ്റി കൂടിയാലോചന നടത്തും.

4. അനുമാന ആദായ നികുതി പരിധിക്ക് കീഴിൽ ഒരു പരിധി നൽകിയിട്ടുണ്ട്. ഇപ്പോൾ ഈ പരിധിക്കിടയിൽ നികുതി ഓഡിറ്റ് ബാധകമാണ്.

5. ബിസിനസുമായി ബന്ധപ്പെട്ട 44AD പരിധി 2 കോടിയിൽ നിന്ന് 3 കോടിയായി ഉയർത്തി. അതേസമയം പ്രൊഫഷണലുകൾക്ക് ഇത് 50 ലക്ഷത്തിൽ നിന്ന് 75 ലക്ഷമായി ഉയർത്തി.

6. ടാക്സ് ഓഡിറ്റ് ഫയലിംഗ് തീയതി സെപ്റ്റംബർ 30 ൽ നിന്ന് ഒക്ടോബർ 31 ലേക്ക് നീട്ടിയിട്ടുണ്ട്. കൂടാതെ നികുതി ആദായനികുതി ഫയലിംഗിനുള്ള അവസാന തീയതി ഒക്ടോബർ 31 ൽ നിന്ന് നവംബർ 30 തിയ്യതിയിലേക്ക് മാറ്റി.

7. ടാക്സ് ഓഡിറ്റിന്റെ പരിധിയിൽ സി.എസ്, സി.എം.എ എന്നിവ കൂടി ഉൾപ്പെടുത്തുമെന്ന ചർച്ചകൾ നടന്നിരുന്നു. എന്നാൽ സെക്ഷൻ 515 (3)(b) ൽ അക്കൗണ്ടന്റ് എന്നാൽ ചാർട്ടേഡ് അക്കൗണ്ടന്റ് എന്നാണ് അർത്ഥമാക്കുന്നതെന്ന് വ്യക്തമാക്കി. ഇത് ചാർട്ടേഡ് അക്കൗണ്ടന്റുകൾക്ക് ആശ്വാസം പകരുന്നു.

8. മുൻ വർഷം (ആദായനികുതി കണക്കാക്കുന്ന വർഷം), അസസ്‌മെന്റ് വർഷം (നികുതി കണക്കാക്കുന്ന വർഷം) എന്നിവ ഒഴിവാക്കുന്നു, പകരം ഇപ്പോൾ ഇത് നികുതി വർഷം എന്നറിയപ്പെടുന്നു.

9. ദീർഘകാല മൂലധന നേട്ടവും ( LTCG ) ഹ്രസ്വകാല മൂലധന നേട്ടവും (STCG) ഇതുവരെ അവതരിപ്പിച്ചതുപോലെ തന്നെ ഈ വർഷവും തുടരുന്നു.

10. 10 കോടി വരെയുള്ള ഡിജിറ്റൽ ഇടപാടുകൾക്ക് ഓഡിറ്റിൽ ഇളവ് പ്രതീക്ഷിക്കാം.