ഏപ്രിൽ 1 മുതൽ നികുതിദായകരെ ബാധിക്കുന്ന പ്രധാന മാറ്റങ്ങൾ വരുന്നു; നിങ്ങൾ അറിയേണ്ടതെല്ലാം....

പുതിയ ആദായനികുതി ബിൽ പ്രഖ്യാപിച്ചതോടെ ടി.ഡി.എസ്, ടി.സി.എസ് എന്നീ നിയമങ്ങളിലും 2025 ലെ ബജറ്റിൽ നിരവധി മാറ്റങ്ങൾ പ്രഖ്യാപിച്ചു. 2025 ഏപ്രിൽ 1 മുതൽ ഇത് പ്രാബല്യത്തിൽ വരും. വിവിധ വ്യവസ്ഥകൾക്കുള്ള നികുതി പരിധി വർദ്ധിപ്പിക്കാൻ ബിൽ നിർദ്ദേശിച്ചിട്ടുണ്ട്. നികുതിദായകർക്കും വ്യാപാരികൾക്കും നികുതി പാലിക്കൽ എളുപ്പമാക്കുന്നതിനും അനാവശ്യ സങ്കീർണ്ണതകൾ ഇല്ലാതാക്കുന്നതിനുമാണ് ഈ മാറ്റങ്ങൾ ലക്ഷ്യമിടുന്നത്.

ലിബറലൈസ്ഡ് റെമിറ്റൻസ് സ്കീം (LRS) പ്രകാരം വിദേശ പണമടയ്ക്കലുകളിൽ ടി.സി.എസ് (ടാക്സ് കളക്ടഡ് അറ്റ് സോഴ്സ്) വർദ്ധനവ് വരുത്തിയതാണ് പ്രധാന മാറ്റങ്ങളിലൊന്ന്. ഇത് പ്രതിവർഷം 7 ലക്ഷത്തിൽ കൂടുതലുള്ള തുകയ്ക്ക് 20% ൽ നിന്ന് 22% ആയി ഉയർന്നു. വിദേശ വിദ്യാഭ്യാസം, യാത്ര, നിക്ഷേപങ്ങൾ എന്നിവയെ ഈ മാറ്റം ബാധിക്കും.

"ക്രിപ്‌റ്റോകറൻസി/NFT ഇടപാടുകൾ ഇപ്പോൾ സെക്ഷൻ 194S പ്രകാരം 1% ടി.ഡി.എസ് ന് വിധേയമാണ്. ഇത് ഇന്ത്യയുടെ വെർച്വൽ ഡിജിറ്റൽ അസറ്റ് (VDA) വ്യവസ്ഥയുമായി യോജിക്കുന്നു. ഫ്രീലാൻസർമാർക്കും ഗിഗ് വർക്കർമാർക്കും ഉയർന്ന പരിധിയുണ്ട്. അതായത് 50,000 രൂപക്ക് മുകളിലുള്ള തുകകൾക്ക് 5% ടി.ഡി.എസ് (സെക്ഷൻ 194J) ഈടാക്കും.

ഫ്ലിപ്കാർട്ട് പോലുള്ള ഓൺലൈൻ മാർക്കറ്റ്പ്ലേസുകൾ കുറഞ്ഞ മൂല്യമുള്ള വിൽപ്പന ഉൾപ്പെടെ ഓരോ വിൽപ്പന ഇടപാടിലും 1% ടി.സി.എസ് കുറയ്ക്കണം. ജോയിൻ്റ് പ്രോപ്പർട്ടികൾ വാങ്ങുമ്പോൾ രജിസ്ട്രേഷനുകളിൽ ഫ്ലാറ്റ് 20% ടി.‍ഡി.എസ് ഒഴിവാക്കാൻ എല്ലാ ഉടമകളുടെയും പാൻ വിവരങ്ങൾ നൽകേണ്ടതുണ്ട്, "ആഡ്കൗണ്ടി മീഡിയയുടെ സഹസ്ഥാപകനും ചീഫ് ഫിനാൻഷ്യൽ ഓഫീസറുമായ അബ്ബിനവ് ആർ ജെയിൻ പറഞ്ഞു.

ഒരു കുടുംബം വിദേശ വിദ്യാഭ്യാസത്തിനോ യാത്രയ്‌ക്കോ 15 ലക്ഷം നൽകിയിയാൽ ഇപ്പോൾ 33,000 രൂപ ടി.സി.എസിന് നൽകണം. മുൻപ് 30,000 രൂപയായിരുന്നു അടച്ചിരുന്നത്. 2 ലക്ഷം മൂല്യമുള്ള ബിറ്റ്‌കോയിൻ വാങ്ങുന്ന ക്രിപ്‌റ്റോകറൻസി നിക്ഷേപകർക്ക് 2,000 ടി.ഡി.എസ് ആയി കുറയ്ക്കും, ഇത് ലിക്വിഡിറ്റി കുറയ്ക്കുമെന്ന് പറയുന്നു. ഇത്തരത്തിലുള്ള നിരവധി മാറ്റങ്ങളാണ് വരാനിരിക്കുന്നതെന്നും അബ്ബിനവ് ആർ ജെയിൻ കൂട്ടിച്ചേർത്തു.

വ്യക്തിഗത നികുതിദായകർക്കുള്ള പ്രധാന ടി.ഡി.എസ്/ടി.സി.എസ് മാറ്റങ്ങൾ

• സെക്യൂരിറ്റൈസേഷൻ ട്രസ്റ്റിൽ നിന്ന് പൗരൻമാർക്ക് ലഭിക്കുന്ന വരുമാനത്തിന് സെക്ഷൻ 194LBC പ്രകാരമുള്ള TDS 25%/30% ൽ നിന്ന് 10% ആയി കുറയ്ക്കും.

• സെക്ഷൻ 194S ലെ അനുബന്ധ പരാമർശങ്ങൾക്കൊപ്പം, സെക്ഷൻ 206AB (ഫയൽ ചെയ്യാത്തവർക്ക് ഉയർന്ന TDS), സെക്ഷൻ 206CCA (ഫയൽ ചെയ്യാത്തവർക്ക് ഉയർന്ന TCS) എന്നിവ ഒഴിവാക്കാൻ നിർദ്ദേശിക്കപ്പെട്ടിരിക്കുന്നു.

• സെക്ഷൻ 206C(1G) പ്രകാരമുള്ള TCS: LRS, വിദേശ ടൂർ പാക്കേജുകൾ എന്നിവയ്ക്ക് കീഴിലുള്ള പണമടയ്ക്കലിന്റെ പരിധി 7 ലക്ഷത്തിൽ നിന്ന് 10 ലക്ഷമായി വർദ്ധിക്കും.

• സെക്ഷൻ 80E(3)(b) പ്രകാരം വിദ്യാഭ്യാസ വായ്പാ പണമടയ്ക്കലിന് TCS ഇല്ല.

2025 ലെ ധനകാര്യ നിയമം പാസാക്കിക്കഴിഞ്ഞാൽ, 2025 ഏപ്രിൽ 1 മുതൽ 2025-26 വർഷത്തേക്ക് ഈ മാറ്റങ്ങൾ പ്രാബല്യത്തിൽ വരും.

ടി.സി.എസ്, ടി.ഡി.എസ്: 2025 ബജറ്റിൽ അവതരിപ്പിച്ച മാറ്റങ്ങൾ

• പുതിയ വ്യവസ്ഥകൾ പ്രകാരം, മുതിർന്ന പൗരന്മാർക്ക് പ്രതിവർഷം 1 ലക്ഷം വരെയുള്ള പലിശ വരുമാനത്തിന് ടി.ഡി.എസിൽ നിന്ന് ഇളവ് ലഭിക്കും.

• മറ്റുള്ളവർക്കുള്ള ടി.ഡി.എസ് ഇളവ് പരിധി 40,000 രൂപയിൽ നിന്ന് 50,000 രൂപയായി ഉയർത്തി.

• മുതിർന്ന പൗരന്മാർക്ക് അവരുടെ നികുതി പരിധി അനുസരിച്ച് ഇപ്പോൾ 15,000 രൂപ വരെ ഇളവ് ലഭിക്കും.

• വാടക വരുമാനത്തിനുള്ള ടി.ഡി.എസ് ഇളവ് പരിധി പ്രതിവർഷം 2.4 ലക്ഷത്തിൽ നിന്ന് 6 ലക്ഷമായി ഉയർത്തി. അതായത് പ്രതിമാസം 50,000 രൂപയായി ബജറ്റിൽ ഉയർത്തി. ഇത് നേരത്തെ ഇത് പ്രതിമാസം 20,000 രൂപ ആയിരുന്നു.

• മ്യൂച്വൽ ഫണ്ട് യൂണിറ്റുകളിൽ നിന്നോ പ്രത്യേക കമ്പനികളിൽ നിന്നോ ഉള്ള ലാഭവിഹിതത്തിനും വരുമാനത്തിനും മേലുള്ള ടി.ഡി.എസ് ഇളവ് 5,000 രൂപയിൽ നിന്ന് 10,000 രൂപയായി വർദ്ധിപ്പിച്ചതിന്റെ ഗുണം ഓഹരികളിലും മ്യൂച്വൽ ഫണ്ടുകളിലും നിക്ഷേപിക്കുന്നവർക്ക് ലഭിക്കും.

• ലിബറലൈസ്ഡ് റെമിറ്റൻസ് സ്കീം (LRS) പ്രകാരം ടി.സി.എസ് പരിധികൾ പരിഷ്കരിച്ചു, ഇത് അതിർത്തി കടന്നുള്ള ഇടപാടുകളിൽ ഏർപ്പെട്ടിരിക്കുന്ന വ്യക്തികൾക്ക് പ്രയോജനം ചെയ്യും. മുൻപ് ഇതിന്റെ പരിധി 7 ലക്ഷം ആയിരുന്നു, അതിപ്പോൾ 10 ലക്ഷമായി ഉയർത്തി. ചില സ്ഥാപനങ്ങളിൽ നിന്നുള്ള വിദ്യാഭ്യാസ വായ്പകൾ ഇപ്പോൾ പൂർണ്ണമായും ഒഴിവാക്കിയിരിക്കുന്നു.